January 28, 2008

 

Jail Break sa Provincial Jail
7 BINILANGGO NAKAPUGA

Pito ka mga binilanggo sa Correctional and Rehabilitation Center sa Provincial Jail sa Don Jose Aguire, Manukan ang nakapuga niadtung Miyerkules sa sayong kaadlawon sa dihang wala makabantay ang mga Jail Guard ‘on duty’ nga nangambak na kini sa likod nga bahin sa ilang selda human nila maablihan ang barrel volt sa ilang pultahan. Si Provincial Jail Warden Fortunato Regañon sa interview sa The New Nandau Today mikon-permar nga pito ka mga piniriso nga pulos nag-atubang ug dagkong kaso ang naka-eskapo gikan sa ilang selda.

Ang maong mga binilanggo didto gikorong sa bag-ong naturn-over nga building sa ibabaw nga bahin sa bungtod diin nahimutang ang duha ka mga selda, ang selda Uno ug selda Dos. Ang mga escapee didto gitangkal sa selda dos kauban ang 79 ka mga binilanggo. Matud ni Regañon, gibanabana alas kuatro sa kaadlawon nahibaw-an sa iyang mga guwardiya nga nakapoga ang pito ka mga piniriso.

Giila ang mga binilanggo nga nakapoga nga sila si Maximo Mercado, nag-atubang ug kasong Acts of Lacsiviousnes, Sonny Leaño, nag-atubang ug kasong pagpanulis, Sultan Roel, nag-atubang sa kasong tulis, Ramos Jovencio, nag-atubang ug kasong pag-panulis, Guphy Siman y Gutiera, nag-atubang ug kasong carnapping, Jovanie Abrinica, nag-atubang ug kasong statutory rape, ug Piofe Cating, nag-atubang ug kasong pag-panulis. Matud pa ni Regañon, naka-eskapo ang pito ka mga binilanggo tungod kay mobo ang puthaw nga lock nga barrel volt sa pultahan nga igo lamang mida-etol sa lungag nga semento hinungdan nga sayon ra kaayong giligwat ang pultahan hinungdan nga naabli.

Mao kini ang barrel volt nga igo lamang nida-itol sa lungag sa semento hinungdan nga dali rang naabli.

Ang pito ka mga binilanggo didto mikatkat sa taas nga dingding nga semento gamit ang gipatong-patong nga galon ug lingkoranan, giwi-wi ug gibingat ang bolb wire nga tunokon ug didto miambak sa likod nga bahin sa ilang selda dayon ikyas palayo sa maong dapit. Duda si Regañon nga giplano nang daan sa mga binilanggo ang ilang paglayas gumikan kay ilang gipahimudsan ang higayon nga mibundak ang ulan hinungdan nga wala mabantaye sa jail guard on duty.

Ang bag-ong building nga may duha ka selda dunay sulod nga mosubra dosyentos ka mga piniriso diin kasagaran niini gikan gibalhin sa Misok, Sindangan samtang nagagikan ang maong pito ka mga escapee. Matud ni Regañon, gibalhin ang mga piniriso sa Misok, Sindangan diha sa Don Jose Aguire tungod kay gawas nga dako ug gasto sa gasolina sa kalayo sa ilang biyahe gikan sa Sindangan paingon sa Bulwagan ng Katarungan dinhi sa Dipolog aron pag-aten sa hearing sa ilang kaso, risgo pa gayud sa kabahin sa guwardiya hinungdan nga kini gibalhin sa duol-duol nga dapit. Ang bag-ong building nga may duha ka selda dunay upat ka mga guardiya, duha niini mag-relibo matag upat ka oras. Atol sa ilang duty, ang guwardiya anaa sa gawas mag-roving sa palibot ug dunay count down nga pagahimoon sa matag relibo.

Apan tungod sa pagpunay’g ulan, wala na maka-roving ang jail guard on duty hinungdan nga nakahigayon ug ipsot ang pito ka mga binilanggo. Sa pito nga naka-eskapo, duha niini ang nakalayas na didto sa Misok, Sindangan apan nadakpan ra usab ug balik. Pipila ka mga residente nga anaa nanimuyo sa likod nga bahin sa Provincial Jail sa Don Jose Aguire ang mitaho nga mga pasado alas dose sa tungang gabii duna silay namatikdang tawo nga miagi sa ilang tugkaran tungod sa pagpunay’g usig ug paghot sa ilang mga iro. Apan matud pa sa Provincial Jail Warden, dili pa nila konpermado kon kadtong nangagi nga mga tawo mao ba gayud kadto ang pito nga mi-eskapo tungod kay agia-nan man ang maong dapit.

Provincial Jail Warden Fortunato Regañon mitudlo sa dapit nga maoy gi-agian sa pito (7) ka mga pineriso nga mipuga

Ang likod nga bahin sa Provincial Jail kasagbotan ug kalibonan ug hadool lamang sa baybayon ug gituhoan nga didto miagi ang mga escapee gumikan kay sa ilang pagsubay duna silay nakita nga mga tunob sa tawo. Sa gihimong pag-imbestigar ni Regañon, patay limod ang mga kauban sa pito ka mga piniriso tungod kay kini igo lamang mitubag nga sila nakahinanok ug katulog ug wala makabantay nga milayas na ang ilang mga kauban.

Sa exclusive interview nga gihimo sa DXFL Headline Balita ngadto sa mga piniriso, ilang gibutyag nga ulahi na nilang namatikdan nga naka-eskapo na ang pito nilang kaubang binilanggo sa dihang ilang nabatian ang kasaba, ayha pa usab nila gireport sa guwardiya. Sumala ni Regañon, mag duha na ka tuig sukad gibalhin ang provincial jail gikan sa Sicayab diha sa Don Jose Aguire, kas-a lang mahitabo nga dunay usa ka binilanggo ang nakapuga apan ila ra usab nadakpan ug balik.

Usa sa mga hinungdan nga dili pa maseguro nga hingpit mabantayan ang mga piniriso tungod kay ‘on going construction’ pa ang building ilabi na ang pagbutang ug peremeter fense ug out post sa mga guwardiya. Atubangan sa nalutsan ug pito ka mga piniriso ang mga jail guard on duty, wala pay gipahamtang ‘sanction’ ang buhatan sa provincial jail warden tungod kay padayon pa nilang gihimo ang hot pursuit operation. Matud ni Regañon, human unya sa ilang operasyon pagukod sa mga nakapoga, ayha himoon ang imbestigasyon.

Si Provincial Jail Warden Fortonato Regañon nana-wagan sa mga katawhan sa mga kasikbit nga dapit sa lungsod sa Manukan dinhi sa tibook probinsya sa Zamboanga del Norte nga kon dunay namatikdan nga lahi ang panglihok-lihok itaho lang ngadto sa kinadul-ang otoredad.

Explain w/in 72 hours

Gimando karon ni Governor Rolando Yebes nga mo-explain sulod sa 72 oras si Provincial Jail Warden Fortunato Regañon ngano nga naka-eskapo ang pito ka mga piniriso sa Provincial Jail sa Don Jose Aguire, Manukan.

Ang kamandoan giluwatan sa gobernador tungod kay gusto siya masayud unsay hinungdan ngano nga nakalayas ang mga piniriso. Matud sa gobernador sukad siya makahibawo nga dunay binilanggo nga nakapuga wala pa siya makadawat ug report gikan kang Regañon busa iya kining gihatagan ug ultimatum sulod sa setenta edos oras nga moreport ngadto kaniya.

Hangtud karon wala pay bisan usa sa pito ka mga piniriso nga nakapoga ang nadakpan ug balik sa gipang-dispatch nga membro sa provincial jail. (The New Nandau, Vol. XVII No.29)

*

 

KALANGAN PAG-ISYU OP TUNGOD SA GINOO –CITY HALL

Maoy gipasanginlan karon sa city hall sa dakbayan sa Dipolog ang pagka tawo sa Ginoo nga maoy nalakangay sa pag-isyu sa Occupancy Permit (OP) alang na sa Zamboanga del Norte Medical Center. Mao kini ang gihatag nga rason ni City Legal Officer Atty. Cyril Ruiz sa gihimong interview ni Nonoy Sabulboro sa programang Weather2 Lang sa DXFL. Si Atty. Ruiz sa iyang giluwatang pahayag nagkanayon nga tungod sa hataas nga bakasyon sa holiday season nalangan ang pagpagawas sa Certificate of Occupancy sa city government para sa Medical Center.

Matud pa sa city legal officer sa Dipolog nga nalangan sila sa paghiling sa mga rekisitos nga gisumitir sa Metropolis Construction niadtong buwan sa Desyembre tungod sda kataas sa bakasyon ug nalinga usab sila sa mga kalihukan sa pasko. Angayang kasayran nga ang Metropolis Construction misubmitir sa tanang mga detalye nga gipangayo ni Mayor Evelyn Uy sa mga una pang semana sa Desyembre 2007 ug kini gisundan pa sa pagfollow up sa kontraktor unsa nay aksiyon sa siyudad apan wala na sila mohatag ug tubag. Si Provincial Attorney Jes Gal Sarmiento, Jr. nagkanayon nga dili katuhuan ang rason nga giluwatan sa Dipolog kay ang application sa Metropolis para sa Occupancy Permit milungtad na ug upat ka buwan apan wala gihapon nila gipagawas hangtud karon.

Sigun sa records sa Marso 28, 2006 ang Dipolog miisyu sa Building Permit ug sa pagka Oktobre 8, 2007 ang Metropolis Construction misumitir sa tanang mga requirements ug kini gisundan sa Nobyembre 5 ug Nobyembre 20, 2007 diin dugang requirements nga gipangayo sa mayor ang ilang gisumitir. Pagka Enero 11, 2008 ang buhatan sa Provincial Attorney sa ZaNorte mihimo ug pagfollow-up kabahin sa Occupancy Permit nga hangtud karon wala pa gihapon mahatag sa mayor sa Dipolog. Samtang si Governor Rolando Yebes nagkanayon nga padayon gihapon nilang ipadas-og ang pagbatun sa Occupancy Permit bisan ug ang ZaNorte Medical Center nakabatun na sa License to Operate gikan sa Department of Health.

Kahinumduman niadtong miaging semana gihatagan na sa Department of Health ang ZaNorte Medical Center ug License to Operate. Matud pa ni Governor Yebes alang sa operasyon sa Medical Center ang pinaka mahinungdanon mao ang License to Operate ug dili ang Occupancy Permit. Sumala pa niya bisan wala pay Occupancy Permit gikan sa kagamhanang local mamahimo gihapon nga maka operate ang hospital pinaagi sa lesensiya nga gihatag sa nasudnong kagamhanan. Sa samang bahin gipahibawo sa gobernador nga maoy sunod karon niyang paningkamutan nga ang ZaNorte Medical Center mamahimong usa ka Level 3 hospital.

Sumala pa niya ang medical center nakaandam na para sa pagka tertiary hospital apan magsugod una kini sa pagka Level 2 hospital samtang sa hinay-hinay kompletohon sa probinsiya ang mga gikinahanglan para sa Level 3 Hospital. Kabahin sa gikinahanglang mga ekipo niini matud pa sa gobernador dili kini problema kay adunay mga kompaniya nga maoy mobutang ug maoy mooperate diin mohatag lang ang probinsiya ug porciento sa mamahimong income. Samtang ang mga bag-ong doctor nga nang apply karon sa probinsiya iyang gimandu nga ipailawom gayud sa mga pagbansay-bansay para mamahimo silang mga hanas. (Press Freedom, Vol. XX No. 14)

*

 

BATAN-ON KA-DOSE GIDUNGGAB, PATAY!

Wala ka-agwanta ang usa ka ulitawo kay nakabsan gyud sa iyang kinabuhi tungod sa12 ka samad nga nahiagoman sa biktima human giluba-luba didto sa Brgy.Siari longsod sa Sindangan niadtong Sabado, Enero 19, 2008. Ang batan-on namatay niadtong Hwebes, Enero 24, 2008.

Sigon sa atong pakighinabi sa pamilya sa biktima didto sa morgue sa provincial hospital giila ang biktima nga si Rofert Alboleras Y. Junsay 17 anyos taga Brgy.Siari.Mitongha pa sa iyang trabaho isip usa ka trabahante isip icer sa nego,syo sa iyang amo giilang usa ka Undong Bayawa didto dapit sa baybayon sa Brgy.Siari mga alas 4 sa kahaponon ni-adtong Enero 19, apan suma pa ga report human sa iyang trabaho ang biktima natulog didto sa usa ka payag sa nasangpit nga dapit mga alas otso ngadto sa alas nueve niadtong Sabado.Ang biktima nakit-an na lamang sa iyang ig-agaw nga si Elvie Pajardo nga ang biktima’ng si Alboleras naligo na sa iyang kaugalingong dugo nga nag bay-ad nga lugos na katindog sa pagpangayo sa panabang.

Ang biktima suma pa naka-angkon sa dose ka dinonggaban sa iyang lawas ginamit ang kotselyo.Ang biktima naka-angkon pa sa lahutay nga ginhawa ug gidala sa tambalanang provincial apan kaniadtong kadlawon sa Huwebes, Enero 24 nakabsan sa iyang kinabuhi tungod sa grabing sinaksakan sa iyang lawas ilabina sa party sa dughan sa biktima nga maoy resulta sa iyang kamatayon.Sa pagkakaron ang PNP sa lungsod sa Sindangan dunay nay nakalap nga report sa responsabli sa maong madugong krimin ug brutal nga pagpatay sa biktima.Sa pagkakaron taliwa sa maong nadangatan sa pamilya sa biktima mapasalamaton usab ang pamilya sa biktima sa pang-gobyerno sa probensya sa Community Development Assistance Unit kon CDAU nga mihatag sa all out support sa pamilya sa biktima sa medical assistance sa programa ni Governor Rolando Yebes

Sa pagkakaron ang patay’ng lawas sa biktima gikatahong gi-uli na sa ilang panimalay didto sa lungsod sa Siari sa Sindangan. (Southpoint, Vol.1No.4)

*

 
SANGKOL DUMPSITE WAY SEGREGATION SA BASURA

PABILIN nga wala karon misubay ang kagamhanang local sa Dipolog sa hustong waste segregation kun paglain sa mga basura nga anha nila ilabay sa ilang open dump site nga anaa sa barangay Sangkol ning dakbayan sa Dipolog.

Sa nasayran ang Department of Environment and Natural Resources (DENR) ang kanunay nga mipagawas ug notice kaniadto ngadto sa kagamhanang local sa Dipolog kabahin sa pagbaton ug sanitary landfill, mintras gihikay pa ang luna ug ang mga papel niini kinahanglan nga mosagop ang siyudad sa hustong segregation sa mga basura diha na sa nagpabilin karong open dump site.

Sa interview sa mga miyembro sa ZNUC ngadto kang Engr. Gene Alagenio, Provincial Environmental Management Officer sa DENR nga sa karon ang siyudad sa Dipolog ang anaa pa sa proseso alang sa sanitary landfill. Kini tanan ang anaa pa rehiyonal nga buhatan sa Environmental Management Bureau sa DENR. Subay sa R.A. 9003 – Ecological Solid Waste Management Act kinahanglan magbaton ang matag LGU ug sanitary landfill.

(Left photo) Gipahayag ni Engr. Gene Alagenio, Provincial Environmental Management Officer sa DENR nga kinahanglang makasugod na karong panahona ang Dipolog sa pag-establisar ug Sanitary Landfill tungod kay milapas na kini sa gilugway nga panahon subay sa gimando sa balaod.

(Right) Gipahayag ni PENRO Carlito Tuballa nga dili pa usab masiguro kung mao na ba gayud ang lugar nga himoong landfill ang gi-aplayan sa city sikbit sa open dump site, depende kung unsay resulta sa pagsusi sa taga MGB.

Sa kabahin ni Engr. Alagenio nga sa karon ang siyudad ang nagatotok sa segregation sa mga basura nga ilang gilabay sa dump site, apan sa nasaksihan sa mga miyembro sa ZNUC kagahapon ug sa gibutyag sa mga residente sa maong dapit wala kini himoa sa siyudad. Gi-usa ra ug huwad ang mga basura nga madugta ug dili madugta ug bisan sa mga basura nga direktang makadaot sa tawo.

Nasayran nga layo pa sa tinood nga makabaton ug sanitary landfill ang Dipolog tungod sa matod pa pundo nga gikinahanglan alang sa geological study nga diin sagubangon kini sa kagamhanang local ug technical assistance lang sa Mines and Geosciences Bureau (MGB). Ang gi-aplayan sa siyudad nga himoong sanitary landfill mao ang portion ra usab sa kinatibuk-ang pito ka ektarya nga kasamtangan karong gigamit nga maoy labayanan ug basura. Apan kini ang hugtanon karong gibabagan sa mga katawhan sa maong dapit.

Gipahayag ni Alagenio nga kinahanglang makasugod na karong panahona ang Dipolog sa pag-establisar ug Sanitary Landfill tungod kay milapas na kini sa gilugway nga panahon subay sa gimando sa balaod. Angayang masayran mamahimong mapasakaan ug kaso ang kagamhanang local kung magpabilin kini sa iyang naandang pamaagi paghipos ug basura nga diin mismo ang Integrated Bar of the Philippines na ang mopasaka ug kaso basi sa rekomindasyon sa DENR.

Samtang gipahayag usab ni PENRO Carlito Tuballa nga dili pa usab masiguro kung mao na ba gayud ang lugar nga himoong landfill ang gi-aplayan sa city sikbit sa open dump site, depende kung unsay resulta sa pagsusi sa taga MGB. (By Joel Ello, The New Nandau, Vol. XVII No.28)

*

 

Ernesto Tan gikilkilan?

Natay-og karon sa dakong eskandalo ang Provincial Environment and Development Office kon PEDO sa dihang gikatahong nagpa-interview sa local media si Mr. Ernesto Tan, tag-iya sa Mediatrix Homes Developer nga walay lipod-lipod nga miakusar kang Mr. Remelo Damuag, Operations Chief sa maong buhatan nga nangilkil kaniya ug syento singkuwenta mil ka pesos P150,000.00 bugti sa pagpalugwa sa quarry permit nga iyang gi-applayan sa probinsya.

Mao kini ang matud pa, gibutyag ni Mr. Tan sa interview sa usa sa mga lokal radio station dinhi sa dakbayan sa Dipolog kinsa mipabate sa iyang reklamo nga kanunay’ng dakpon sa mga personahe sa PEDO ang iyang mga sakyanan nga maghakot ug yuta sa iyang gipabungkag nga bungtod sa Dicayas para sa iyang housing project sa rason nga wala kini permit. Matud pa sa usa sa mga empleyado sa Mediatrix nga dili magpaila mikonpermar nga sa matag sakyanan nga madakpan sa PEDO, si Mr. Tan pangayuan sa operations chief ug singkuwenta mil ka pesos bugti sa pag-release sa sakyanan.

Sumala sa interview sa usa ka radyo dinhi si Mr. Tan mipahayag nga duna siyay ikapamatuod sa iyang alegasyon pinaagi sa “voice tape recorded” ni Mr. Damuag nga nangayo kaniya ug kuwarta. Wala hinoon ikabutyag ni Mr. Tan kon si Mr. Damuag nakadawat ba sa iyang gipangayo nga salapi kay ang gisulte lamang niini nga nangilkil ngadto kaniya. Nasayran nga si Mr. Tan nangayo karon ug pakitabang sa Dipolog Chamber of Commerce and Industry gumikan sa kalangan sa pag-isyu ug quarry permit para sa iyang housing project sa Dicayas. Matud pa ni Mr. Ernie Rojo, Executive Director sa Dipolog Chamber of Commerce and Industry nga atol sa ilang meeting sa Board of Directors, usa sa ilang gituki ang sulat-reklamo ni Mr. Tan.

Matud ni Rojo, si Mr. Tan nga usa sa mga membro sa Dipolog Chamber miduso sa iyang problema mahitungod sa iyang pag-apply ug permit sa provincial capitol alang sa pag-quarry sa yuta para itambak sa iyang housing subdivision projects gumikan kay nakahinagbo ug kalangan.

Nasayran nga si Tan dunay housing project sa Dicayas ug maoy iyang gusto nga patagon ang nabungtud nga yuta ug ang uban hakoton alang sa pagtambak. Kini mi-apply ug quarry permit sa probinsya apan hangtud karon gisigihag dakop ang iyang mga dumptruck kay wala hatagig permiso sa Kapitolyo. Si Mr. Tan mialegar nga ang operations chief sa PEDO ang nangilkil kaniya ug kuwarta para mapalugwa ang permit.

Atol sa board meeting, nauyonan sa mga membro nga ila una subayon unsay hinungdan sa kalangan sa prosesso sa pagpalugwa sa quarry permit nga gi-applayan ni Mr. Tan ayha ang chamber mohimog lakang mahitungod sa maong reklamo. “Ang stand namo (DCCI) to get the facts. The primary aim of the chamber is to help our member businesses in Dipolog City and the province of Zamboanga del Norte. As of now, the decision of the board is to look into the facts and study the facts presented by our member Mediatrix Homes.” Human mogawas ang maong balita sa DXAA, si Mr. Tan ang dili na magpa-interview pa ug laing membro sa media sa wala pa mahibal-e nga rason. Gisulayan unta ning pamantalaan ug tawag sa iyang opesina si Mr. Tan apan ang iyang staff kanunay nga mobalibad kay milakaw.

Si Atty. Jes Gal Sarmiento, Provincial Attorney mikonsederar nga usa ka seryoso nga alegasyon ang gibutyag ni Mr. Tan. Kusganong gihimakak ni Sarmiento nga iyang gisugo si Damuag aron mangilkil sa Mediatrix Developer. “Wala ko gasugo kang Mr. Damuag nga mangayo ug kuwarta kang Mr. Tan” Wala na mihatag ug dugang pamahayag ang provincial attorney kay wala siya makadungog sa maong balita sa DXAA. Maoy iyang gusto nga makadungog sa tape recorded ug kopya sa maong balita sumala sa gipamahayag ni Mr. Ernesto Tan nga matud pa, nagpa-interview ug media aron kahimoan niya ug aksiyon. “Wala ko kadungog sa balita”.

Sa interview, si Mr. Remelo Damuag mihimakak sa alegasyon sa Mediatrix Developer nga nangilkil siya ug kuwarta. “Iya lang nang gihimo kay nasuko siya (Mr. Tan) nga among dakpon iyang sakyanan kay walay permit ang paghakot sa yuta.” Nagtuo si Damuag nga si Mr. Tan gigamit sa kagamhanang lokal sa Dipolog aron sila dauton kabahin sa wala pag-isyu ug sand and gravel permit sa probinsya. Para niya, usa ka libelous ang gibuhian nga pagdaut ni Mr. Tan ug nagplano siya karon nga mopasaka ug kaso. (Press Freedom, Vol. XX No. 14)

 
 

doh miayuda zmc

GIDAWAT niadtong Huwebis, Enero 4, 2008 sa kagamhanang probinsiyal sa Zamboanga del Norte ang financial assistance nga tunga sa milyon gikan sa PGMA priority development fund. Kini ang gidawat ni Provincial Attorney Jes Gal Sarmiento, Jr. didto sa rehiyonal nga buhatan sa Department of Health sa dakbayan sa Zamboanga nga ayuda alang sa hospital development project ni Presidente Gloria Arroyo.

Subay sa natukod nga Zanorte Medical Center, ang nasudnong kagamhanan ang mirespondi kini sa mga gikinahanglan niini alang sa operasyon sa maong bag-ong tambalanan. Usa ang probinsiya nga makabenipisyo sa Hopital Development Fund ni PGMA. Sa nasayran, ang maon financial assistance nga nadawat karon sa probinsiya ang gamiton alang sa e-Library sa Zanorte Medical Center nga ang usa sa nanag-unang gikinahanglan mao ang hospital information system.

AYUDA. Provincial Atty. Jes Gal Sarmiento midawat sa financial assistance gikan sa DOH-Region 9 alang sa E-Library sa Zanorte Medical Center. Ang cheke gitunol ni Assistant Regional Director Dr. Edgardo Gonzaga.

Sa gihimong interview sa mga miyembro sa ZNUC ngadto kang r. Edgardo Gonzaga, Assistant Regional Director sa DOH, mipasabot nga ang katuyuan karon ni Presidente Arroyo mao ang pagpalambo sa tanang mga pampublikong tambalanan sa nasud aron mas makaserbisyo pa kini pag-ayo sa mga katawhan, makatabang kini sa mga nursing students nga mi-affiliate sa government hospital aron nga maoy ilang sumbanan ug barometro alang nasa pagpanarbaho ngadto sa laing nasud. Ang DOH ang mi-ayuda usab sa pagpalambo sa tanang mga tambalanan sa Zanorte ug mi-alayon sa  pagpatuman sa province wide investment plan for health nga anaa ang komprehensibong pagpatuman sa mga programa alang sa panglawas sa katawhan.

Gipaabot usab ni Dr. Gonzaga ang ilang pagdayeg ngadto sa lederato ni Governor Yebes sa gipaita niining kakugi alang sa pagpatuman sa mga programa kabahin sa panglawas sa mga katawhan. Sa susamang bahin, masaligon ang rehiyonal nga buhatan sa DOH nga maoy mangunay sa pag-follow-up sa dugang gikinahanglan nga permit alang sa hingpit nga operasyon una sa Zanorte Medical Center nga ang Central Office lang sa DO Hang maoy makahatag niini. Alang sa assistant regional director nga dili na kaayo gikinahanglan ang local permit nga maoy requirements sa ihatag usab nga permit gikan sa nasudnon nga buhatan alang sa operasyon sa Zanorte Medical Center tungod kay sila sa DOH-regional office ang misubmiter na sa tanang mga certification nga gikinahanglan ngadto sa ilang central office.

Sa karon ang probinsiya ug ang DOH ang nagkahi-usa alang sa operasyon sa bag-ong tambalanan hinapos niining bulan sa Enero. Dugang nasayran nga ang kagamhanang local sa Dipolog ang mi-isyu na kini ug building permit alang sa waste disposal human nga ilang nakita ang tanang certification ug permit gikan sa DOH, apan ang occupancy permit ang pabilin nga gihikaw sa siyudad. (Southpoint, Vol.1No.3)

 
 

Ipabilin ang ticketing outlet sa Pantalan gitun-an pa sa PPA

GITUN-AN pa una karon sa Philippine Ports Authority (PPA) – Port District Office sa Cagayan De Oro ang hangyo sa  Philippine Shipping Liner Association – Dipolog Chapter nga ipabilin sulod sa terminal building sa PPA sa pantalan sa dakbayan sa Dapitan ang ilang matag ticketing outlet, atubangan sa mando karon nga papahawaon na sila sa Philippine Ports Authority.

Sa gihimong interview sa mga miyembro sa Zamboanga del Norte United Correspondents (ZNUC), gihatagan ug gibug-aton ni Atty. Roger Asprer, Manager sa PPA-Dapitan nga ang pagpahawa sa mga ticketing outlet sulod sa pantalan kini tungod sa “security reason”. Kini basi sa mando usab sa ilang Port District Office nga atua sa Cagayan de Oro. Apil sa pahawaon mao ang mga mamaligyaay sulod sa maong pantalan. Mismo ang Vendors Association ang hugtanon karon nga naghangyo sa PPA nga ipabilin usab sila sa ilang kasamtangan karong nahimutangan sulod sa pantalan sa Dapitan.

Ang walo ka mga shipping lines nga adunay ticketing outlet sulod sa pantalan sa Dapitan ang pareho karong nagatubang sa mando nga papahawaon na sila sa Philippine Ports Authority.

Sa maong sitwasyon, wala gililong ni PPA Manager Asprer ang iyang namatikdan sa mamahimong epekto sa pagpahawa sa mga ticketing outlet tungod kay basi sa iyang namatikdan nga ang mga pasahero sa barko nga gikan sa Calamba, Plaridel ug ubang mga lugar nga sakop sa Misamis Occidental ang daritso na sa pantalan sa Dapitan molukat ug ticket. Gipanghinaot ni Asprer nga sa sayo nga panahon maresulbar ang maong isyu alang sa kaayohan sa mga pasahero sa barko.

Sa karon adunay walo ka mga shipping lines ang parehong mipahimutang karon sa ilang matag ticketing outlet sulod sa pantalan sa Dapitan. Gipasabot ni Asprer nga sila sa PPA-Dapitan ang walay gika-rekomindar nga lugar nga mamahimong kabalhinan sa mga ticketing outlet sa pantalan tungod kay sa iyang nakita walay lugar nga mahimong kabalhinan tungod sa bungtod nga nagpalibot. Adunay lugar nga igo lamang kaagian sa mga sakyanan pasulod ug pagawas sa pantalan. Angayang masayran nga ang PPA-Dapitan maoy mihimo sa booth nga maoy gi-abangan sa mga shipping companies aron maoy ilang ticket outlet. Sa pangtuna kung sila sa kabahin sa PPA-Dapitan angayan bang pahawaon ang mga maong ticketing outlet?, matod pa ni manager Asprer nga sa kabahin sa mga pasahero mas maayo nga sayon ug dali ang ilang paglukat ug ticket ilabina sa mga lagyong lugar. Alang kaniya mas maayo nga adunay lugar sa gawas sa pantalan nga maoy kabalhinan sa mga ticketing outlet.

Gituhuan nga ang pagpa-pahawa sa maong mga ticketing outlet terminal building sa pantalan sa Dapi-tan kini isip pagpangandam usab alang na sa expansion sa maong pantalan nga ipa-tindog ang mas moderno ug dako nga terminal building. Sa nasayran ang resolution sa Philippine Shipping Liner Association – Dipolog Chapter ang ilang gipaabot ngadto kang Governor Rolando Yebes alang sa pagpangayo ug tabang. Atul sa Kapihan sa 1948 Cafeteria sa RPN-DXKD uban sa ZNUC  gipahayag ni Governor Yebes nga iya usab kining ipaabot ngadto sa buhatan ni Presidente Gloria Macapagal Arroyo ug sa mga kadagkuan sa PPA ug sa Secretary sa Department of Transportation. Gihatagan ug gibug-aton sa gobernador nga alang kaniya sayo pa kaayo nga himoon sa PPA ang maong butang ilabina nga nagsaka karon ang industriya sa torismo sa atong lalawigan. Ang pagpahawa sa mga ticketing outlet sulod sa pantalan sa Dapitan maka-epekto kini ug dako sa torismo ug mismo sa mga pasahero sa barko. Gipalanog sa gobernador ang iyang hangyo nga ipabilin lang una karon sulod sa pantalan sa Dapitan ang maong mga ticketing outlet hangtud nga modako ang atong puerto ayha ipakanaog ang order pagpabalhin kanila. (By Joel Ello, The New Nandau, Vol. XVII No.28)

*

 

MEDIATRIX WALAY INTERES MOPASAKA UG KASO BATOK PEDO-ACTION OFFICER

Walay interes ang Mediatrix Homes Developer nga mopasaka ug kaso kabahin sa gika-alegar nga pagpangilkil ug salapi batok sa operations officer sa PEDO human mipasalig ang Capitolyo nga motabang aron mapadali ang pagawas sa quarry permit nga ilang gi-aplayan sa probinsya. Apan pabilin niyang gibarugan nga nakadawat ug salapi gikan kaniya si Mr. Remelo Damuag.

Kini ang gideklarar ni Mr. Ernesto Tan, tag-iya sa Mediatrix atol sa press conference nga iyang gipatawag sa mga membro sa lokal media didto sa iyang opesina human sa ilang nakab-ot nga kasabotan tali ni Provincial Atty. Jes Gal Sarmiento, gidesignate nga Zamboanga del Norte Evironmental Management Officer kon ZANEMO nga tabangan ang pagproseso sa mga papeles.

Sa wala pa gihimo ang press conference, usa ka close door meeting ang gipahigayon tali nila ni Provincial Atty. Jes Gal Sarmiento, Mr. Ernesto Tan  ug sa iyang business consultant gikan sa Manila.

Matud sa Real State consultant ni Mr. Tan nga mitambong sa konperensiya nga napagya ang maong issue gumikan sa kadugay’ng panahon nga gisaad ngadto kanila nga ihatag ang maong quarry permit apan hangtud karon pabilin kining wala matuman. Sumala pa niya ilang gipaninguha nga mapadali ang maong permit aron matuman ang ilang joint ventures nga housing projects dinhi sa dakbayan sa Dipolog. Gikalipay sa consultant ang inisyatibo nga gihimo sa PEDO-Officer nga hayan mahatagan na ug kaangayan ang Mediatix Developer sa ilang gibobo nga pohunan dinhi sa dakbayan sa Dipolog pinaagi sa gihimo niining mga subdivision housing projects atubangan sa kalangan nga ilang nahinagboan kabahin sa ilang gi-aplayan nga quarry permit.

Mr. Ernesto Tan, tag-iya ug tagdumala sa Mediatrix Homes Corporation nagpasa-lamat ngadto kang Provincial Atty. Jes Gal Sarmiento nga maoy naninguha nga motabang kanila aron mahatagan sila ug quarry permit alang sa ilang paghakot sa yuta sa gibungkag nga bungtod sa Dicayas. Provincial Atty. Jes Gal Sarmiento, ZANEMO-Officer namahayag nga iya pang subayon sa iyang opesina ang mga dokumento nga gisubmiter sa Mediatrix kon mutugma ba ang mga papeles nga gihatag ni Mr. Ernesto Tan kon na-comply ba niini ang gikinahanglang requirements.

“Akong subayon sa akong opesina ang mga dokumento nga gihatag karon ni Mr. Tan kon motugma ba sa iyang mga dokumento nga gisubmiter kang Damuag.” Gipasalig ni Atty. Sarmiento isip siya ang Vice Chairman sa Provincial Mining and Regulatory Board kon PMRB, siya ang mo-sponsor ug resolution aron mahatagan ug paborabling askiyon nga ma-isyuhan ug quarry permit sa goberna-dor ang Mediatrix Homes Corporation. Gipasabot sa ZANE-MO-Officer nga maoy gusto ni Governor Yebes nga moagni ug mga investor aron mobobo ug ilang po-hunan dinhi sa Zamboanga del Norte aron molagsik ang dagan sa ekonomiya busa iyang gipasalamatan ang korporasyon ni Mr. Tan nga wala maghikaw sa pagbutang ug ilang negosyo nga subdivision housing projects dinhi sa dakbayan sa Dipolog.

Gov. Yebes, Sarmiento gidepensaan ni Mr. Tan

Gidepensaan ni Mr. Ernesto Tan sila si Governor Rolando Yebes ug Provincial Atty. Jes Gal Sarmiento nga dili siya makatuo nga mao kini ang gasugo ni Mr. Remelo Damuag aron mangilkil kaniya ug salapi atubangan sa pasalig nga mapalugwa ang iyang gi-aplayan nga quarry permit.

Kini ang gipamahayag sa tag-iya sa Mediatrix Homes samtang iyang gibarugan nga duna siyay ikapamatuod sa iyang gibuhian nga alegasyon nga pagpangilkil ngadto kaniya nga gihimo sa kanhi action officer sa PEDO. Sumala pa ni Mr. Ernesto Tan, gigamit ang ngalan nila ni Governor Yebes ug Atty. Sarmiento sa mudos nga gihimo ni Mr. Damuag aron makapangil-kil kaniya ug salapi. Pabiling gibarugan ni Mr. Tan nga si Mr. Damuag nakasapi na gayud ngadto kaniya apan dili siya motuo nga kini maoy sugo sa gobernador ug sa provincial attorney.

“Dili ko motuo ni Pareng Sarmiento ug ni Governor Yebes nga mobuhat ana. Si Damuag nuon motuo gyud ko,” nagkanayon pa si Mr. Tan. Sa pangutana kon duna ba siyay ikapamatuod nga siya gipangilkilan ni Damuag, si Mr. Tan miingon, “duna koy mga ebidensiya. Ug moingon nga nakasapi, nakahatag gyud ko.” Nagtuo si Mr. Tan nga ang mga dokumento nga iyang gipasa sa PEDO anaa lamang sa lamesa ni Mr. Damuag ug wala maka-abot sa opesina ni Atty. Sarmiento ug Governor Yebes tungod kay midagan paman ug hataas kaayo nga panahon hangtud nalang hinoon nga nabolabog ang maong isyu.

Atubangan sa gitukod nga task force aron pagahimoon ang imbestigasyon sa iyang gibuhian nga alegasyon, gipahayag ni Mr. Tan nga wala na siyay interest nga mopasaka ug kaso batok kang Damuag tungod kay nagkasinabot na sila sa PEDO Officer nga tabangan siya sa pagprosesso sa mga papeles aron mapadali ang pagpalugwa sa quarry permit nga iyang gi-aplayan sa probinsya. Matud niya, dili na siya moatubang sa investigating panel kon ugaling ipatawag siya sa Capitolyo kay ang importante alang kaniya, ang ilang negosyo ug dili na manggilabot sa kaso. Gipahayag ni Mr. Tan nga andam siyang makig-atubang ni Mr. Damuag aron mabalik ang ilang maayong relasyon.

Provincial Atty. Sarmiento nagkanayon nga ila nalang isalig sa mga membro sa task force nga maoy mo-imbestigar ni Damuag ug dili na sila manghilabot pa niini. Matud ni Atty. Sarmiento dili siya apil sa task force nga gitukod sa provincial administrator nga maoy gitahasan ni Governor Yebes para moimbestigar sa maong isyu ilabi na nga nalambigit ang iyang pangalan. Si Atty. Osabel maoy gitudlong chairman sa task force para sa pagahimoon nga imbestigasyon nga gikatakdang magtagbo karong sunod semana.

Pagkakaron si Damuag nga kasamtangang gipa-ilawom sa preventive suspension ang anaa karon gibalhin sa opesina sa provincial adminisrator. (The New Nandau, Vol. XVII No.29)

*

 

SP sa Sindangan wala moila kang Rene Sabanal

Wala dawata sa konseho sa Sindangan si Rene Sabanal isip ex-officio member sa dihang pormal na kinig miduso sa iyang mga dukomento atol sa unang sesyon niini alang sa tuig 2008. Si Sabanal gidawat lamang isip usa ka ‘visitor’ sa konseho aron iyang mapadayag ang iyang katuyuan sa konseho.  Sa dihang miingon si Sabanal atol sa sesyon nga molingkod na siya isip sakop sa konseho, mayoriya sa mga konsehal ang wala modawat kaniya isip ex-officio member sa SP Sindangan.

Ang rason sa konseho sa wala pagdawat kang Sabanal, kayu matud pa ila pang gipaabot ang results sa padayong karong gidungog nga petisyon ni Barangay Chairman Clint Macias nga mapabalewala ang gihimong eleksiyon sa Liga sa Sindangan sa nakalabayng Disyembre 11. Ang konseho sa Sindangan, padayong wala moila sa nahisgutang elekesiyon bisan ug nakadawat na si Sabanal ug Certificate of Confirmation gikan mismo sa nasudnong buhatan sa Liga ng mga Barangay.

Padayong wala tahora sa konseho sa Sindangan ang pagdaog ni Sabanal isip presidente sa Liga ng mga Barangay sa Sindangan bisan pa kon gidawat na kini sa Provincial Liga ug nakasalmot na kini sa panagtigum sa 25 ka mga presidente nga gikan sa mga Liga sa nagkalain-laing dakbayan ug lalawigan. (Press Freedom, Vol. XX No. 14)

*

 

Kapin sa P657 milyones proyekto sa buwan sa Disyembre lamang

Mikapin sa 657 milyones ka pesos ang balor sa mga nagkadaiyang proyektong pang-imprastraktura ang gipatuman sa kagamhanang probinsiyal sa bulan sa Desyembre sa nakalabay’ng tuig 2007.

Sigun sa report sa Provincial Engineering office ang maong mga proyekto maoy napatuman sa kagamhanang probinsiyal pinangulohan ni Gov. Lando Yebes sa duha ka dakbayan sa Dipolog ug Dapitan ug sa 25 ka mga kalungsuran ning lalawigan. Ang maong mga proyekto naglangkob sa mga Pre-Fabricated School Building ug Barangay Hall, Multi-purpose Center, pasuga, patubig, pagbuslot ug mga kadalan sa mga lagyong barangay isip mga farm to market roads, concreting sa mga barangay roads, ug daghanang pang mga proyekto nga maoy gikinahanglan sa mga katawhan diha sa kabarangayan.

Mikapin sa 657 milyones ka pesos ang balor sa mga nagkadaiyang proyektong pang-imprastraktura ang gipatuman sa kagamhanang probinsiyal pinangulohan ni Gov. Lando Yebes sa duha ka dakbayan sa Dipolog ug Dapitan ug sa 25 ka mga kalungsuran ning lalawigan sa  x   bulan sa Desyembre sa nakalabay’ng tuig 2007.

Bisan pa man sa kadaku sa kantidad sa mga nagkadaiyang proyekto sa kagamhanang probinsiyal apan ning pagtong-tong sa tuig 2008 nagpabiling himsog ang panudlanan sa probinsiya ug gani nahimo man ang Zanorte nga numero dos sa pinakadaku ug bank deposits sa assets and liabilities sa tibook nasud nga Pilipinas. Ang pag-angkon sa maong mga proyekto sa Zanorte maoy bunga sa padayong paningkamot nga gihimo sa gobernador nga wala na magsalig sa kaugalingong abot sa probinsiya.

Gawas sa kapin sa 657 milyones pesos nga napatumang proyekto sa tuig 2007 napabarug usab sa susamang tuig napabarug usab sa kagamhanang probinsiyal ang usa ka moderno ug bag-ong hospital nga makatabang kaayo ug daku sa mga katawhan ilabi na sa mga dinagko nga operasyon. Taliwala sa maong kalambo-an mas gipalapdan pa sa gobernador ang iyang ayuda para sa mga pobreng katawhan sa Zanorte, ang mga sakop sa Lando-Bibo ang gipa-ilawom na karon sa Phil health program nga nagtanyag ug dugang pang libreng serbisyo sa tambalanan ug libreng tambal para sa mga katawhan nga nakahinagbo ug problima sa panglawas.

Sa kanunay ang mga programa ug proyektong gipatuman ni Gov. Yebes nagsumikad sa iyang prinsipyo ug tamdanan sa panggobyerno nga “UNA SA TANAN ANG KATAWHAN”. Karong tuiga mao usab ang hingpit nga pagpatuman sa gobernador sa iyang priority program nga tambal sa kagutom sa tiya sa tawo, kini mao ang programang panginabuhi-an. Sa kanunay iyang gi-awhag ang mga katawhan nga pangga-on ug amomahon ang tanang ayuda nga gihatag sa kagamhanang probinsiyal kay kini maoy inisyatibo sa gobernador nga iyang gigasa para sa tanang katawhan sa Zanorte.

Dili usab malilong nga gumikan sa maong mga kalampusan nga gihimo sa gobernador siya nakadawat ug daghang mga pasidungog ilabi na gayud ang Lingkod Bayan Award nga usa sa pinakaprestihiyusong pasidungog nga nadawat ni Gov. lando Yebes. Matud pa sa gobernador nga ang tanang mga pasidungog nga iyang nadawat iya usab nga gihalad sa mga katawhan ning lalawigan nga maoy iyang gi-alagaran. (Southpoint, Vol.1No.4)
 

 

Kampanya alang sa turismo sa ZN gihingusgan

Maka full blast na karon ang Zamboanga del Norte sa paglusad sa kampanya alang sa pagpalambo sa industriya sa turismo karon nga nahimo nang usa ka hingpit nga opisina sa kagamhanang probinsiyal ang buhatan sa turismo.

Mao kini ang pahayag nga giluwatan ni Atty. Alan Ranillo, ZaNorte Tourism Council Chairman human maaprubahi sa Sangguniang Panlalawigan ang ordinansa nga nagmugna sa Provincial Tourism Office. Sa iyang kabahin si Governor Rolando Yebes, nagkanayon nga naghuwat na lang siya mahingpit ang pagpublikar sa maong ordinansa sugdan na niya sa pagtudlo ang modumala sa maong buhatan.

Ang gobernador naghisgut nga sigurado na nga makuha ug iyang itudlo pagka provincial tourism officer sa ZaNorte si Atty. Ivan Patrick Ang nga maoy iyang gidisignar sa maong puesto sulod sa una niyang termino. Gipahibawo usab ni Governor Yebes nga ang probinsiya adunay ipatindog nga gamay nga building sa karaang nahimutangan sa gidemolish nga cultural and sports center para mamahimong tourism information center ug sa samang bahin display center sa tanang mga agricultural products sa ZaNorte.

Ang chairman sa ZaNorte Tourism Council mitataw nga nalipay sila nga sa katapusan namugna ra gayud nga usa ka opisina ang Provincial Tourism Office. Sa samang bahin gipahibawo usab ni Atty. Ranillo nga sugod karong sunod buwan pormal usab nga ilusad ang usa ka travel and tour agency ang pinaka unang in-bound tour operator dinhi sa ZaNorte.

Sumala pa niya ang ilang pamilya mi-invest karon sa pagbatun ug usa ka in-bound tour agency kay nakita ug mituo sila sa panglantaw sa gobernador nga ang ZaNorte adunay dakung potential nga mahimong tourist destination. Si Atty. Ranillo midugang sa pagpahayag nga ang mga naandang tourist destination sa atong nasud paingon na sa pagkahupas ang ilang kasikat kay ang mga tawo gipul-an na ug nangita na usab ug bag-ong mga destinasyon.

Samtang si Atty. Ang mipahibawo usab nga karong tuiga nagbag-o sila sa ilang mga kampanya sa turismo ug maoy ilang gipuntirya karon ang dakung merkado sa mga turista sa Cebu, Dumaguete ug Bohol bisan ug pisik lang sa ilang mga turista ang makabig sa pagbisita dinhi sa atong lugar. Matud pa niya karon nga aduna nay lima ka biyahe sa barko magtabok-tabok sa Dapitan-Dumaguete kada adlaw maoy gusto niyang matutukan sa kampanya ang Dumaguete para madani ang mga turista gikan sa maong siyudad nga mobisita sa ZaNorte kay sa ilang nahimong kasinatian ang turista labing taas duha ngadto sa tulo ra ka adlaw mo-istar sa usa ka lugar ug mangita na usab kini ug laing kasuruyan aron dili mapul-an. (Press Freedom, Vol. XX No. 14)

*

 
Alintana, Acaylar ug kauban ipaimbestigar ni Gov. Yebes

Gusto karon sa gobernador sa Zamboanga del Norte nga maimbestigar ug mapapha sa sirbisyo pagka pulis ang pipila ka meyembro sa ZaNorte Police Provincial Office nga nangharas sa pangulo sa CDAU ug mga kauban.

Kini ang gipalanog ni Governor Rolando Yebes human makabati sa balita sa nahimong kasinatian ni Mr. Ronilo Pacilan ug mga kauban sa Community Development Assistance Unit nga giharas sa tulo ka mga pulis gikan sa Camp Hamac nga gituhuang gisugo ni Police Chief Inspector Reynaldo Maclang. Ang gobernador mitataw nga wala gayud siya mahiuyon sa maong insidente nga mga meyembro sa kapulisan malambigit sa pagpangharas ilabi na sa mga kawani ug opisyal sa probinsiya.

Sa sayu pa gisaysay ni Mr. Pacilan ang nahimo niyang kasinatian ug mga kauban nga gipangkapkapan sila kon wala bay dalang armas ug gipangsimhot-simhot ilang mga sigarilyo kon wala bay marijuana o shabu sa tulo ka mga pulis sulod sa bar sa Top Pension dili pa lang dugay. Matud pa ni Mr. Pacilan sa primero wala siya mag-duda kay nagtuo siya nga ang gibuhat sa tulo ka meyembro sa PNP kabahin sa ilang operasyon.

Apan wala magdugay misantop na sa iyang huna-huna nga hayan adunay dautang laraw ang maong mga pulis sa ilang grupo kay sa iyang namatikdan ang ila rang lamisa ang gibalik-balikan ug gipangkapkapan sila sulod sa pipila ka higayon. Giila ni Mr. Pacilan ang hingtungdang pulis nga gipanguluhan ni SPO2 Romy Alintana ug PO2 Arvin Acaylar ug laing usa ka pulis nga wala mailhi nga pulos gikan sa Camp Hamac sa Sicayab. Matud pa ni Pacilan wala gayud siya mahiluna sa gibuhat nila ni Alintana busa sa dihang miadto kini sa comfort room iyaha kining gisundan ug gisukna kon unsay bikil sa ilang grupo nga mao may giinitan ug gibalik-balikan sa pagkap-kap nila kon wala bay armas ug basin adunay dalang illegal drugs.

Sumala pa ni Pacilan dali nga mihimakak si Alintana nga wala silay dautang tuyo dungan sa paghangyo nga kon mahimo ma-awhag ni Roney si Governor Yebes nga dili na babagan niini ang pagbalik ni Maclang pagka hepe sa Dipolog Police kay pirmahan dayon ni Mayor Evelyn Uy ang Occupancy Permit sa Zamboanga del Norte Medical Center. Ang hepe sa CDAU midugang sa pagsaysay nga si SPO2 Alintana midugang pa sa pagpasalig ngadto kaniya nga sa higayon si Maclang makabalik pagka hepe sa Dipolog kini nay maantigo mobawos kaniya sa paghatag ug pabor ilabi na sa mga suroy-suroy sa gabii.

Tungod sa maong aktu-wasyon ug mga pahayag nga giluwatan ni SPO2 Alintana matud pa ni Pacilan natingkag ang iyang mga balahibo sa kabalaka nga basin ug plantingan sila ug ebedensiya ug maoy ibarter para hangyoon ang gobernador nga dili mobabag kang Maclang. Si Governor Yebes nga nakuhaan ug reaksiyon kabahin niini nagkanayon nga gisultihan na siya ni Roney sa maong insidente apan wala siya kahibawo unsay detalye ug karon pa lang niya masayri ang nahitabong pagpangharass nilang SPO2 Alintana ug PO2 Acaylar ngadto sa hepe sa CDAU.

Matud pa ni Governor Yebes kon mohatag si Pacilan ug usa ka pinanumpaang pahayag iyaha kining ipa-imbestigar para mapahamtangan sa tukmang silut kadtong mga pulis nga nalambigit sa pagpangharas. Alang kaniya ang maong matang sa mga pulis nga nagbuhat sa ingon dili na angayang magdugay pagpanirbisyo pagka pulis angayan silang palagpoton sa sirbisyo. Sa samang bahin gikonpirmar ni Governor Yebes nga nakigkita kaniya si Maclang sa iyang buhatan sa kapitolyo niadtong Enero 9, 2008 panahon nga Muslim holiday uban sa laing usa ka taas nga opisyal sa PNP nga mikortesiya ngadto kaniya.

Matud pa sa gobernador ang usa ka opisyal sa PNP diin nakuyog si Maclang igo ra mikortesiya kaniya ug wala silay laing gihisgutan kay iyang giingnan daan ang naha-una nga dili sila maghisgut kabahin sa iyang isyu. Gibutyag usab sa goberna-dor nga sa maong higayon pa usab niya mahibaw-i nga brother diay sila sa Free Masonry apan mas ubos niya kini ug ranggo. Apan sa pikas nga bahin laing tinubdan gikan sa Camp Hamac ang mibutyag nga ang tuyo ni Maclang makigkita kang Governor Yebes kay gusto kini makig-areglo ug mangayo ug pasaylo aron usab sa paghangyo nga isibog ang kaso nga gipasaka ni kanhi Konsehal Joseph Herrera batok kaniya kay maoy nakababag sa iyang promotion.

Sumala pa si Maclang mipasalig nga dili na siya mobalik sa Dipolog kay mobalik na siya sa kauluhan uban ni Police Senior Superintendent Mario Yanga ug General Jaime Caringal nga gikatahong maoy sunod mangulo sa Criminal Investigation Division Group sa PNP Camp Crame. Apan ang tinubdan gikan sa Camp Hamac nagkanayon nga ang pagpa-ubos karon ni Maclang usa lamang ka lansis para masibog ang kaso ug gawasnon na kining makabalik pagka hepe sa Dipolog Police. Samtang si Governor Yebes nagkanayon nga kon unsa may kaso nga giatubang karon ni Maclang kini magapadayon ug dili isibog. (Press Freedom, Vol. XX No. 14)

 
 

 HULAGWAY BALITA

 

Produktong ZaNorte naka-abot sa Canada

Gipasigarbo karon sa Zamboanga del Norte Association of Village Enterprise (ZALABAVE) human ang gihimo niining souvenir product ang adunay mipalit og usa ka gatos kabuok  gikan na sa nasud sa Canada.

Suma pa ni Mr. Climaco V. Villanueva, Jr., Consultant on Cooperative & Livelihood sa Zamboanga del Norte-Technology & Livelihood Development Center (ZN-TLDC) nga gipasigarbo nila ang gihimo karon sa ZALABAVE nga gawas nga makatabang kini sa atong lalawigan, dako usab kini’g ikatabang sa mga katawhan sa Zamboanga del Norte. Dako kaayo ang kalipay sa TLDC sa maong pagkahalin sa ilang mga produkto dili lamang dinhi sa atong nasud kondili lakip na ang mga foreigners ang nakagusto na sa mga produkto nga hinimo sa mga taga-ZANORTE.

 

Gikahibaloan nga ang ZALABAVE nga tindahan anaa nahimutang sa Gloria de Dapitan, dakbayan sa Dapitan ang namaligya kini’g mga produkto nga hinimo sa mga membro sa Lando BIBO gikan na sa nagkalain-laing kalungsoran ning lalawigan sa Zamboanga del Norte. Nasayran usab nga mokabat sa 30mil ka pesos kapin ang halin sa tindahan sa ZALABAVE sulod sa bulan sa Disyembre 2007 hangtod Enero 15, 2008.

Sa samang bahin, usa ka consultative meeting  sa TLDC uban na ni Governor Rolando E. Yebes ang ipahigayon karong Enero 18, 2008 sa ZN-TLDC Training Room sa may alas-dose sa udto hangtod alas-dos sa hapon. Pagahisgutan niini ang kalamboan ug kaayohan sa maong buhatan alang na ning atong lalawigan ug ipahigayon usab ang induction sa mga bag-ong napiling mga opisyales sa ZALABAVE. (Southpoint, Vol.1No.3)

*

 

CITY GOV'T SHOULD BE RESPECTED – ATTY.RUIZ

Angayan respetoan sa kagamhanang probinsyal unsay proseso sa balaod mao gayud ang pagasundon. Kini ang nahimong pamahayag ni City Legal Officer Cyril Ruiz sa dihang gitakdang pagabuksan sa probinsya ang bag-ong nahuman nga Zamboanga del Norte Medical Center human gi-isyu sa Department of Health ang License to Operate alang sa maong hospital bisan ug wala pay Occupancy Permit.

Si Atty. Ruiz sa interview sa DXFL local radio station mipahayag nga bisan pa kon ang probinsya nakabaton na ug lisensiya para sa operasyon sa hospital apan wala kini magpasabot nga dili na kinahanglanon ang Certificate of Occupancy nga pagaluwatan sa kagamhanang lokal.

Maud ni Ruiz, lahi ang proseso sa balaod nga gisunod sa Department of Health kabahin sa pag-isyu ug License to Operate alang sa hospital ug lahi usab ang rules and regulations nga gisunod sa usa ka local government unit kabahin sa pag-isyu ug Permit of Occupancy alang sa usa ka edipisyo.

“Duna kitay balaodnon nga gipangsubay sama sa Building Code nga gikinahanglan mangayo sila (Provincial Government) ug Occupancy Permit.” Subay sa mga regulasyones nga gisunod sa siyudad mao ang Water Code, Sanitation Code, Sanitary Engineering Act, Pollution Control Act, “mao ni balaodnon nga ang local government unit dunay kalambigitan ug kaakohan sa pagtan-aw nga ang mga establishemento sama sa hospital magsubay gayud sa mga balaod ug dili maka-endanger sa atong environment.”

Gipasabot sa City Legal Officer nga ang dakbayan sa Dipolog igo lamang nagtuman sa iyang kaakohan pinasikad sa balaod diha sa pagsanong sa mga proseso sa pagatukoron nga mga edipisyo ilabi na ang hospital nga dili kuyaw sa atong environmento. Kon nalangan man ang pag-isyu ug Certificate of Occupancy tungod kay anaa pa sa prosesso sa pag-evaluate ang Inspectorate Team sa city hall mahitungod sa rekesitos nga gisubmiter sa contractor, ang Metropolis Construction.

Gipasabot ni Atty. Ruiz nga tungod sa kataas sa holiday season ug nalinga sila sa mga kalihukan sa pasko hinungdan nga wala magkatagbo ang Inspectorate Team alang sa evaluation sa mga requirements nga gisubmiter sa contractor. “We are now in the final stages of evaluating.” “Bisan pa ug na-isyuhan na sila (Provincial Government) ug license to operate apan morespetar lang gihapon sila sa amoang katungod sa City Government nga moisyu ug Occupancy Permit.” Matud ni Atty. Ruiz, dili bastabasta sila mo-isyu gilayon ug permiso ngadto sa probinsya gumikan kay ila pang giayo ug subay kon gisunod ba sa contractor ang ilang gipangayo nga mga requirements ilabi na nga ang Sewerage Treatment Plant kon STP nga maoy usa sa gipahimutang sa Zanorte Medical Center nga bag-o kini dinhi sa dakbayan sa Dipolog hinungdan man gani nga ang City Government nag-hire gayud ug Sanitary Engineer expert sa Manila aron maoy molantaw sa maong planta, “there maybe toxic and hazardous waste which maybe generated as the result of the operaton of this very big medical center.” Ang atong trabaho mao man gayud ang pagtan-aw nga ang interest sa atong katawhan ug ilang panglawas atong mapanalipdan.”

Gipahayag ni Atty. Ruiz nga ang Sanitary Engineer nga ilang gi-hire sa Manila dunay mga comments human nila gihimo ang akto nga pagsubay sa Zanorte Medical Center. “We are now in the process of evaluating the comments of our technical expert.” Matud sa City Legal Officer nga ilang gipaningkamotan nga ma ‘simplify’ ang issue aron sa madaling panahon masulbad ang problema mahitungod sa issuance sa Certificate of Occupancy kay mao usab ang tuyo sa siyudad nga maka-operate ang hospital kay ang mga katawhan man niini ang maserbisyoan. Gihimong ehimplo ni Atty. Ruiz ang kagamhanang probinsyal nga nag-obserbar ug prosesso sa balaod sama sa issuance sa sand and gravel permit. “Wala man sab mi ma-isyuhe pa gyud.”

“Ang Provincial Government mibalikbalik man sab pagsulte nga kinahanglan atong proteksiyonan ang environment…so we are abiding…by that, naghulat me kon kanus-a mi nila tagae nila ug sand and gravel permit.” Kon ang City Hall misanong nga dili magkuha sa balas ug graba sa Layawan river kay walay sand and gravel permit, mao usab unta kini ang angayan sundon sa Capitol nga mosunod unsay proseso sa balaod. Si Ruiz nga mikompara sa ilang pagsanong sa prosesso sa balaod, ang mipahayag nga kon ang usa ka edipisyo nagkinahanglan ug permit of occupancy gikan sa kagam-hanang lokal gikinahanglan usab nga respetoan sa Capitolyo provincial.

Iyang gipasabot nga sila sa kagamhanang lokal sa Dipolog bisan kon daghang mga katawhan sa barangay nagreklamo nga naguba na ang ilang mga dalan ug nadelatar ang ilang mga proyekto gumikan kay wala silay kakuhaan sa balas ug graba tungod kay ang probinsya dili mo-isyu ug sand and gravel permit, padayon kini nilang girespetoan ug wala sila mireklamo niini. Sama ra usab nga kon ang City Hall mipatuman sa prosesso sa balaod diha sa pag-comply sa tanang rekesitos ayha ihatag ang Certificate of Occupancy, angayan usab kini pagasundon sa kagamhanang probinsyal. “Kon ang ilang tumong ug katuyoan mao ang pagprotiher sa environment sama ra usab nga ang tumong ug katuyoan sa atong City Government pagprotiher sa atong environment ato sad gi-follow ang prosesso aron ma-garantiya nato nga maayo nato pagkabantay ang mga prosesso nga dili unya maapektahan ang atong mga katawhan.”

Nahimong reaksiyon sa city legal officer sa dihang gipahayag ni Governor Lando Yebes nga andam mobayad ug multa ang probinsya kon ugaling pagamultahan kini sa siyudad diha sa pagbukas sa bag-ong tambalanan bisan wala pa gi-isyu ang Certificate of Occupancy. Mahitungod sa mga komentaryo nga “Usad Pagong” ang pag-isyu ug Certificate of Occupancy sa City Hall, samtang ang kagamhanang probinsyal andam mobayad ug multa, gipahayag ni Atty. Ruiz nga siya nagtuo nga ang mga opisyal sa probinsya sama sa kagamhanang lokal sa Dipolog nagsunod ug proseso sa balaod.

Matud ni Ruiz, kon “Usad Pagong” ang City Hall, makaingon usab siya nga Usad Pagong ang Capitol kay wala man gi-isyu kanila ang sand and gravel permit. “Ako nagtuo nga ang atong mga provincial official si Governor Yebes ug sa City Government Official nga pinangulohan ni Mayor Uy are really doing their duties without any political considerations without other consideration except the public interest.”

“Kato pod diay among gipangayo nga sand and gravel permit Usad Pagong pod diay tong tua siya.” Gipahayag sa City Legal Officer nga ilang gipaning-kamotan nga mapadali ang pag-isyu ug Occupancy Permit tungod kay mao kini ang usa sa mga rekesitos ayha hingpit nga maka-operate ang Zamboanga del Norte Medical Center. (The New Nandau, Vol. XVII No.28)

*

 

Pulso Sa Katilingban
Cicer M. Binghay
Kanus-a taman ang bugas?

Gumikan sa bikil sa politika, bikil tali City Mayor Belen Uy sa Dipolog ug Gov. Rolando E. Yebes dili basta mahilot pinaagi sa “gentlemen’s agreement”. Angayan dinhi “i-theme song” sa duha, ang “I’ll Never Smile Again”.

Salapi peso batok dolyar gihatod sa 41 pesos-vs-1 dolyar. Matod pa ang pagka dako sa kantidad sa atong salapi maoy naka “stabilized” sa atong ekonomikanhong kahimtang. Kini dili malalis. Pero nakabantay kita nga gumikan sa pagkunhod sa kantidad-vs-dolyar naapektohan dinhi mga OFW nga nahanayak pagpangutang dayon bayad pinaagi sa installment. Imbis dako ang dolyares ilang mapahimoslan sa panahon nag P55.00 ang pesos sa usa ka dolyar nanaog hinoon sa lamang P41.00. gani mosangko pa kini diha sa P40.00.  Naapektohan usab atong mga gisuportahan sa OFW nga mga ginikanan nga dunay gipatongha.

Makalibog hunahunaon mga palaliton ilabi na ang mga tambal walay hunong nga nagkataas ang mga presyo. Unta dako na ang kantidad makapalit atong pesos niining pagkunhod sa dolyar. Dili usab makatabang ang pagtubo sa kantidad sa atong pesos batok dolyares pagkunhod sa gasolina ug krudo ug ubang mga produkto sa oil. Nagpabilin walay makabuot sa kalihokan sa OPEC kanang pundok sa mga kanasoran nga nagtikad sa oil sa tibook kalibotan.

Karon pa sukad, kopras tag 23 pesos ang kilo. Karon pa nga nahurot-hurot atong punoan sa mga lubi pagpamaligya sa taga coco lumber sawmill. Karon pa nga nagmahal mga palaliton. Karon pa nga dili masabot ang lihok sa panahon. Bitaw namatikdan dili maato-ato sa taga PCA ang/pag implimentar sa pagpaturagas sa atong mga katawhan pagpamuril sa ilang mga lobi bisan ang punoan niini makabunga bisan pila ka mga tuig. Mga smuggle sa pagpamuril lobi iatol adlaw’ng Domingo. Iatol nga niining panahona walay taga PCA makabantay. Bisan pa panahon sa “working days” miskino ang personahi sa maong ahensiya nga dili intawon makahigayon sa ilang pagpugong.

Mao baya nga mulihok dinhi atong mga barangay chairmen sa kabarangayan nga moayuda sa taga PCA pag implimentar sa balaodon nga dili putlon ang mga lubi nga makabunga pa. Kadto lamang mga lobi nga tigulang ug dili makabunga o kaha naputol o natumba gumikan sa bagyo. Dunay purohan nga walay pulo ka tuig karon atong kalubihan wala nay makita. Niining panahona walay hingusog kampanya sa coconut replanting. Kini usa unta ka kampanya sa PCA pero sa mao gihapon nga katarongan, kulang sila sa personahi ug hustong “funding” pag implimentar sa ilang maayong programa.

Mga kabataan nagtungha sa elementarya dili na absenero. Ang bugas nga giapod-apod alang kanila maoy nakadasig sa ilang pagtongha. Gani ang mga ginikanan nga kanhi wala kaayo mopakitag kahilig pagpatongha sa ilang kaanakan mao kanunay ang nag monitor kon ilang kabataan nagtongha wala ba mo “absent”. Asa tuod kita karon makakita pag programa nga mga pupil sa elementarya tinagaan bugas matag tungha…humay pa… mimis pa kanindot sa bugas.

Ang pangutana. Maagwanta kaha sa kagamhanan ang pag apod-apod bugas hangtod? Hangtod kaha kining maong programa? Sukad wala pay presidente sa nasod nakahimo sa maong programa nga maka apod-apod sa bugas nga maoy gikinahanglan sa katawhan matag adlaw. Nakatabang usab kini sa tanang mga mag-uoma nga wala na matikad sa ilang kaumahan gumikan sa dili masabot panahon. Flash floods, bagyo, nagkalit-kalit kusog bunok sa ulan. Natural disasters have continuously been hitting our country. We are still reeling from the effects of one disasters then another.

Kining nagkadaiyang katalagman, is it God’s divine way of demonstrating His absolute control over us as a people? Reminding us that we have forgotten Him? Or a signal, a message and warning due to our worldly possessions, power and prestige pagpasulabi nianang never ending vindictiveness and our unforgiving spirit pamolitika? (Press Freedom, Vol. XX No. 15)

 
Credits: Press Freedom is published every Saturday and entered as 3rd class mail matter in Dipolog City. Printed by Young Printing Press with Editorial Office located at Upper Turno, Dipolog City. Tel. No. (065) 212-4343 or 212-6665

 

Dipolog-Polanco Irrigators Association nangayo karon ug pakitabang sa City Hall ug Capitol
Irrigation dam sa Layawan river nabarahan ug yuta
800 ektaryas basakan walay tubig

 

Mokabat sa 800 ektaryas nga basakan gikan sa Polanco lahos na nganhi sa dakbayan sa Dipolog ang maglisod ug supply sa tubig kon padayon nga dili mahatagan ug hinanaling aksiyon ang nabara nga yuta ug balas sa Irrigation Dam sa, Layawan River. Kini ang gipahayag ni Mr. Ildefonso Jimenez, Presidente sa Dipolog-Polanco Irrigators Association samtang nangayo siya karon ug pakitabang sa kagamhanang lokal sa dakbayan sa Dipolog ug sa probinsya nga mahaw-as ang yuta ug balas nga nakabarado sa Irrigation dam sa may main canal sa Layawan River nga naka-apektar karon sa dakong basakan sa mga mag-uuma.

Matud ni Jimenez mao kini karon ang dakong problema sa ilang assosasyon gumikan sa nagsunodsunod nga ulan ug pagbaha, mga sagbot, yuta ug balas didto misera sa baba sa dam hinungdan nga dili makasulod ang tubig sa main canal nga maoy nagsupply ug tubig sa halapad nga basakan gikan sa Polanco, Sinaman, Turno, Sta. Felomina, Galas, Olingan ug Punta ning dakbayan sa Dipolog. Sumala pa ni Jimenez, magduha na ka semana nga nangayo sila ug pakitabang sa kagamhanang lokal sa dakbayan sa Dipolog alang sa pagamit ug mga ekipos aron mahaw-as ang mga sagbot ug yuta nga maoy nakabarado sa irrigation dam sa main canal sa Barangay Dapdap sa Layawan River apan hangtud karon wala pay aksiyon. Gumikan kay gikinahanglan man gayud nga mapadali ang pagkuha sa nakabara nga mga yuta, balas ug sagbot, iya gayud hangyuon ang siyudad sa Dipolog nga kon mahimo matabangan sila sa ilang problema.

Gipahayag sa presidente sa Dipolog-Polanco Irrigators Association nga tingtanum na karong mga panahona busa nagkinahanglan gayud sila ug tubig sa basakan. Si Provincial Atty. Jes Gal Sarmiento ug mao usab karon ang PED-Officer sa probinsya namahayag nga andam nilang tabangan ang Irrigators Association apan maghulat pa sila kon unsay aksiyon pagahimoon ang siyudad sa Dipolog. Iyang gipaklaro nga ang kagamhanang lokal sa dakbayan sa Dipolog nagkinahanglan pa’g mangayo ug permiso sa kagamhanang probinsyal sa Zamboanga del Norte kon ugaling ilang kuhaon ang yuta ug balas nga maoy nakabarado karon sa irrigation dam sa main canal sa Dipolog Polanco Irrigators Association.

Matud ni Atty. Sarmiento, dugay na nilang gikasabotan sa National Irrigation Administration kon NIA uban na sa Dipolog-Polanco Irrigators Association lakip na ang siyudad sa Dipolog nga aplayan ang Area Clearance ug ang Environmental Compliance Certificate kon ECC ayha molugwa ang Gratuitos Permit sa pag-quarry sa balas ug graba sa Layawan River. Apan gumikan sa problema sa Irrigators Association, ilang nakab-ot ang kasabutan nga mintras wala aprubahe ang Area Clearance ug ECC nga gi-playan sa Dipolog ngadto sa Mines Geo-Sciences Bureau kon MGB sa rehional nga buhatan sa Zamboanga, mahimo nang kasugdan sa siyudad ang pagkalot aron mahaw-as ang nakabarado nga balas ug yuta sa may irrigation dam sa Layawan River. 

Sa dihang gisubay ni Atty. Sarmiento didto sa MGB, Zamboanga City gibutyag sa regional director nga walay application ang kagamhanang lokal sa dakbayan sa Dipolog para ECC sa ilang buhatan. Usa sa mga opisyal sa dakbayan miingon nga ang ilang Area Clearance application atua nila gi-file sa EMB ug dili sa MGB. Para sa provincial attorney, nasayop ang prosesso sa application sa siyudad kay naa-abante na hinoon ang pagpadagan sa papel kay sigon sa regulasyon, unahon una ang pag-apply ug Area Clearance ngadto sa MGB ayha aprubahan ang ECC ngadto sa EMB kon Evironmental Management Bureau. Apan bisan pa niini, gipahayag ni Atty. Sarmiento nga ilang lantawon kon unsay aksiyon sa kagamhanang lokal sa dakbayan sa Dipolog mahitungod sa hinanaling hangyo sa Dipolog-Polanco Irrigators Association ayha sila mohimog lakang. (The New Nandau, Vol. XVII No.28)

 
 

PEDO OPTNS. CHIEF NANGILKIL?

Natay-og karon sa dakong eskandalo ang Provincial Environment and Development Office kon PEDO sa dihang gikatahong nagpa-interview sa local media si Mr. Ernesto Tan, tag-iya sa Mediatrix Homes Developer nga walay lipod-lipod nga miakusar kang Mr. Remelo Damuag, Operations Chief sa maong buhatan nga nangilkil kaniya ug syento singkuwenta mil ka pesos (P150,000.00) bugti sa pagpalugwa sa quarry permit nga iyang gi-applayan sa probinsya.

Mao kini ang matud pa, gibutyag ni Mr. Tan sa interview sa usa sa mga lokal radio station dinhi sa dakbayan sa Dipolog kinsa mipabate sa iyang reklamo nga kanunay’ng dakpon sa mga personahe sa PEDO ang iyang mga sakyanan nga maghakot ug yuta sa iyang gipabungkag nga bungtod sa Dicayas para sa iyang housing project sa rason nga wala kini permit. Matud pa sa usa sa mga empleyado sa Mediatrix nga dili magpaila mikonpermar nga sa matag sakyanan nga madakpan sa PEDO, si Mr. Tan pangayuan sa operations chief ug singkuwenta mil ka pesos bugti sa pag-release sa sakyanan.

Sa walang bahin mao si Mr. Remelo Damuag, Operations ChiefProvincial Environment and Development Office kon PEDO ug sa tuong bahin mao si Atty. Jes Gal Sarmiento, Provincial Attorney.

Sumala sa interview sa DXAA-FM, si Mr. Tan mipahayag nga duna siyay ikapamatuod sa iyang alegasyon pinaagi sa “voice tape record” ni Mr. Damuag nga nangayo kaniya ug kuwarta. Wala hinoon ikabutyag ni Mr. Tan kon si Mr. Damuag nakadawat ba sa iyang gipangayo nga salapi kay ang gisulte lamang niini nga nangilkil ngadto kaniya. Nasayran nga si Mr. Tan nangayo karon ug pakitabang sa Dipolog Chamber of Commerce and Industry gumikan sa kalangan sa pag-isyu ug quarry permit para sa iyang housing project sa Dicayas.

Matud pa ni Mr. Ernie Rojo, Executive Director sa Dipolog Chamber of Commerce and Industry nga atol sa ilang meeting sa Board of Directors, usa sa ilang gituki ang sulat-reklamo ni Mr. Tan.

Matud ni Rojo, si Mr. Tan nga usa sa mga membro sa Dipolog Chamber miduso sa iyang problema mahitungod sa iyang pag-apply ug permit sa provincial capitol alang sa pag-quarry sa yuta para itambak sa iyang housing subdivision projects gumikan kay nakahinagbo ug kalangan. Nasayran nga si Tan dunay housing project sa Dicayas ug maoy iyang gusto nga patagon ang nabungtud nga yuta ug ang uban hakoton alang sa pagtambak. Kini mi-apply ug quarry permit sa probinsya apan hangtud karon gisigihag dakop ang iyang mga dumptruck kay wala hatagig permiso sa Kapitolyo.

Si Mr. Tan mialegar nga ang operations chief sa PEDO ang nangilkil kaniya ug kuwarta para mapalugwa ang permit. Atol sa board meeting, nauyonan sa mga membro nga ila una subayon unsay hinungdan sa kalangan sa prosesso sa pagpalugwa sa quarry permit nga gi-applayan ni Mr. Tan ayha ang chamber mohimog lakang mahitungod sa maong reklamo. “Ang stand namo (DCCI) to get the facts. The primary aim of the chamber is to help our member businesses in Dipolog City and the province of Zamboanga del Norte. As of now, the decision of the board is to look into the facts and study the facts presented by our member Mediatrix Homes.”

Human mogawas ang maong balita sa DXAA, si Mr. Tan ang dili na magpa-interview pa ug laing membro sa media sa wala pa mahibaw-eng rason. Gisulayan unta ning pamantalaan ug tawag sa iyang opesina si Mr. Tan apan ang iyang staff kanunay nga mobalibad kay milakaw. Atty. Jes Gal Sarmiento, Provincial Attorney mikonsederar nga usa ka seryoso nga alegasyon ang gibutyag ni Mr. Tan. Kusganong gihimakak ni Sarmiento nga iyang gisugo si Damuag aron mangilkil sa Mediatrix Developer. “Wala ko gasugo kang Mr. Damuag nga mangayo ug kuwarta kang Mr. Tan”

Wala na mihatag ug dugang pamahayag ang provincial attorney kay wala siya makadungog sa maong balita sa DXAA. Maoy iyang gusto nga makadungog sa tape recorded ug kopya sa maong balita sumala sa gipamahayag ni Mr. Ernesto Tan nga matud pa, nagpa-interview ug media aron kahimoan niya ug aksiyon. “Wala ko kadungog sa balita”. Sa interview, si Mr. Remelo Damuag mihimakak sa alegasyon sa Mediatrix Developer nga nangilkil siya ug kuwarta. “Iya lang nang gihimo kay nasuko siya (Mr. Tan) nga among dakpon iyang sakyanan kay walay permit ang paghakot sa yuta.” Nagtuo si Damuag nga si Mr. Tan gigamit sa kagam-hanang lokal sa Dipolog aron sila dauton kabahin sa wala pag-isyu ug sand and gravel permit sa probinsya. Para niya, usa ka libelos ang gibuhian nga pagdaut ni Mr. Tan ug nagplano siya karon nga mopasaka ug kaso.

Gihagit ni Damuag si Mr. Tan nga ipagula ang gikaingong “voice tape record” nga negosasyon sa iyang pagpangilkil. (The New Nandau, Vol. XVII No.28)

 

Credits: The New Nandau is a member of the Publishers Association of the Philippines (PAPI). Editorial office is located at 076 Quezon Avenue, Dipolog City with Tel. No. (065) 212-3794; Cell No. +639205201041

*

MORE NEWS NGA BINISAYA

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON