February 3, 2005

 Gov. Yebes nasuko sa pamahayag ni Sebastian
KAPITOLYO WALAY KATUNGOD NGA MAKAHILABOT SA DENR

Usa ka sakit nga insulto gitamparos sa dakong opisyal sa DENR batok sa Capitolyo atubangan sa gipamahayag niini nga walay katungod ang kagamhanang probinsyal sa pagpanghilabot ug paghingilin kanila human ang hunta probinsyal mideklarar sa upat ka mga personahe sa maong departamento nga “persona non grata,” butang nakapasilag ug nakapasuko ug samot ni Governor Rolando E. Yebes tungod kay nagpaila lamang nga wala silay gugma nga mapanalipdan ang bahandi sa kinaiyahan dinhi sa probinsya sa Zamboanga del Norte.

Si Rudy A. Sebastian, PENRO Forestry Specialist sa interview sa lokal radio station misumbalik dasdas batok sa Capitolyo atubangan sa gihimo niining dekla-rasyon nga sila mga ingrato. Matud ni Sebastian, ang pangagamhanang probinsyal walay hurisdiksyon sa pagpanghilabot kanila ilabi na nga ang ilang buhatan ilawom sa pagkontrolar ug super-bisyon nasyonal.

Sukad gipatuman ang devolution sa mga national agencies ngadto sa lokal nga pangagamhanan, ang DENR wala maapil busa dili sila matandog bisan pag unsay pagabuhaton sa lokal nga pangobiyerno. Matud ni Sebastian, samtang wala madevolved ang ilang ope-sina ngadto sa lokal nga pangagamhanan, ang ilang ulohang buhatan nasudnon maoy dunay direct supervision ngadto kanila busa mao lamang ang ilang paga-sundon.

Ang giluwatan nga pamahayag ni Sebastian nakapainat ug samot sa nagbokal na daang kalagot sa mga opisyal sa probinsya. Si Governor Rolando Yebes namahayag nga angayan gayud diay silang hinginlan tungod kay wala man nila batia ang pagpangga sama sa pag-pangga sa mga katawhan sa probinsya ang mga bahandi sa kinaiyahan dinhi sa Zamboanga del Norte. Gustong patun-an sa gobernador ngadto sa mga magbabalaod ang posibling pagpasaka ug kaso batok sa mga opisyal sa DENR nga misabotahe sa tinud-anay’ng kampanya sa gobiyerno batok sa illegal loggers.

“Puwedi pod silang (DENR) papahawaon sa property sa probinsya,” pero ang pagpalayas kanila estudyohan pa sa Sanguniang Panlalawigan, nagkanayon si Yebes. Giangkon ni Governor Yebes nga gisakitan siya ug maayo sa gisulti ni Rudy Sebastian sa dihang gi-interview kini sa lokal radio dinhi sa Dipolog. Murag gipasabot ni Sebastian nga sila sa DENR independente nga opesina nga dili mahilabtan sa lokal nga pangagamhanan nga bisag unsay mahitabo sa probinsya wala silay pakialam kay ang ilang rehiyonal nga buhatan adto lamang manubag sa ilang sekretaryo.

“Mao diay nang nagkagi-wang-giwang na ang atong mga kagulangan ug kalasa-ngan dinhi sa atong probinsya kay mao mana ang panan-aw sa mga opisyales sa DENR nga dili sila mosunod ug motuo sa mando sa atong probinsya, “basta kon unsay gusto nilang buhaton, sakto ang ilang gibuhat,” nagkanayon si Yebes nga miprangka sa iyang gibating kasuko sa pamahayag ni Sebastian. Matud ni Yebes gipa-dalhan siyag sulat sa DENR nga nanghunaw sa katungod sa probinsya nga maka-hilabot sukad gi-decentralise ang mga buhatan nasyonal. “Akong gipatun-an sa akong abogado ang maong sulat sa DENR.”

Gipahayag ni Yebes nga pinangga sa mga katawhan ang yutang natawhan dinhi sa probinsya sa Zamboanga del Norte, “kon ingon niana nga klaseng panan-aw ang panerbisyo aning mga tawhana, magsangka dyud ta kay ang akong gusto, magkahiusa unta ug mo-cooperar alang sa kaayohan sa tanan nagpakita man nga sila sa DENR maoy hari sa atong probinsya, pamahayag pa ni Governor Yebes. Tungod kay sila sa DENR ilawom sa national government dili na matandog ug mahilabtan sa probinsya, gipahayag sa gobernador nga “dili na mao…dili mi under ninyo, dili sad mi magpa under ninyo gumikan kay kini bahandi sa kinaiyahan sa Zamboanga del Norte amo kining ampingan.” Dugang pa ni Yebes, porke sila sa DENR ilawom sa national government, sila maoy magbuot sa atong pro-binsya?

Prangka gisulti ni Yebes nga dili siya mahangol sa serbisyo sa DENR kon ingon niini ang ilang panan-aw. “Puwedi pod wala nami DENR, kami nalang dinhi sa probinsya. Ang amo lang mapanalipdan ang katungod sa probinsya. Hulaton ni Governor Yebes kon unsay luwatang aksiyon sa Sanguniang Panlalawigan alang sa posibling pagpasaka niya ug kaso batok sa nasangpit nga mga opisyal. Matud niya, gikinahanglan niya ang resolusyon sa hunta probinsyal,  “ and I wanted to study carefully, every aspect of the case because the province has all the rights to enforce the law with regards of illegal logging and illegal cutting of trees of the province.” Dugang pa ni Yebes nga dili siya gusto nga ibaliwala lamang niining mga tawhana (DENR) ang katungod sa probinsya.

Gipahayag ni Governor Yebes nga sa panahon nga madawat na niya ang kopya sa resolusyon sa Sanguniang Panlalawigan nga nagdek-larar nga persona non grata ang upat ka opisyal sa DENR, iya kining i-personal ug dunol kang PGMA o kaha kang Natural Resources Sec. Mike Defensor. “Ba-hala na ug kinsa akong ma-kontra ako gyud nang dad-on sa Manila kay kini maoy prinsipyo sa akong liderato.” Gipahayag ni Board Member Cedric Adriatico nga iyang tug-anan sila si Vice Governor Francis Olvis ug Majority Floor Leader Uldarico Mejorada bahin sa laraw ni Governor Yebes nga pasakaan ug kaso ang mga personahe sa DENR nga nagkinahang ug resolusyon gikan sa Sanguniang Panlalawigan. (The New Nandau, Vol. XIV No. 36)

*

 2005 BUDGET SA DIPOLOG, APROBADO NA

Giaprobahan na kagahapong adlawa, Enero 27 sa diha sa gipahigayong Special Session sa Sangguniang Panlungsod sa Dipolog ang budget sa dakbayan sa Dipolog alang ning tuig 2005.

Ang Appropriation Ordinance nga naggahin ug pundo nga P374,636,700.00 alang sa operasyon sa kagamhanang lokal sa Dipolog gikan sa Enero 1 hangtud sa Disyembre 31, 2005,  gipangamahanan ni Konsehal Romulo Soliva, ang Chairman sa Committee on Appropriation and Finance sa Sangguniang Panlungsod.

Sa kabahin ni Mayor Roberto Y. Uy, siya nagpasalamat nga naaprobahan na ang budget karong tuiga tungod kay aduna nay pundo nga magamit diha  sa pag-implementar sa mga nagkalain-laing proyekto  ug mga programa dinhi sa dakbayan nga gihan-ay alang karong tuiga aron usab nga kapahimuslan sa katawhan .  (Dipolog CIO Press Release, lbt)

*

 Atraso ni Amatong gipahid ni Yebes?

Nasentro karon sa seryusong pagsaway sa mga katawhan sa barangay Datagan, Gutalac, ang media ni Amatong gumikan sa pagpahid na usab niini sa administrasyon sa kapitolyo sa kahiwi-an nga mugna ra mismo sa milabay’ng administrasyon. Kasaligang tinobdan gikan sa maong dapit mi konpirmar nga ang katawhan sa barangay Patagan nadismaya pag-ayo tungod sa grabing pagpangdaut gitagawtaw sa usa ka announcer sa radyo nga gipanag-iyahan sa Amatong batok ni Gov. Rolando Yebes ug 3^rd Congressional District representative Cesar Jalosjos.

Gipasanginlan nila si Gov. Yebes ug Congressman Jalosjos nga maoy misugo nga hakuton ang mga materyales nga gamiton unta pagtukod sa usa ka barangay Hall didto sa barangay Datagan. Ang maong prohekto gisugdan sa administrasyon ni Amatong ug nahiabot ang mga materyales pipila ka semana sa wala pa ang eleksyon apan dihang miabot ang pinili-ay ug naparot si Amatong sa maong dapit, matud sa tinobdan, natingala na lang ang mga opisyales ug mga lumolupyo sa Datagan gumikan kay gihakot man sa dump truck nga puti nga gipanag-iyahan sa probinsya ang maong mga materyales ug wala gyod masugdig trabaho.

Si Peter Mandag, kanhi opisyal sa maong barangay mipahayag nga natingala sila ug dako nganong gipa-pulllout ni Amatong ang maong mga materyales ug nagduda sila nga hayan bunga na kini sa kasuko niya gumikan sa iyang pagkaparot ug ni kanhi Cong. Angel Carloto sa maong barangay sa niaging election. Apan karong bag-o, dako na lang ang kahangaha sa katawhan sa Datagan gumikan sa dakong bakak nga gisabwag sa media ni Amatong dihang sumala pa, si Gov. Yebes ug  Cong. Jalosjos mao na man hinuon ang gipasanginlan nga misugo pagpakuha sa maong mga materyales.

Matud sa tinobdan ang pagpa-fallout ni Amatong sa maong mga materyales maoy nakahaling ug kasuko sa katawhan nganong giamong niini sa iyang kasuko sa kapildihan ang usa ka prohekto nga gitagana sa alang sa katawhan sa maong dapit. Misamot ang kalagot nga ilang gibati, dugang sa tinobdan, dihang ning bag-o lang, si Gov. Yebes ug Congressman Jalosjos mao na man nuon ang gipasanginlan nga misugo paghakot sa maong mga materyales.

Sumala pa niya, gihilasan kaayo ang mga tawo nga nakadungog sa sibya sa usa ka anouncer sa radyo ni Amatong nga gi hook-up usab sa usa ka lokal nga estasyon didto sa Labason dihang dungan sa pagluwat ug binastos nga mga pulong sa kahanginan, mipasangil ni Yebes ug Jalosjos sa maong dakong bakak. Samtang sa susamang kalambo-an, laing prohekto usab ang gibawi-an ni Amatong ug mga materyales human sa iyang pagkaparot sa eleksyon sa usa ka barangay didto sa Lungsod sa Roxas.

Si OIC Provincial Engr. Ramon Ochotorena mikonpirmar nga nalangan ang paghuman sa 1-unit 2 classroom modified standard nga school building didto sa barangay Tanayan, Roxas, gumikan kay nangawala ang mga materyales niini. Ang maong prohekto gisugdan pagtukod niadtong 2003 apan nagpabilin kini nga kalabira hangtud nga gibiya-an ni Amatong human sa iyang pagkaparot.

Gipahayag ni Ochotorena nga sagad ang susamang mga prohekto tapuson ra unta sa 90 ka adlaw apan gumikan sa pagka wala sa mga materyales niini, nalangan ang pagtrabaho gumikan kay ila pa kining gihimo-an ug pag inbentaryo aron pag-recover niini. Hinuon ang maong prohekto gitapos gihapon sa administrasyon ni Gov. Yebes ug na turn-over na kini niadtong Meyerkules sa hapon. (Mindanao Star, Vol. I No.7)

*

 Mga Opisyal sa DENR Persona Non Grata na –SP

Deklarado na sa Sangguniang Panlalawigan ang upat ka mga opisyal sa Department of Environment and Natural Resources kun DENR apil na ang Operations Manager sa higanting kompaniya sa logging, isip mga persona non grata, kon mga tawo nga wala na kinahanglana dinhi sa lalawigan sa Zamboanga del Norte. Sa flying session sa hunta probinsiyal niadtong Lunes Enero 24, 2005 didto sa lungsod sa Manukan, gipinalisar sa mga bokal ang maong aksiyon aron mapadayag sa katawhan sa Zamboanga del Norte nga sinsiro gayud ang kasamtangang administrasyon ni Governor Rolando E. Yebes sa iyang mga panaad ug programa kalabut na sa hingpit nga pagprotiher sa atong kina-iyahan ilabi na sa nahibling kalasangan sa probinsiya didto sa Triple SB.

Sila si DENR Regional Executive Director Imanuel Penafiel, Penro Rodolfo Aradanas, Penro Forest Specialist Rudy Sebastian, Cenro Salajudin Caing sa Siocon, ug Mr. Rudy Cabuay ang Operations Manager sa Dacon Logging Company gitumbok karon sa mga magbabalaod mga walay pulos ug walay luna dinhi sa atong lalawigan. Lima ka punto ang gibasihan sa mga bokales dinha sa pagpanday sa maong resolution.

Una; kapakyas sa DENR Regional Office sa pagpangulo ni RED Penafiel ug Penro Rodolfo Aradanas paghatag sa SP Committee on Environment and Natural Resources sa kopya sa Integrated Aannual Operation Plan (IOAP) bisan pa man sa hangyo sa mga magbalaod sa probinsiya.

Ika duha: walay bisan usa ka pesonahe sa maong ahensiya dinha sa scaling station sa logging road sud sa IFMA 34 sa lungsod sa Baliguian dihang ang mga miembro sa comitiba mihimo sa usa ka ocular inspection niadtong Agusto 15, 2004 bisan pa man nga kanunay milabay niini ang mga logging trucks sa Dacon nga kargado na sa mga troso. Gawas pa gibabagan pa sa mga Dacon guards ang mga bokal nga buot untang mosulod sa ilang cutting area.

Ika tulo: taliwala sa giluwatang suspension order ni Secretary Mike Defensor penetsahan Disyembre 8, 2004, apan ang SODACO/DACON gitugutan pa gihapon sa pagtrasportar sa ilang mga troso pinasikad sa usa ka Memorandum nga giluwatan ni Undersecretary Ramon Paje. Ang maong insidente nahitabu tungod ra usab sa paborabling rekomendasyon mismo ni RED Penafiel ug Penro Aradanas.

Ika upat; walay bisan usa ka peronahe sa Denr dinhi Penro ug Cenro Siocon ang miuban sa mga miembro sa Task Force Kalasangan sa pagpangulo ni Gov. Yebes ug Vice Gov. Olvis, Congressman Cesar Jalosjos, mga bokales kauban ang mga representante sa NGOs sa pagpangulo ni Mnsr. Jose Manguiran didto sa SB area niadtong Enero 10-11, 2005. Kini bisan pa man sa pasalig ni Forest Specialist Rudy Sebastian sa Task Force atoll sa close door briefing pipila ka adlaw sa wala pa ang ocular inspection nga dili mahilabtan ang mga troso nga atoa na gistock sa Dacon Log Pond sa Sirawai apan sa pag abot sagropo walay bisan usa niini ang nahibilin. Nasayran na lamang nga gipaspasan paghakot ang mga troso padulong sa Zamboanga City usa ka adlaw sa wala pa moabot ang Task Force.

Ika lima: gihingusgan sa mga magbalaod sa probinsiya sila si RED Penafiel, Penro Aradanas, Forester Sebastian,Cenro Caing kakumsabo gayud sa Dacon ug nga ang ubang IFMA holders misabotahe sa  paningkamut sa liderato sa lalawigan dinha sa pagprotiher sa atong kalasangan. Inay ialng protektahan ang interes sa kagamhanan, interes sa Dacon na hinuoy ilang giprotektahan ug gidepensahan.

Sa kabahin ni bokal Atty. Uldarico “Ric” Mejorada, sa maong deklarasyon sa Sangguniang Panlalawigan dayag lamang nga silang mga opisyal sa DENR dili welcome dinhi sa atong probinsiya.

Midugang pa ang bokal, kung dili mo-action si DENR Sec. Mike Defensor pagpapahawa sa maong mga opsiyal gikan dinhi sa Zamboanga del Norte, mibahad ang bokal hayan ug adunay posibilidad ilang suportahan ang tinguha ni Obispo Manguiran ug sa uban pang ka-obispohan sa nasud hangyoon si Presidente Gloria Macapagal Arroyo i-abolish sa hingpit ang DENR (Mindanao Star, Vol. I No.7)

*

  joint committee hearing Giaprobahan resolusyon sa CDC

Giaprobahan sa gipahigayon joint committee hearing sa Sangguniang Panlungsod kagahapon, Enero 27 ang resolusyon sa City Development Council nga mao ang “resolution reverting the balances of continuing appropriation of the prior years to the un-appropriated balance and re-appropriate the same for subsidy to General Fund Proper in the amount of P21,470.484.23.

Si Konsehal Romulo Soliva, ang chairman sa Committee on Appropriation and Finance sa Sangguniang Panlungsod mao ang mipadas-ug sa resolusyon  nga nag-concur sa CDC resolution 2005-01 nga nadasunan pinaagi sa mayoryang boto human sa gipahigayong division of the house diin si Konsehal Peter Co maoy nag-inusarang mipaabot sa iyang pagsupak niini nga resolusyon  samtang upat ang mipaabot sa ilang pag-uyon nga naglakip nila ni  Konsehal Julius Napigquit, Konsehal Ricky Mejorada, konsehal  Alton Ratificar ug ikaupat si Konsehal Soliva.

Ang nasangpit nga CDC resolution maoy usa sa mga mahinungdanong dokumento nga gamitong basihanan sa tinguha ni Mayor Roberto Uy ug sa mga membro sa Sangguniang Panlungsod nga mahatag ang extra cash gift sa mga kawani sa kagamhananang lokal sa Dipolog nga dugay na usab nga gihandum sa tanan. (Dipolog CIO Press Release, lbt)

*

  Hotlogs Nadakpan sa Manukan Police

Gi-impound karon ang usa ka Fuso Cargo Truck didto sa Manukan Police Station human nasigpatan sa mga membro sa kapolisan pinanguluhan ni Police Senior Inspector Glenn Macario Dulawan ang hepe sa maong lungsod. Kargado sa kahoy’ng Falcata ang Cargo Truck nga naghupot sa plaka numero CFJ-624 color yellow ug nakarehistro sa Mindanao State Timber Corp. kon MSTC didto sa brgy. Calatunan, Sindangan ning lalawigan.

Sigun sa imbestigasyon nga gi-mugna sa Manukan Police nga ang naasoy’ng Cargo Truck ang gimaneho kini sa usa ka Benjamin Tamao Y Tanico, 42 anyos residente sa brgy. Ramon Magsaysay sa lungsod sa Sindangan. Mokabat sa 268 ka mga kahoy’ng Falcata sa 33.32 cubic metros ang sukod sa maong mga kahoy ug gipanag-iyahan sa usa ka Rodelio Pagente, lumulopyo sa brgy. Sinaad, Sapangdalaga Misamis Occidental.

Matud pa sa kapolisan nga ang maong kahoy’ng Falcata ang napalit na kini sa Mindanao State Timber Corp. apan walay marepresentar nga mga documento alang na sa pag hupot niining naasoy’ng mga kahoy. Samtang ang maong kaso ang gi-refer pa kini ni Mr. Rodolfo Aradanan ang PENRO Officer ning dakbayan alang na sa dugang imbestigasyon. (Sam, Mindanao Star, Vol. I No.7)

*

Human angkuna sa hepe sa kapolisan sa dakbayan sa Dapitan nga si Senior Inspector Dvin Ceriales nga sila ang "maglisud ug punting kung si kinsa ang mamumuno sa barangay kapitan sa barangay Putongan sa ilang dakbayan tungod kay kini ang ubay ubay na ang naani nga mga kontra", daw gibarugan gayud niini ang ka-inutil sa ilang kwerpo sa pagsulbad sa kaso human kini ang karong bag-o ang miangkon na usab nga hangtud karon, wala pa gihapo'y nasagap nga lead ang ilang kwerpo sa maong kamatayon.

Ang maong pag-angkon ni Ceriales sa "update" o ang "kawad-on sa update” sa maong murder case ang nakapasubo sa pamilyang Garcia kinsa  nagtuo karon nga may "naglimin nga misteryo sa kabugnaw nga gipakita sa maong hepe sa iyang mga pamahayag sa interes nga sundan ang kaso sa maong kapitan." Kahinumduman nga si Barangay Captain Nimrod "Buboy" Garcia kinsa usab kasamtangang bise presidente sa Dapitan City Liga ng mga Barangay, ang giluthang patay sa duruha ka mga wala milhing mga tawo atul sa pagsitar niini didto na sa checkpoint nga gipatigayon niini sa Martes  sa gabii sa iyang barangay.

Mga testigos sa maong insedente ang namahayag nga ang duruha ka mga tawo ang unang mipatigayon ug usa ka "U-TURN" diha mismo sa eskina diin nagpahigayon ug check point ang maong kapitan kuyog sa mga tanod niini ginamit ang XRM nga motorsiklo sa wala pa kini mi-parking sa atbang sa maong checkpoint dapit sa usa ka Video-K house didto. Dugang sa mga testigos nga ang maong "maneuver" sa duruha ka mga suspetsado ang gibuhat aron sa pagtino kung atua ba sa maong checkpoint ang kapitan isip "reconnaisance operation" rason nga nakapamugna karon sa pagtuo nga mga "professional guns" ang maong mga assailants.

Ang maong maneuver usab ang hinoon nakapapikal sa kapitan kinsa daling misakay sa iyang motorsiklo aron gukdon ang mga suspetsado ug aron iyang babagan ang dalan niini sa wala pa niya kini sukna-a sa ilang mga tuyo nganong mihunong kini atbang sa Video-K House nga kini ang sirado na man niadtong higayuna. "Mag-unsa man mo dinhi nga sirado na man nang Vidoe-K?" pagsumay pa sa mga testigos nga gipamulong sa Kapitan didto na sa mga suspetsado.

Dugang asuy sa mga testigos nga ang usa sa duruha ka mga suspetsado ang mikanaog gilayon sa iyang pag-'backride' sa motorsiklo human sa maong pagsukna, ug milanit sa iyang Cal. 45 nga pistola dayong tion-pusil sa maong kapitan nga bag-o lang usab ni-aksyon sa pagkawas sa gisakyan niining motorsiklo. Dugang sa mga  testigos nga ang pagkaigo sa kapitan ang nakapapulak niini sa iyang pagkalingkod sa motorsiklo apan kini ang giduulan pa sa maong gunman aron sa pagpabuto na usab niini nga naka-igo matud pa sa apapangig.

Dugang sa mga testigos nga human sa maong hitabo, ang gunman ang mibalik ug backride sa ilang motorsiklo gu mipaturatoy ug dagan padulong sa direction sa Barangay Barcelona. Dugang asuy niini nga atul sa maong hitaboi duruha ka mga miembro sa Dapitan Police ang didto sa nadaut niining sakyanan mga 100 metros gikan sa maong nahitabuan.

Hinoon bisan pa man sa pagpakabati sa mga buto sa maong mga pulis, sila ang matud pa sa mga testigos ang wala ma-alarma ug mohatag sa ilang pagresponde sa pagtuong ang kapitan mismo ang nagpabuto sa iyang pusil niadtong higayuna. "Abi man namo ug si Kapitan ra sad ang nagpabuto busa wala mi mo-responde," panapos pagsumay sa testigos dinhi nga mao'y gipamulong sa maong mga miembro sa kapolisan atul niadtong mga higayuna. (Tingog PENINSULA, Vol. X No. 12)

*

   Saksak-sinagol
“Mga sinahan nga mga simang”

Kadali ug hilabihan katulin ang dagan sa atong panahon karon no mga migo ug miga? Tiaw mo na karon hinapos na sa unang buwan pa lamang ning tuig 2005 nya sunod semana ika-duhang buwan na dayun. Niadtong nakalabayng semana atong gisak-sak ang issue batok sa duruha ka mga Simang sa Kahanginan nga wa gyud intawoy uwaw naghugaw-hugaw sa atong kahanginan karon.

Ambot bitaw ning mga tawhana, nganong wa man gyud maka-ako ang ilang amo nga bisan makabadlong nalang unta ni makapahinumdum kanila nga way luna dinha sa pagpanibya sa kahanginan kanang mga bastos walay pulos ug ginama-gama nga mga isyu. Lantawa ra gud nang ilang mga magsisibya diha, gawas nga mga Simang, sa hitsura pa lang, wa jud! Apiks kaayo no, hehehehe.

Apike pas hitsura nya hilabihan pa jud kabastos ug hugaw kaayo manulti klaro lang jud kaayo nga mga walay modo ug walay klarong edukasyon. Kining mga tawhana mga migo ug miga sayud na ta daan sukad pa kaniadto nga wa jud ni silay makitang maayo sa dagan atong panggobierno karon ilabi na dinha sa kapitolyo. Dili ba kung atong hinumduman, wa pa gani mahimong kandidato ang atong gobernador nga si Gob Lando gidungog-dungog pa lang nga molansar gi-ayo na nilag lusak. Gipersonal nilag ataki, gikulamos pag-ayo bisan ang pamilya sa gobernador wala nila palabya gi-apil pagdaut. Halata na kaayo ang ilang mga lakang ug direksiyon kaniadto pa, klaro ba nga hadlok sila nga makontrahan ang ilang amo nga ilang gipaka-santos. He.he.he….resulta di pilde man jud si opaw tungod ra pod nila. bwaaaaaah. Misamut na jud ni sila karon kay way adlaw ilang gipalabay, mga tirada ang kapitolyo wala nila paikyasa.

Buot nilang isilsil sa alimpatakan sa atong katawhan dinhi sa lalawigan nga ang kapitolyo karon gigamhan na sa mga tawo nga walay laing tuyo mao ra ang kaugalingong interes. Tanang lihuk sa kagamhanang probinsiyal ilang gisunod-sunod apan bali ang ilang pagplastar sa impormasyon nga ilang gisabwag aron lang ipatuo sa katawhan nga walay klarong direksiyon ang dagan sa bag-ong administrasyon. Unsa kahay pagtuo ning mga tawhana no mga migo ug miga, kadto diay ilang amo kaniadto nga maoy mikupot pa sa kapitolyo ginoo na jud to?  Nahimuot na sab ta karong semanaha mga migo ug miga dihang atong mga higala misugilon kanato nga kita na pod diay kuno ilang gipuntariya sa ilang mga walay pulos nga birada.

Atong papel ilang ginganlan sa bisan unsa na lang intawon, gani gihimo pa ta nilang putos buwad kun PB kuno. Pasumbingay pa ning usa ka Simang nga apike sa iyang mata, nakabasa ra kuno siya sa atong gula niadtong nakalabay pang semana tungod kay giputos ra intawon ang atong papel sa buwad nga iyang napalit sa merkado. Unsa to? Nakabasa diay ka migo? Giunsa kaha nimo pagbasa no nga ikaw na mismo aminado nga apike man kaayo imong panglantaw.   

Gamit man gani ka sa imong nagbugdol nga ANTIYOHOS diha kay sa layo dili na ka klaro nya nakabasa pa jud ka? Bwaaaah. Pastilan nimo migo, karaaaaaaan na kaayo nang imong storya. Ayaw na lag lihay diha kay klaro man jud nga mituyo kag palit sa MS o dili ba gihatagan kag kopya kay gisultihan ka man nga ikaw maoy gipasabtan.

Mangutana ka kung kinsay nagsulti namo? Hehehe ayaw na lang kay basin sa imong mga kauban diha ikaw magduda na hinuon. Bwaaaaaahh Sa mga walay direction nga tirada aning Simang mga migo ug miga, bisan si Mr. Roney Pacilan nga maoy pangulo diha sa Provincial Information Center iya napong gitirahan kay lagi kuno migamit sa mga propredad sa provincial government, ang computer sa PIC ug kuryente sa opisina aron lang I-layout atong papel. Diha kuno ta maggama sa atong mga gula matag semana sa PIC. Bwaaaaah. Wa kaha ka malipong….dayag lang jud kaayo nga di diay ka maantigong moverify sa imong mga impormasyon. Gawas nga dili ka klaro sa imong panglantaw, basin seguro no dili ka kaklaro sa imong pagdungog sa mga hulhog sa imong mga informer. Hehehehe. Doble na diay nang imoa migo?  Bwaaaahhh

Tambag namo nimo Simang, sa sunod gani ayha ka mongal-ngal sa imong baba, klaroha jud pagpaminaw. Kung tagaan kag dokumento, klaroha pod pagbasa nya gamiti jud sa dakuuuuu ug bagaaaa kaayong grado sa imong ANTIYOHOS aron imong maseguro. Wa pod intawon kaeskapo atong editor mga migo ug miga kay iya pa ganing gibaharan nga utingkayun kuno ang pagkatawo. Dili kuno siya katuo nga gikan sa RMN ang atong editor mopahuway na trabaho sa media. Wa ka malipong diha? Bisan kinabuhi sa ubang tawo imo pang but-an. Ikaw lagi Simang, namo ba kadto nga samtang gikan ka sa RMN kaniadto kay klaro man jud nga dili ka kaagwanta sa unsay matuod nga trabaho sa radyo, dili ba miundang ka man sad aron lang mag drive ug sikad? Nya nganong karon miundang ka man pagdive ug sikad ug balik na sad ka sa radyo. Ngano man? Dili napod ka kaagwanta ug drive sa sikad kay balik ka man lagi. Baga na seguro ug kubal nang imong sampot no kay undang man kag drive… bwaaaaah    Susss… migo unaha usa pag-utingkay imong kinabuhi ug imong pagkatawo kay basin sa imong ngal-ngal maunay ka sa imong tari.

Unsa to? Ang atong editor kuno mga migo ug miga dili siya katuo nga mopahuway na sa trabaho sa media human kini mihawa sa RMN. Iyang gingal-ngal mga migo ug miga nga kuno ang atong editor gitaktak sa management sa Radio Mindanao Network. Bwaaaaaaaaaaaaaaaah. Tambag namo nimo Simang, adtoa ang RMN pangutan-a si Edgar Sorronda nga maoy ilang OIC aron isagpa nimo ang kopya sa gipirmahan sa atong editor pag-avail sa Retrenchment Program nga gitanyag sa kompaniya. Bwaaaaaaaaaah (Mindanao Star, Vol. I No.7)

*

Unsa, makig-away ug Huwes?

Bisan sa pagpanindog sa mga balhibo sa pipila nga gihilasan kaayong naminaw sa aw-aw ni Mr. Tinudloan alyas MA nga Murag Amaw, gibahakhak na lang kini sa uban dihang pwerte kunong pangugat ni Tinudlaon MA nga kasuhan niyag administratibo ang piskaliya. Ang iyang aw-aw nagsentro sa resolusyon sa kasong libelo nga gipasaka ni BM Mejorada batok niya. Tiaw mo na, naghisgut na pod ug balaod. Kay lagi wala kuno siya taga-i ug kopya, ang iya rang abogado, giusig dayon niya ang piskaliya sa Dipolog. Nanghambog pa nga dili kuno siya mahadlok makig-away bisan pag huwes. Kay kinsa man pod diay’ng huwesa ang turtogok nga managinot niya???? Nasuko siya nganong wala kuno siya taga-ig kopya sa resolusyon nga klaro man unta kuno kaayo ang iyang residence nga nakabutang sa iyang mga tubag. Dunay nangutana “ Asang residensyaha ato, kadtong iyang balong-balong nga naa sa karsada sa Sta. Isabel?” Dunay nanaghap nga basin wala padal-ig kopya sa piskal kay nangiskwat man gud kaha na siya anang luna sa karsada iyang giarokag payag, mahulog unya ang piskaliya ug konsentidor sa iyang pagpangiskwat.Na di gyod mi palabot ana Tinudloan. Kon wala ka mauwaw sa imong aw-aw, hala hikyari na sila sa imong resibo pagbayad nimog buhis anang imong gipuy-an parang mawala ang LAMA SA DUDA. Kon wala kay ikapakita, disgrasya! mas maayo pa unya nimo ang mga BAJAO kay magbalhin-balhin pa, Hehehehehehe!!!!

----------------------------------

  Nagpadayon ang pagsaway ni Tinudloan sa mga programa karon sa kapitolyo. Unya ra ba magpatuo dayon nga siya ra gyoy limpyo ug way gidapigan. Manaway dayon sa ubang mga sakop sa media kay torotot kuno sa kapitolyo ug way delicadeza kay di gyod mosaway. Wa ka kuyapi diha Tinudloan? Karon na lang ka mosiyagit ana nga pildi na imong agalong opaw nga murag inyong gipaka-ginoo sauna? Tan-awa ra gud, natikluhod intawon ang bag-ong administrasyon gumikan kay ang mga ekipos nga gipamalit sa imong amo nga opaw halos guba tanan kay surplus kuno ang gipamalit ug mga dauton pa. Wa man lagi nimo usiga si opaw sauna? Giataki pod kuno nimo ang mantalaang MS kay puro Yebes ang balita. Gidanggaan pa kuno nimog PB, Putos Bulad. Ang MO sauna nga way gawas ug way hulagway sa opaw nga nagkalo nga mapatik sa front page wa gyud nimo kurtihi. Intawon pod.Mamahid na ka ron sa inyong kolor? Nganong maayo man kaayo kang mo silip ron sa kapitolyo ug buhat-buhatan dayon nimog bikil? Sauna nga imo pang amo nga opaw nagtungkawo diha nagpa bulhog-bulhog ra man kuno ka sa tinuod gyod nga mga bikil.Dunay suki namo sa hantakan ay, niingon nga ikaw kunoy maayong danggaan ug PB, Pahong-pahong nga Bulhog. Hehehehe!!! Pero kami diri sa Hantakan wala gyod mi mikubit anang mao nga sugyot kay personal na man gud na. Pinannga gud ka namo. Wala ra nuon mi maliwat nimo nga maoy hilig kaayong mamersonal.

----------------------------------

Nia poy burot ug nawong nga pansit cantone pwerte pod kunong langgisa sa tingog nga nagpunay’g singgit-singgit anang pulong suringew sa iyang peryahan, aw programa diay. Gipasanginlin niya si Gov. Yebes ug Cong. Jalosjos nga nanugo kuno nga kuhaon ang mga materyales sa tukoronon nga bangaray hall sa Datagan, Gutalac. Pero ang tinuod diay, nag-alburoto nag maayo ang mga tawo didto kay bakak diay kaayo ang gisangyaw ni suringew cantone kay ang tinuod diay, si Amatong kunoy nagpa-fallout sa maong mga materyales kay basin nasuko dagway nga napildi sila didto ag sa eleksyon. Tan-awa lagi! Gisugnoran lang gyod ni suringew ang kasuko sa mga tawo didto. Wa gyod kwentaha nga ang tanan adto mobanda sa ilang amo. Hayyyyyyyyy, kanus-a pa kaha makasabot ning mga tawhana nga gigamit ra diay sila. Unya ra dagway ni sila makahibalo ug sipa-on na sa mga nagpaluyo nila kay nagdungan nag kalaglag ilang kredibilidad. Aw, nuon, dunot man pod daan. Hasta ang nagpaluyo nila wa pod kasabot nga hasta sila nanganso nag apil sa binastos aning ilang mga aw-aw. Pagkawalaaaaa gyoy mapili aning mga hanggaw, maayo rang PAKUGON. (The New Nandau, Vol. XIV No. 36)

*

LARAWANBALITA

MORE NEWS NGA BINISAYA