February 8, 2008

 

TF NI MAYOR UY 'SATISFIED' SA STP PRESENTATION

Kon wala palang unta gikadenahan ug pamolitika ang pagluwat ug Certificate of Occupancy para sa bag-ong tambalanan sa probinsya, hayan hagbay rang giluwatan ni City Mayor Evelyn Uy ang gipangayo ni Governor Lando Yebes nga permiso sa dihang mismo ang gimugna nga Task Force (TF) Inspectorate Team sa City Hall nga maoy gitahasan sa pagsubay sa Sewerage Treatment Plant midayeg sa iyang desinyo human gipasabot pag-ayo sa consultant sa Metropolis Construction atol sa presentation niini niadtung miaging adlaw.

Human giisplikar ni Engr. Ariel Alvarez ang Consultant sa Metropolis Construction ang STP sa Zanorte Medical Center ang tanang mga pangutana sa City Inspectorate Team sa Dipolog pinangulohan ni Atty. Cyril Ruiz, kini mibutyag nga magpatawag sila ug hinanaling meeting human sa presentation aron ilang i-evaluate ang tanang tubag sa ilang mga pangutana ug siya mipahayag nga basin sayo nilang mapagawas ang baruganan sa Dipolog kalabot sa pag-release sa Occupancy Permit. Gi-angkon ni Atty. Ruiz nga satisfied sila sa nahimong tubag sa Consultant sa STP apan duna pay pipila ka mga punto nga ilang metingan sa City Inspectorate Team ayha nila ipagawas ang ilang desisyon. Si Engr. Ireneo Gaite sa Metropolis Construction ug maoy Project Engineer sa Zanorte Medical Center nanghinaot nga unta ihatag na sa Dipolog ang  Occupancy permit nga mao na lang ang ilang gihulat aron itugyan na nila sa pangagamhanan sa probinsiya ang Zanorte Medical Center.

Sa wala mao si Engr. Ireneo Gaite sa Metropolis Construction ug maoy Project Engineer sa ZaNorte Medical Center, sa tunga mao si Engr. Ariel Alvarez ang Consultant sa Metropolis Construction ug sa tuo mao si Atty. Cyril Ruiz, ang nangulo sa City Inspectorate Team sa Dipolog
 

Mao kini ang Sewerage Treatment Plant (STP) atul sa Orientation sa Metropolis Consultant nga gitambongan sa Inspectorate Team sa City Hall.

Matud pa niya ang mga pangutana nga gitugpo sa City Inspectorate Team ngadto sa ilang Consultant mao ra usab ang mga pangutana nga gipadangat ngadto kanila busa ilang gipaanhi dinhi sa dakbayan ang ilang Concultant aron maoy mo-isplikar sa tanang butang nga bu-ot masayran sa Dipolog kalabot sa ilang pag-question sa status sa Sewerage Treatment Plant sa Zanorte Medical Center. Sumala pa niya nga ang tanang gusto sa siyudad ila nang gituman ilabi na sa ilang pag-question mahitungod sa STP. Atol sa pagpresentar sa STP sa bag-ong hospital unang gipasabot sa Consultant sa Metropolis Construction  nga si Chemical Engineer Ariel Alvarez ang kamahinungdanon sa pag-operate sa Sewerage Treatment Plant ug kung unsa-on paglimpiyo ug pagre-cycle ang mga hugaw gikan sa Hospital ayha kini idesposar.

Ang disinyo sa STP sa Zanorte Medical Center mao usab ang ilang gi-apply sa mga dagkung proyekto nga gitukod sa Metropolis Construction ug kini ilang napamatud-an nga epiktibo. Gi-angkon sa consultant nga dili mapamatud-an kung unsa ka-epiktibo ang STP sa bag-ong hospital kung dili mka-operate ang nasangpit nga tambalanan. Kahinumduman nga bugtong ang Certificate of Occupancy na lang ang gihulat sa kagamhanang probinsyal alang sa hingpit nga pag-operate sa Zamboanga del Norte Medical Center.  (The New Nandau, Vol. XVII No.30)

*

 

Supply sa pagkaun dili maapektahan sa Biofuels

Hingpit nga gisalikway sa Office of the Provincial Agriculturist ang gipalanog nga kabalaka sa mga supak sa biofuels nga kini makaapektar sa supply sa pagkaun kay ang kayutaan nga gitikad para sa pagkaun mapunta na sa pagproduce sa feed stock para sa biofuels. Si Maybel Bustallino, Agricultural Specialists sa ZaNorte, layu ra nga mahitabo dinhi sa atong lalawigan nga maapektuhan ang atong produksiyon sa pagkaun sa pagpadas-og usab karon sa probinsiya nga maoy usa sa mamahimong tinubdan sa biofuels.

Matud pa ni Bustallino sa pagkakaron mokabat sa 54 porciento sa atong kaumahan ang wala gitikad ug walay production nga naglangkub ug kapin sa 300 mil ka ektaryang yuta. Kahinumduman maoy gipadas-og karon sa kagamhanang probinsiyal nga mamahimong production area sa biofuels ang pipila ka lungsod sa 3rd congressional district nga maoy nakaani ug interest sa Basic Energy Corporation para tamnan ug tubo aron maoy ipakaun sa planta. Matud pa ni Bustallino sa iyang nakita kini dili maka apektar sa atong supply sa pagkaun kay ang gikinahanglan para sa pagproduce ug ethanol mokabat lamang ug napulo ka libu ka ektaryas nga luna.

Sa iyang kabahin si Governor Rolando Yebes, alang kaniya ang gipalanog nga kabalaka nga makaapektar sa food security ang biofuels production sama ra sa argumento nga gipalanog kaniadto sa panahon ni Marcos nga gisupakan ang pagpatindog ug plantang nukleyar. Tungod niini sa pagkakaron bugtong ang Pilipinas na lamang ang nagpabilin dinhi sa Asya nga walay plantang nukleyar. (Press Freedom, Vol. XX No. 16)

*

 

CEBEDO: WE CONDEMN

Human mibanaw ang dugo sa mga membro sa pamilya Yap ug Cebedo nga parehong nag-iyahay ug tumbok nga maoy responsable sa nagpanghitabong krimen nga mikutlo na ug daghang kinabuhi sa mga membro sa ilang pamilya dungan kining nana-nawagan sa gobiyerno nga mahatagan na ug tukmang hustisya ang kamatayon sa mga biktima. Kini ang gipalanog nga panawagan ni Roy Yap ug Archetic Prudencio Cebedo samtang ubay-ubay na sa ilang pamilya ang nakutloan sa ilang kinabuhi tungod sa dumot sa politika nga maoy nag-unang gitumbok nga hinungdan sa linoog nga pagpatay.

Niadtung Martes sa buntag, ulahing giposil patay si kanhi Sapang Dalaga Mayor Reynaldo “Rey” Yap samtang mitambong sa pagdungog sa iyang giatubang kasong ‘murder’ didto sa Regional Trial Court nga anaa mahimutang sa 4th floor sa Manila City Hall. “We condemn the criminal act and we wish that the perpetrators are brought to justice”, reaksiyon sa pamilyang Cebedo human mabate ang balita nga wala mailhing suspetsado ang miposil patay kang Rey niadtung Enero 29. (pls. read the letter to the editor address to The Philipine Daily Inquirer, Philipine Star and Manila Bulletin  from Cebedo family in relation with the comment of Chief Supt. Rosales)

Dead on arrival nga gidala sa Philipine General Hospital si Rey Yap sa dihang naigo kini ug lima ka mga bala nga natusak-tusak sa iyang lawas partikular sa iyang dughan. Ang iyang body guard nga si Peter Villanueva-Sabijon nga napiksan sa bala ang kasam-tangang gi-operahan sa Manila Doctors Hospital. Nadamay usab sa insedente ang usa ka membro sa Volunteers Against Crime and Corruption nga nailhang si Villa Santos apan anaa na karon sa luwas nga kahimtang. Anaa lamang sa kilid sa court room si Yap nagpundo samtang naghuwat nga dunggon ang iyang kaso sa RTC Branch 19 ni Judge Zenaida Daguna sa dihang giduol kini sa ‘gunman’ ug giposil. Matud pa nga sa wala pa mahitabo ang pagposil, duna pay gika-estorya sa cellphone si Yap sa wala pa magsugod ang hearing sa kasong murder. Nalinga ang iyang body guard hinungdan nga nakahigayon ug duol ang suspetsado dayon posil sa biktima.

Gipagawas na sa Manila Police District ang cartographic skecth sa ‘gunman’ ni Yap. Politika ang gilantaw sa mga imbestigador nga posibling maoy nag-unang motibo sa krimen. Chief Supt. Roberto Rosales, Manila Police District Chief nagkanayon nga ang mga imbestigador nakatapos na sa paghimo ug cartographic skecth base sa discriptions nga gihulagway sa mga testigos. Hinoon gipahayag ni Rosales nga mangayo pa sila ug ‘second opinion’ gikan sa laing police skecth artist aron pagseguro nga ang discription magkatakdo sa hulagway sa mamu-muno kinsa nakit-an nga nagsuot pa ug police jacket uniform atol sa maong krimen. Base sa paghulagway sa duha ka mga testigos, ang ‘gunman’ adunay gitas-on nga 5’8 hangtud sa 5’9, anaa sa edad nga byenti singko hangtud tryanta anyos, puti ang pamanit ug katamtaman ang panglawas.

Matud pa ni Judge Silvano Pampilo, Jr. sa Manila RTC Branch 26, kanunay nga moadto sa iyang opesina aron mangape si kanhi Mayor Rey Yap sa panahon nga motambong kini sa iyang hearing. Matud ni Judge Pampilo, gitug-anan siya ni Yap nga duna siyay nadawat nga ‘death threat’ pipila na ka adlaw ang milabay. “Mikonpisal siya nako nga duna siyay death threat sa ilang kontra sa politika, gobernador ug congressman sa Misamis Occidental. Iya pod gisulte nga nasuko niya ang mga NPA,” nagkanayon si Judge Silvano Pampilo, usa ka Dipolognon nga nahimo karong huwes nga nadestino sa Regional Trial Court sa Manila City Hall.

Sumala sa police officials ang nasangpit nga police skecth maoy basehanan sa kapolisan atubangan sa pagduda nga ang krimen maoy tipik sa panagbangi sa pamilya sa biktima ug sa laing pamilya sa kaatbang niini sa politika sa Misamis Occidental tungod kay duna nay tulo sa nahitabong pag-patay sa habig sa pamilyang Yap ug tulo usab sa habig sa pamilyang Cebedo sa lungsod sa Rizal, Zamboanga del Norte. Matud ni Rosales, dunay tulo nga pagpatay ang nahitabo sa Metro Manila, duha niini sa habig sa pamilyang Cebedo ug ang ulahing nahitabo ang pagluthang patay kang  Rey Yap didto mismo sulod sa Manila courtroom.

“There is no factual basis to such wild speculation,” nagkanayon si Engr. Prudencio Cebedo human ilang pamilya daw maoy gitumbok sa kapolisan nga maoy mastermind sa pagpatay. Angay kahibaloan nga ang managsuong Rey ug Roy Yap maoy gitumbok sa ‘confessed killer’ nga si Judhito Cara nga maoy mastermind sa pagposil patay kang Mayoralty Candidate Victorio “Boy” Cebedo niadtung tuig 1992. Si Boy Cebedo giluthang patay samtang nagpahigayon ug political rally sa Barangay Birayan sa lungsod sa Rizal. Nasundan kini sa pag-posil patay kang Rizal Mayor Perfecto Cebedo niadtung 2003. Nasayran nga sa wala pa mahitabo ang political rivalry nga misampot sa pinatyanay sa pamilyang Yap ug Cebedo, gikataho nga ang mga Yap duna na daan hing-pit nga kaaway sa politika sa Misamis Occidental nga mikutlo na ug daghanang kinabuhi sa ilang pamilya.

Matud pa sa iyang abugado, bag-o palang nakagawas si Yap sa Manila City Jail niadtung Nobembre sa miaging tuig matapos makabutang ug piyansa sa kasong murder nga gipasaka batok kaniya. Si Rey motambong unta sa hearing adtung Martes sa kasong pagpatay kang Julie Ontulan, kanhi membro sa NPA diin siya ang gitumbok nga mastermind. (The New Nandau, Vol. XVII No.30)

*

 
Metropolis ug konsultanT nagpalaban

Sa unang higayon ang Metropolis Construction Incorporated uban sa ilang consultant kabahin sa Sewage Treatment Plant nangunay sa pag-eksplikar atubangan sa katawhan sa Zamboanga del Norte may kalabutan na sa gikonstrak nilang pasilidad nga maoy giinitan sa siyudad sa Dipolog ug maoy nakalangay sa gipangayo nilang Occupancy Permit para sa ZaNorte Medical Center.

Si Engr. Ariel Alvarez, technical director sa ERA Integrated Corporation ang consultant sa Metropolis sa pagkonstrak sa STP subling mitataw nga ang pasilidad nga ilang gikonstrak para sa medical center nakatuman na sa tanang mga requirements sigun sa gimandu sa balaod sa Department of Environment and Natural Resources nga maoy nag-isyu sa Environmental Compliance Certificate. Iyang giklaro nga ang gikonstrak nilang pasilidad nga maoy gisukit-sukit ug maayo sa dakbayan sa Dipolog diin gipangayuan sila sa daghanang mga requirements mao ang STP nga maoy mosalod sa hugaw sa tawo gikan sa kasilyas ug lababo sa medical center diin adunay proseso nga ang tubig nga mogawas gikan sa maong pasilidad limpyo na ug dili na makahugaw sa atong environment.

Samtang ang probinsiya nagkonstrak usab karon ug laing pasilidad para maoy butangan sa mga toxic wastes nga lahi sa STP. Matud pa ni Engr. Alvarez sa ubang mga siyudad kon ang usa ka proyekto magbatun ug STP makaani ug pagdayeg gikan sa kagamhanan kay dili tanang mga proyekto ang nagbatun niini nga matang sa pasilidad. Iyang gipasabot nga dinhi ra sa dakbayan sa Dipolog nga nakahinagbo sila ug laing reaksiyon nga sa ilang gikonstrak nga pasilidad sa STP imbes pagdayeg kay ang medical center nagbatun niini gilisud-lisud na hinoon sila sa kagamhanang local.

Si Engr. Alvarez midugang sa pagsaysay nga ilawom sa balaod karon ang tanang mga hotels girequire sa DENR nga magbatun sa iyang kaugalingong STP ug nagtuo siya nga ang hotel nga iyang gipuy-an karon sa Dipolog wala gani magbatun niini nga gipanag-iyahan sa pamilya sa mayor. Samtang si Engr. Irineo Gaite sa Metropolis Construction miapilar sa Dipolog nga unta dili sila iapil sa politika niini kon ugaling naghambin kini ug kasuko batok sa kagamhanang probinsiyal. Matud pa niya gituman na nila ang tanang gipangayo sa Dipolog kabahin sa STP ug nagtuo siya nga hatagan na sila niini.

Niadtong Lunes nagpadala na sila ug demand letter ngadto sa Office of the City Building Official alang na sa Occupancy Permit. (Press Freedom, Vol. XX No. 16)

*

 

Roy: Kontra sa politika

Walay laing pagduda nga gitumbok sa pamilya Yap nga ilang mortal nga kaaway sa politika maoy nagpaluyo sa pagposil patay sa iyang igsuon. Si Rey Yap uban sa iyang igsuon nga si Roy ang nabilanggo sulod sa kinsi ka tuig human makonbikto sa kasong pagpatay kang Victorio “Boy’ Cebedo niadtung 1992. Si Boy Cebedo ug Roy Yap maoy nagka-engkwentro pagka mayor sa lungsod sa Rizal, Zamboanga del Norte niadtung 1992 sa dihang giposil ug namatay. Ang managsuong Rey ug Roy Yap nakonbikto sa lower court sa kasong pagpatay kang Cebedo apan na-absuwelto kini sa Court of Appeals niadtung Pebrero 2007. Apan imbes nga makalaya gikan sa bilangguan, napriso ug balik si Rey Yap sa dihang nalambigit kini sa lain pang kasong pagpatay ug niadto lang Nobembre sa miaging tuig siya nakagawas human kini makabutang ug piyansa alang sa iyang temporaryong kagawasan.

Naka-pending pa ang kaso ni Rey Yap sa Department of Justice may kalabotan sa kasong pagpatay kang Mayor Perfecto Cebedo. Angay hibaloan niadtung 2003, si Mayor Perfecto Cebedo uban sa iyang pamilya sakay sa ilang van subay sa national highway sa Alabang, Muntinlupa giharang sa mga armadong grupo ang ilang gisakyan ug gipaulanan sa mga bala. Sa pagtuo nga siya lamang ang tuyo ug target sa mga suspetsado, aron dili maangin ang iyang mga anak ug asawa, iyang gimandoan ang driver nga ihunong ang ilang gisakyan. Matud ni Mrs. Julie Cebedo, nanaug sa Nonoy ug girapedo sa mga mamumuno. Tadtad sa mga bala ang lawas ni Cebedo ug wala na mahitsura ang panagway niini. Matud ni Roy Yap panahon na unta nga ila nang makauban sa hingpit ang ilang pamilya nga sulod na sa pipila ka mga katuigan wala nila nakauban gumikan sa kalambigitan sa ilang giatubang kaso. Apan inay nga makauban na nila ang ilang pamilya, nakahinagbo na hinoon sa kamatayon ang iyang igsuon.

Dili na bag-o sa pamilyang Yap ang pagbanaw sa dugo. Ika-unom na si Rey sa ilang pamilya ang namatay sa posil. Unang napatay ang iyang amahan nga si Reno Yap, Sr., kanhi mayor sa Sapang Dalaga, Misamis Occidental nga namatay sa ambush didto sa Barangay Guinabot niadtung 1983. Nasundan kini nga naposilan ug napatay ang upat pa niya ka mga uyoan nga parehong politika ang motibo. Niadtung tuig 1984 giposil patay sa Mapang, Rizal si Mayor Rodulio Yap, Jr. sa Baliangao, 1992 giposil patay si Rosalio Yap sa Balobohan, 1994 giposil patay didto sa Poblacion, Sapang Dalaga si Thiamine Yap ug pagka 1995 giposil patay didto sa Cagayan de Oro City si Mayor Agapito Yap, Jr. sa Baliangao, Misamis Occidental. Giposil usab ang igsuon ni Rey nga si Reno Yap, Jr., Vice Mayor sa Sapang Dalaga niadtung 2004 apan wala na-ultimano. Gikatahong namatay lang kini abtan ug tuig kay giatake sa high blood.

Gipahayag ni Roy nga kaaway nila sa politika ang gitumbok nga nagpatay sa iyang igsuon. Chief Supt. Roberto Rosales, Manila District Police Chief nagkanayon nga posibling dunay kalambigitan sa politika ang pagkapatay kang Rey Yap gumikan sa nangaging mga kasinatian. Wala hinoon gisalikway sa kapolisan nga duna usay posibilidad nga dunay kalambigitan ang paglaya ni Rey bag-ohay palamang mahitungod sa kasong pagpatay nga iyang giatubang kang Julie Ontulan nga kanhi membro sa NPA. (The New Nandau, Vol. XVII No.30)

 
 

PNP-MILF nag-engkwentro sa Sibuco 3 samaran 1 patay

Sibuco, Zamboanga del Norte- Nagka-engkwentro ang tropa sa kapolisan ug MILF Lost Command didto sa Barangay Lakiki sakop sa lungsod sa Sibuco, Zamboanga del Norte nga mikutlo ug usa ka kinabuhi nga sibilyan samtang tulo ka mga polis ang samaran sa dihang gipaulanan kini ug mga bala atol sa ilang foot patrol operation niadtung Miyerkules sa buntag.

Sumala pa ni P/Inspector Charisse Bajelot Yabo, tigpamaba sa Provincial Police Office, tulo ka team sa Sibuco PNP nga gipangulohan ni Police Senior Inspector Parson Juljani Asadil, Chief of Police sa Sibuco Police Station nagpahigayon ug foot and visibility patrol aron ipatuman ang arrest order sa mga wanted personalities nga gituhuang atua nagtago sa Barangay Lakiki. Samtang ang tropa sa gobiyerno gadulong palang sa maong dapit, pag-abot nila sa Setio Kakawan sakop sa Barangay Lakiki, gipaulanan na sila ug mga bala gikan sa mga armadong rebeldi nga maoy hinungdan nga mibalos usab ang mga polis ug nahitabo ang pinosilay.

Atol sa maong engkuwentro, samaran si Police Senior Inspector Juljani Asadil sa dihang naigo kini sa luyo nga bahin sa iyang abaga, samtang duha sa iyang mga ginsakpan nga nailhang sila si PO1 Rajal Maindam ug PO1 Nur-aden Ibrahim ang samaran usab ug gikatahong anaa sa kritikal nga kondisyon. Sa pagresponde sa militar, sila si POI Maindam ug POI Ibrahim ang gidala kini sa Zamboanga City sakay sa helikopter samtang sa pagkahapon, gisunod usab ug dala sa Zamboanga City alang sa medical treatment si Chief of Police Asadil. Ulahing nadala sa Zamboanga City si Asadil tungod kay wala dayon kini mikanaog gikan sa bukid kay padayon kining migukod sa mga rebelde.

Usa ka ginang nga nailhan sa iyang apelyedo Langgal, inahan sa usa ka polis nga membro sa Sibuco PNP ang nakutloan sa iyang kinabuhi sa dihang naigo kini sa nagkuros-kuros nga mga bala. Matud pa sa tinubdan, si Ginang Langgal migawas gikan sa sulod sa iyang panimalay sa dihang nakadungog kinig botboto sa armas ug naigo. Mga elemento sa Charlie Company sa 44th Infantry Batallion, Philipine Army maoy mi-reinforce sa tropa sa kapolisan ug mihimo ug hot pursuit operations batok sa mga armadong rebelde. Wala pay report kon duna bay samaran sa habig sa mga membro sa MILF Lost Command nga gika-engkuwentro sa tropa sa gobiyerno.

Ang Barangay Lakiki aduna lamay lima ka kilometro ang distansiya gikan sa poblacion sa lungsod sa Sibuco. Sumala sa tinubdan, kasagaran sa mga rebelde nga gika-engkuwentro sa militar ug kapolisan taga lungsod sa Sirawai. Pito ka mga wanted persons maoy tuyo sa kapolisan aron i-serbe ang warrant of arrest sa dihang gi-ambusan kini sa mga armadong grupo. Ang pito ka mga wanted persons nga nalambigit sa kasong pagpatay ug extortion gipangulohan ni Abdulmajid Abdulhaman alyas Kumander Mollong, . Matud pa nga si Kumander Mollong maoy nag-lider sa MILF Lost Command nga nag-operate sa kabukiran sa lungsod sa Sirawai, Sibuco, Baliguian ug Siocon kinsa nag-atubang ug kasong pagpatay ug extortion. Ang maong kaso dugay-dugay na nga giatubang ni Mollong uban sa iyang mga kauban hinungdan nga sa dihang may naka-timbre nga atua kini nag loblob sa Barangay Lakiki, ang tropa sa Sibuco PNP wala magpalabay sa panahon pag-adto sa dapit aron i-serbe ang arrest order gikan sa korte, apan nakahinagbo ug engkuwentro kay sa wala pa sila maabot sa ilang destinasyon, kini gi-ambusan naman sa mga armadong grupo.

Gipasabot sa kapolisan nga wala sila makalapas sa on going peace negotiations tali sa MILF ug sa gobiyerno sa pagtaak sa dapit nga maoy matud pa, gikampohan sa mga armado tungod kay ang pag-imposar sa warrant of arrest aron dakpon ang mga wanted persons nagsumikad kini sa gi-atubang nga mga kaso. Sa pinakaulahing report nga nahipos, si General Jaime Caringal, PNP Regional Director mipadala karon ug tropa gikan sa Regional Mobile Group nga gipangulohan ni P/SSupt.. Lurimer Deltran ug Police Chief Inspector Reynaldo Maclang gikan sa PNP Regional Command aron magpahigayon ug hot prusuit operation sa Barangay Lakiki sa lungsod sa Sibuco human molibkas ang tulo ka adlaw nga tagal nga mobakwit ang mga residente sa maong dapit. (Press Freedom, Vol. XX No. 16)

*

 

From Zamboanga to Dipolog:
Herrera mihangyo sa IAS kaso ibalhin sa Dipolog batok Maclang

Kusganong gihangyo sa complainant pinaagi sa abugado niini nga ibalhin ang pagpaminaw sa administratibong reklamo nga gipasaka ni Joseph Herrera batok kang PCI Reynaldo Maclang gikan sa Zamboanga City nganhi sa dakbayan sa Dipolog.

Kini ang mosyon nga giduso ni Atty. Lester Patay, legal councel ni Herrera atol sa unang salga sa pagpa-minaw sa reklamo batok sa kanhi hepe sa kapolisan dinhi sa dakbayan sa Dipolog. Gipasabot ni Atty. Patay ngadto sa hearing officer nga ang pagbalhin sa pagdungog sa kaso nahi-subay sa rules of procedure tungod kay ang nahitabo sa pagkulata kang Herrera nahitabo sa dakbayan sa Dipolog samtang sa panahon nga hepe pa sa kapolisan sa Dipolog PNP si PCI Maclang.

Matud ni Atty. Patay nang complainant uban sa iyang mga testigos makahinagbo ug kahasol, seguridad sa ilang kinabuhi ug walay igong tinubdan sa galastohan diha sa pagpunay’ng adto sa Zamboanga City aron lang motambong sa pagdungog sa kaso. Busa alang sa konbeniyente sa tanan, sa kabahin sa complainant ug sa respondents ilabi na nga ang abugado ug testigos si Maclang nagagikan sa Dipolog, ug labaw sa tanan pinasubay sa balaod, mas maayo gayud nga ibalhin ang pagdungog sa administratibong sumbong gikan sa Zamboanga City nganhi sa dakbayan sa Dipolog.

Police Inspector Abdulpata Sali Jamisain, Hearing Officer mipasabot nga ang administratibong sumbong batok ni Maclang walay silot nga ipahamtang kon dili, mao lamang ang pagtul-id sa iyang sayop nga nabuhat kon aduna may ipahamtang nga disciplinary action. Matud pa ni Jamisan, kulang kaayo sila ug personahe sa PIAS dinhi sa Zamboanga del Norte kay usa lamang ang anaa dinha sa Camp Hamac, Sicayab busa ang tanang reklamo batok sa mga polis adto gayud masang-at sa ilang buhatan sa rehiyon. Si PCI Maclang nga walay abugado gihatagan ug higayon nga makakomen-taryo sa mosyon ang mipadayag sa iyang pagsupak kay gusto niya nga adto ra dunggon ang reklamo sa Zamboanga City.

Matud niya, wala sila magreklamo nga ang iyang abugado ug mga testigos nagagikan sa dakbayan sa Dipolog nga parehong mga empleyado sa City Hall busa dili pud magreklamo ang kabahin sa complainant. Apan si Atty. Patay mipasabot nga mas maayo hinoon nga ang pagpaminaw sa maong reklamo adto sa dakbayan sa Dipolog gumikan kay mas kombiniyente sa tanan ilabi na  ang tanang testigos ug sila nga mga abugado nagagikan dinhi sa dakbayan sa Dipolog.

Ang maong reklamo may kalabutan sa pagsukmag ni Maclang kang kanhi Konsehal Joseph Herrera nga nahitabo diha sa ganghaan sa City Hall. Duha ka managbulag nga kaso ang gipasaka ni Joseph Herrera, usa niini ang administratibong gipasaka sa Provincial Internal Affairs Service, PNP Provincial Police Office, Camp Hamac, Sicayab samtang ang criminal nga kaso anaa gisang-at ug hangtod karon anaa pa sa piskaliya. Nahimong agrabyado sa nahitabo nga pagkulata ni PCI Maclang kang Herrera mao ang mga membro sa Zamboanga del Norte United Correspondents kon ZNUC.

Usa ka sulat apelasyon ang gipadangat sa ZNUC ngadto kang Presidente Gloria Macapagal Arroyo alang na sa pagpalagpot gikan sa iyang pagka-hepe sa Dipolog Police si Police Chief Inspector Reynaldo Maclang ug kini ang gihatagan ug aksiyon sa Malacanang pinaagi sa pag-refer sa maong reklamo ngadto sa Regional PNP Command, Zamboanga City. Atol sa unang salga sa pagdungog sa administratibong reklamo batok kang Maclang mitambong ang mga membro ug opisyal sa ZNUC nga gidapit sa Regional Internal Affairs Service, Zamboanga City. Mitambong sa unang pagdungog sa maong reklamo mao ang complainant nga si Joseph Herrera, mga membro ug opisyal sa ZNUC, Atty. Lester Patay ug Atty. Rose Broce isip mga legal council sa nagreklamo ug si Police Chief Inspector Reynaldo Maclang.

Ang nahimong hearing officer sa pagdungog sa reklamo mao si Police Inspector Abdulpata Sali Jamisain, Police Chief Investigation Intelligence Division sa PNP Regional Internal Affairs Service, Zamboanga City. Tungod sa mosyon ni Atty. Patay, gihatagan ug lima ka adlaw sa hearing officer nga mosubmiter kini “in writing” sa iyang mosyon ayha modesider ang regional director sa Internal Affairs Service. Matud ni Police Inspector Jamisain ang makadisider sa mosyon mao lamang si IAS Regional Director P/SSUPT. Aquilino Garate, kanhi hepe sa Dipolog PNP. Sa interview ni Konsehal Joseph Herrera, iyang gipamahayag nga angayan lang gayud mabalhin ang pagpaminaw sa iyang reklamo gikan sa Zamboanga City nganhi sa dakbayan sa Dipolog.

Gipasabot ni Herrera nga wala nila kuwestyona ang integrity ug kakayahan sa Regional Internal Affairs Service, Zamboanga City sa pagpaminaw sa maong reklamo apan pinasikad sa rules of procedure gikinahanglan sundon tungod kay nahitabo ang pagkulata dinhi sa Dipolog samtang si Maclang pa ang hepe sa kapolisan sa Dipolog PNP. Si Atty. Lester Patay sa iyang kabahin mipahayag nga mosubmiter siya ug mosyon “in writing” atubangan sa pagsanong sa hearing officer aron madesisyonan kon hain paminawon ang pagdungog sa maong reklamo. Para ni Atty. Patay, kon subayon ang rules of procedure, nganhi gayud sa dakbayan sa Dipolog pagahimoon ang pagburoka sa reklamo ug dili sa Zamboanga City gumikan kay sumala sa balaod, kon asa nagpuyo ang gireklamo sa dihang nahitabo ang krimen, adto usab pagahusayon ang sumbong. (The New Nandau, Vol. XVII No.30)

*

 

Love triangle? O tulis
2 patay sa VideoKe Bar

Dapitan City- Nakaplagan na lamang nga naglunang na sa ilang kaugalingong dugo nga wala na’y mga kinabuhi ang duha ka mga batan-ong biktima sulod sa Secret Garden Videoke Bar luyo sa may Villa Pilar Pension House, Road 17, Barangay Dawo dakbayan sa Dapitan niadtung Huwebes, Enero 31. Ang mga biktima giila sa pangalang Sally Batulan Jr.,18 anyos, ulitawo nagpuyo sa Barangay Cawa-Cawa ug Melisa Gomez, 24 anyos, dalaga nagpuyo sa Barangay Banbanan parehong sakop sa Dapitan. Si Gomez maoy sinaligang tindera sa naasoy’ng Videoke Bar.

Si Batulan nakaangkon ug usa ka samad-pinusilan sa iyang ulo ug mga samad-dinunggaban sa nagkalain-laing parte sa iyang kalawasan samtang si Gomez nakaangkon usab ug usa ka samad-pinusilan sa luyong parte sa iyang ulo nga maoy hinungdan sa ilang kamatayon. Inisyal nga imbestigasyon gihimo sa Dapitan PNP nga gipangulohan ni Police Inspector Chamer Gloria Lacay, OIC-Chief of Police, ang duruha ka biktima nakaplagan sa usa ka karpentiro sa maong Videoke Bar nga si Anacleo Galleposo nga naglunang na kini sa ilang kaugalingong dugo nga wala na’y kinabuhi mga ala 7:30 ang takna sa buntag. Si Gomez gihuktan ug ‘straw’ sa iyang duha ka kamot samtang si Batulan gihuktan usab ug ‘wire’ sa mikropono ang iyang duha ka kamot. Wala pa matino nga halin sulod sa kaha ilang gituhuan nga gikuha pa kini sa mga suspetsado.

Narekober sa crime scene ang duha ka basiyo sa bala sa caliber 45, usa ka garote nga kahoy nga adunay gitas-ong 22 ug tunga ka pulgadas ug mga finger print. Wala pa maestablisar sa kapolisan kon unsay tinuod nga motibo sa pagpatay apan pipila ka mga testigos mibutyag nga ang mga suspetsado nahimong kostumer niadtung gabhiona sa dihang nahitabo ang linoog nga krimen. (By Alfredo Ogoc, Press Freedom, Vol. XX No. 16)

*

 

3 puga sa Prov’l Jail nadakpan

Upat nalang ka mga puga ang sobsob karon nga gipangita sa mga otoredad sa dihang tulo niini nga nakalayas niadtung miaging semana ang malamposonng nadakpan ug balik sa kapolisan sa managlahing lugar. Niadtung Huwebes sa buntag, ikatulong puga nga nadakpan ug balik sa kapolisan si Jovan Abrinica, nag-atubang ug kasong pagpanglugos.

Si Abrinica maoy kauban sa pito ka mga binilanggo ang mipuga niadtung Miyerkules sa kaadlawon sa miaging semana gikan sa ilang gipuy-ang selda sa Correctional and Rehabi-litation Center sa Provincial Jail sa Don Jose Aguire sa lungsod sa Manukan. Boluntaryong mitahan sa iyang kaugalingon si Jovan Abrinica ngadto kang Police Senior Inspector Devine Ceriales, ang chief of police sa Manukan Police Station. Si Abrinica nga residente ra usab sakop sa lungsod sa Manukan ang gikatahong mi-surender sa kapolisan gumikan sa tambag sa iyang pamilya.

Sumala sa tinubdan, niadto pang miaging gabii ang mga membro sa provincial jail guard naghapa-hapa sa balay sa akusado apan wala gayud kini magpakita sa ilang barangay. Gumikan sa hangyo sa chief operation ngadto sa mga ginikanan ni Abrinica, kini natandog ug maoy nangahas aron mapa-surender ang ilang anak. Ikatulo na kini ka higayon ni Abrinica nga nakapuga gikan sa prisohan. Una niyang puga didto sa Misok, Sindangan sa dihang gihimo kining sinaligan, apan mi-ule ug wala na mibalik. Ikaduhang puga ang pag-ambak likod sa ilang selda apan nadakpan ra usab ug balik samtang ang ika-tulo sa miaging semana.

Unang nadakpan ug balik sa kapolisan si Maximo Mercado, nag-atubang ug kasong Acts of Lascivious-ness. Si Mercado nga taga Barangay Upper Irasan ang malamposong nasikop sa Roxas PNP niadtung Dominggo. Nadakpan usab ug balik sa kapolisan si Piofe Cating, nag-atubang ug kasong pagpanulis. Si Cating nasikop sa Dipolog Polis samtang nagtagotago kini sa iyang higala sa Barangay Sta. Isabel ning dakbayan sa Dipolog. Ang tulo ka mga pugante nga nasikop ug balik sa kapolisan ang giturn-over na kini karon sa Provincial Jail ug gisulod ug balik sa ilang selda ilawom sa higpit nga pagbantay sa mga jail guard.

Ang upat ka mga pugante nga padayon pa karong gilakag sa mga otoredad nailhan nga sila si Sonny Leaño, Sultan Roel, Ramos Jovencio nga parehong nag-atubang sa kasong pagpanulis ug Guphy Siman y Gutiera, nag-atubang sa kasong carnapping. (The New Nandau, Vol. XVII No.30)

*

 
Barangay food terminal tukoron sa Zambo Norte

Gipatun-an karon sa buhatan sa agrikultura sa Zamboanga del Norte ang  pagpahimutang ug mga barangay food terminal sa pipila ka bahin sa atong probinsiya aron maoy mahimong behikulo sa mga mag-uuma sa pagbaligya sa ilang mga produkto ngadto sa merkado.

Si Maybel Bustalino, Agricultural Specialist sa ZaNorte mipahayag nga kini karon ang ilang gipadas-og nga lakang ngadto kang Governor Rolando Yebes para sa marketing sa produkto sa atong mga mag-uuma. Sa gihimo nilang pagvalidate ang mga lungsod sa Sindangan ug Katipunan hayan maoy mauna nga makabatun sa Barangay Food Terminal kay aduna nay gibatunang mga building nga magamit sa maong katuyuan.

Gipatin-aw ni Bustalino nga maoy gisubay nila karon ang nagkadaiyang mga tabuan diha sa barangay kon unsa kini ka daku. Didto sa Sindangan sumala pa hayan magbutang sila ug chillers para kadtong mga produkto nga dili mahurot ug kahalin mamahimong mapundo ug mabaligya pagka sunod adlaw nga presko lang gihapon. Giklaro usab ni Bustalino nga ang ipatindog nga Barangay Food Terminal sa probinsiya wala magtinguha nga makigkompetensiya sa atong mga negosyante o kumprador sa nagkadaiyang produkto sa agrikultura.

Ilawom sa maong programa ang mag-uuma direkta nang makabaligya sa ilang mga produkto. (Press Freedom, Vol. XX No. 16)

 
 

 HULAGWAY BALITA

 

Parokya ni Joe, Southpoint Editorial Cartoon (Southpoint, Vol.1No.5)
 

JUAN’S WORLD, Southpoint Editorial Cartoon (Southpoint, Vol.1No.5)
 

ZANORTE AVENUE, Southpoint Editorial Cartoon (Southpoint, Vol.1No.5)

*

 

SPECIAL PROJECT UNIT MIPAHIGAYON UG FISH SEEDING SA LUNGSOD SA SIRAWAI

Sirawai, Zamboanga del Norte— Ang Special Project Unit ubos sa buhatan sa gobernador ang mupahiga-yon ug fish seeding kon pagpanghagbong sa semilya sa isda  karong adlawa subay sa fish seeding sche-dule nga gisunod sa mga personahe sa Fisheries Division.  Kini ang nahipus nga kasayuran ning paman-talaan gikan ni Joseph Wilson Jatico, Chief of Ope-rations sa Office of the Provincial Veterinarian ug Special Project Unit.

Matud pa ni Jatico, alinsunod sa hagit ni Gobernador Rolando Yebes nga palambuon ang industrya sa pangisda dinhi sa probinsya ilabina sa kabukiran, ang Special Project Unit ubos sa pag-dumala ni Vicente Sanchez, Jr  ang mimugna ug schedule sa pagpang hagbong ug mga semilya sa isdang Tilapia para sa tanang dapit sa lalawigan nga adunay tuburan sa tubig tab-ang sama sa suba ug sapa. 20 mil ka mga semilya sa isdang Tilapia ang ihagbong sa Sirawai River aron kini makahatag unya ug dugang abot sa mga mangingisda ug dugang pagkaon sa ilang latad kan-anan didtong dapita.

Si Mayor Ceasar Soriano uban ni Vic Sanchez, Jr, Hepe sa Special Project Unit (nasalipdan sa mayor) ug sa miembro sa Fish Seeding Team sa probinsya ang mihagbong sa 20 mil ka mga semilya sa isdang Tilapia dfidto sa Communal Fish Ponds sa Barangay L. Micubo, Siocon sa milabay’ng semana. (Picture courtesy of Naian Bagatua)
 

Makita sa larawan si Mr. Francisco Loyloy, Fish Farm In-charge sa ZaNorte Agri-Ecotourism Park sa Upper Irasan, Roxas nga naghagbong sa mga semilya sa isdang Tilapia didto sa suba sa Dohinob, Roxas sayo ning semanaha. (Picture courtesy of Naian Bagatua)

Niadtong milabay’ng semana, ang Fish Seeding Team uban sa Veterinary Team sa probinsya ang naghimo sa hiniusang ser-bisyo sa pagpanghagbong ug 20 mil ka mga semilya sa isdang Tilapia ug paghatag ug serbisyo beterinaryo sa mga lungsud sa Siocon, Baliguian, ug Sirawai isip tipik sa maayong progra-mang beterinaryo ug pangisda ni Gobernador Yebes para sa lalawigan. Ang Veterinary Services miresulta sa pagpamakuna sa 112 ka mga baka, 20 ka mga kanding  ug 165 ka mga kabaw batok sa hemoragic septicemia ug pagpamakuna sa 117 ka mga iro batok sa rabies didto sa mga lungsud sa Siocon ug Sirawai. Aduna usay 116 ka mga baka, 20 ka mga kanding ug 167 ka mga kabaw ang napurga.

Sa lain bahin, aminado si Vicente Sanchez, Jr, sa usa ka exclusive interview ning pamantalaan, nga dili gayud sayon sulbaron ang suliran karon bahin na sa pag-pangisda sa mga Purse Seiner dinhi sa atong mga municipal waters kay pipila niini ang gipanag-iyahan sa mga ini-lang politiko sa nasud nga nagpanday sa atong nasud-nong balaudnon nga sila ra usab ang nagyatak. Uban usab niini ang gipanag-iyahan sa mga dagkong negosyante nga adunay hugot nga koneksyon sa mga dag-kong politico ug dagkong opisyales sa militar sa kaulohan. Kini ang nahipus nga kasayuran ning pamantalaan gikan ni Sanchez nga mikutlo usab sa kasayuran gikan mismo sa baba sa usa ka operations chief sa purse seiner nga niadtong tungura didto gaangkla sa baybayon sa Barangay Decolom, Lungsud sa Baliguian niadtong milabay’ng semana sa dihang siya uban sa team sa provincial fish wardens ang mimugna ug surprise surveillance sa kabaybayonan sa Triple SB. Apan gituhuan hinuon ni Sanchez nga kining maong problema ang mahatagan ra usab ug insaktong medyos pinaagi sa malinawon nga panagsabot-sabot tali na sa atong mga dagko ug nagpakabanang mga lideres, sama ni Gobernador Yebes, ug sa mga tag-iya sa mga Purse Seiners.

Atol sa maong interview, si Sanchez misugilon usab nga aduna siya’y gi-endorsar karon nga upat ka mga project concepts ngadto ni Gobernador Yebes nga iyang gituhuan nga makatabang kaayo sa atong mamuhiay ug hayop, ug mangingisda sa kabukiran ug kadagatan. Kung kini ang mahatagan ug konsiderasyon sa gober-nador, iya gilayon kining iimple-mentar sugod ning tuiga hangtud sa tuig 2010. Hinuon wala gibutyag ni Sanchez kung unsa kining maong mga konseptuha. Apan siya mipasalig nga makatabang kaayo ang maong mga project concepts dili lang sa atong mga mag-uuma ug mangingisda, kon dili sa administrasyon usab ni Gobernador Lando Yebes. (The New Nandau, Vol. XVII No.30)

*

 

Pulso Sa Katilingban
Cicer M. Binghay
“A snake in every grass”

“Into our lives a little rain must fall.”  Dili ikatingala ni PEDO BLUES Mr. Remelo Damuag nga nasanginlan nangilkil salapi kang Mr. Ernesto Tan, ang Mediatrix Home Developer nga nakaingon: “Duna koy ebedensiya.  Ug midugang, “nakasapi, nakahatag gyod ko.” Dili malalis nga sa atong kinabuhi naay mutolo ulan sa usa ka panahon.  Katungdanan ni Mr Damuag makakuryentig daghang tentasyon.  A haven of devil driven position ang pagka PEDO action officer.   Daghang lablbal motingal’g salapi nga mangiyawat sa pangyawaton.

Atong nahibaloan gipaka walay bali ni Mr. Tan ang pagpasakag kaso kang Mr. Damuag nga matod niya nakasapi, nakahatag gyod ko kay dili na man usab si Mr. Damuag mokihag libel batok kang Mr. Tan.  Pareho-parehas nga nagkasabot ang duroha. Dili usab ikatingala ni Gov. Lando Yebes nga sa usa ka administrasyon, pundok o kanang sultionon-kinaiyahan nga: “Sa matag bulig sa bunga sa lubi naay masagol buaNg.”  O “A snake in every grass.”  O mga lusa, kuyamad ug kuto sa buhok.  Little mayors ug little governors.

Husto ang gihimo ni Gov. Yebes pagtukod “immediate” task force nga mo imbestigar sa maong kontrobersiya pangilkil salapi sa PEDO action officer, aron masihag sa publiko ang labing tinuod niining tanan.  Aron usab makasugod dinhi atong gobernador nga dili tayupion pag-unay sa iyang mga pampararam o kaha kuha-kuhaan ang nagpakita diha sa iyang mga sinaligan nga nag-abusar tali pa sa mga gagmay’ng kawani sa lalawigan. Atong hinumdoman nga gisaway si Pres. Corazon Aquino maag adlaw sa mayoriayang katawhan gumikan sa mikabat subra sa 50 niya ka mga adviser nga nakahimog daghang mga bikil ug pangurakot sa katungdanan.  Nalay-ot dinhi si Pres. Aquino gumikan sa maong tayupio adviser o mga cabinet members nga nakabulabog sa iyang pangagamhanan.  Ang nakalay-ot niya kay walay siyay gihimong kalihokan pagpitol diha-diha sa misabotahi sa iyang administrasyon.

Nindot ang balita. Dipolog Medical Society (DMS) misaad pag suport sa ZaNorte Medical Center.  Mialayon ang ginsakopan sa maong kapunongan paghatag mga “suggestions” nga maipektibo ang bag-ong hospital sa lalawigan…dili lamang dinhi sa ato hangtod na sa tibook rehiyon 9.  Mipahibalo usab ang administrator sa bag-ong hospital nga daghan na ang mga doktor ang mipaila sa ilang pagka interesado makasulod sa bag-ong hospital. Matuman dinhi ang tingoha ni Gov. Lando Yebes nga ang ZaNorte Medical Center makasaka dihadiha ngadto sa pagka tertiary level.  Pagka karon ang maong hospital naa pa sa 2nd level.  Dugang atong nahibaloan nga dunay P100,000.00 salapi giandam alang ipamalit dugang ekipos alang sa hospital.

Dinhi kon makasulod na sa tertiary level ang ZaNorte Medical Center sa Sicayab ang katawhan sa dakbayan sa Dipolog makapahimulos pag-ayo sanglit sigon sa talaan sa mga pasyenti nga maoy nakasulod sa Zamboanga del Norte Integrated Provincial Hospital 50% ang taga dakbayan sa Dipolog. Mao baya nga niining tungora nga na dilatar mabuksan ang maong ZN Medical Center dili matabang ang gubol-gubol sa katawhan Dipolognon nga ang Mayor sa Dipolog hangtod karon wala pa mohatag sa Occupancy Permit.  Mao lagi igo na lang ang taga Dipolog taman sa gubol-gubol kay mayoriya dinhi maikag, manguknol, dili ka salita batok sa administrasyon sa dakbyan sa Dipolog dumikan sa nadawat nilang tagsa ka bulig salapi panahon sa piniliay.  Lagi basta pinalit, waya nay bili lingion pa.

Pero sigon sa DOH pwede mabuksan ang hospital sigon sa ilang assessment kon kini hayan maka alagad sa katawhan sa  maong kahimtang.  Ang gipasabot nga tinugot nila ang pagbukas sa  maong hospital kay ang gipangayo sa taga dakbayan sa Dipolog usa lamang ka ministerial “in nature” ug mahimong gamiton ang hospital aron makaalagad sa katawhan dungan usab sa paghimo sa gikinahanglang mga rekisitos nga dili makababag sa serbisyo sa  maayong panglawas. (Press Freedom, Vol. XX No. 16)

 
Credits: Press Freedom is published every Saturday and entered as 3rd class mail matter in Dipolog City. Printed by Young Printing Press with Editorial Office located at Upper Turno, Dipolog City. Tel. No. (065) 212-4343 or 212-6665

*

MORE NEWS NGA BINISAYA

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON