Migamit na usab karon ug laing ngalan ang mga kritiko nga nagpunayg daut sa administrasyon sa kapitolyo diha sa ilang dayag kaayo nga kampanya nga gub-on ang kasamtangan administrasyon, human ilang gigamit lamang ang pangalan sa supplier nga 168 diha sa pagduot sa provincial tourism officer sa lalawigan, kalabot na sa isyu sa pagpanindot sa capitol plaza niadtong nakalabay nga Disyembre.

Si Mrs. Anecita Tan, tag-iya sa 168 Enterprisess diha sa may dalan Rizal ning dakbayan ang mibutyag ning mantalaan, ang supplier nga giingon nga mireklamo sa Amatong media ang kusganon karon nga minghimakak nga wala sila mibuhi ug pulong batok sa provincial tourism nga gipanguluhan karon ni Atty. Ivan Patrick Ang, ilabi na ang kabahin sa balayranan niini.

Hinoon iyang gibutyag nga adunay kinatibuk-an nga P100,000 kapin ang nakuhang christmas lights gikan sa ilang buhatan apan matud pa kini aduna na lay P5,000.00 nga balance tungod kay kanunay man kining gidatahan sa maong buhatan, sigun usab sa katubagan nga gipalanog ni Atty. Ang.

Si Mrs. Tan matud pa nagkanayon nga walay taga media nga miduaw kaniya aron manuhito sa maong transaksiyon, ilabi na gayud nga wala siya mobuhi ug pulong sa media kalabot niini. Matud pa niya wala man gani siya mohimo ug demand of payment letter ngadto na sa probinsiya tungod kay aduna siyay dakong pagsalig niini. Iyang gikumpermar nga sa matag karon ug unya, makadawat siya ug mga advance payment gikan na sa mga empleado sa tourism office, hangtod nga gamay na lang ang nagpabiling balance niini.

Nalambigit ang pangalan sa maong supplier ilabi na ang pangalan sa iyang tindahan human gibatikos sa Amatong media ang buhatan ni Atty. Ang kalabot na sa giingon niini nga mishandling of funds, diha sa capitol plaza beautification, taliwala sa panahon nga nag-andam pa si Atty. Ang sa iyang financial report ngadto sa tanang mga donors niini.

Sa iyang kabahin si Atty. Ang nagkanayon nga mibuto ang maong isyu nga walay bisan usa nga nanginsayod sa iyang buhatan aron nga klarohon ang maong isyu.

“Kung miduol pa sila nako daan, masabtan unta nila ang sitwasyon ug walay mga isyung motumaw kalabot niini tungod kay anaa sa maayong kahimtang ang pagdumala niini,” matud pa sa maong opisyal.

Gituuhang nadayag na hinoon ang tinuod nga katuyuan sa mga nag-isa sa maong isyu nga ang lintunganay politika ra gihapon ug nadalahig lamang ang pangalan sa uban aron nga ipalutaw nga lehitimo ang maong isyu.

Ang tag-iya sa maong tindahan ang gani miduso sa maong pagduda nga naigo lamang siya sa crossfire sa politika sa dihang nalambigit ang iyang tindahan sa maong isyu.

Gituuhan usab ni Atty. Ang nga ang pagkalambigit niya sa maong isyu may kalabot na sa nagpabiling tinguha sa pipila ka pundok nga nagtinguha nga gun-obon ang administrasyon Yebes.

“Dili man gyud kaya nilang maguba si gobernor diha sa mga isyo nga butang-butang lamang, kami nga anaa nagpalibot sa gobernador ang sulayan na sab nilag guba,” matud pa sa maong opisyal. (Mindanao Star, Vol. I No.6)

DIPOLOG CITY-Aron sa pagtino nagsubay ba sa hustong direksyon ang liderato sa kapolisan ning dakbayan diha sa mga lakang ilang gisagop pagsumpo sa nagka gabok karon nga sitwasyon sa kahusay dinhi, kinahanglan nga ihiklad nila ang usa ka komprehensibong master plan atubangan sa konseho. Niadtong Martes, atol sa regular session, gipadas-ug sa konseho ang usa ka lakang nga hatagag 30 days ang Dipolog PNP nga mohiklad sa ilang master plan sa konseho aron lantawon unsa ka lig-on ang mga lakang nga ilang gisagop batok sa misulbong nga kremin dinhi.

Si Konsehal Ricky Mejorada sa privilege speech nga iyang giluwatan atol sa session nagkanayon nga kinahanglan gayod nga batonan sa Dipolog PNP ang usa ka comprehensive practical master plan aron dunay lig-ong giya nga subayon diha sa pagpakigbatok sa hulga sa nagkadaiyang kremin. Sa nasayran, duha na ka kaso sa pagpanulis ang na-hitabo dinhi sulod lamang niining bulana ug ang labing ulahi niini mao ang nahitabo ni Retchie L. Uy, diin gitulis niadtong Sabado sa buntag sulod mismo sa iyang estab-lisimento didto sa Galas.

Gipahayag ni Mejorada nga taliwala ning maong panghitabo, kinahanglan lantawon aron masuta wala bay depekto diha sa mga plano nga gitamdan sa kapolisan sa ilang pagpa-kigbatok ning maong dakong hulga sa syudad. Samtang si Konsehal Horacio Velasco mipadas-ug usab nga labing maayo himo-an pod ug imbentaryu ang tanang mga armas nga gipalit sa syudad para sa kapolisan dinhi aron masuta duna pa ba ni’y igong kapabilidad arang magamit pagdepensa sa syudad.

Si konsehal Peter Y. Co sa iyang kabahin mipadas-ug nga kinahanglan hatagan ug 30 days ang kapolisan nga mohiklad sa ilang master plan gumikan kay kini problema sauna ra niya nga gipalanog apan murag wala magagunok ang mga otoridad. (The New Nandau, Vol. XIV No. 35)

Hingpit nga gisuna kagahapon ni Board Member Uldarico Mejorada sila si Sirawai Mayor Romeo Cariño ug Konsehal Venancio Villalobos, nga diay pulos usab holder sa Integrated Forest Management Agreement kon IFMA didto sa ilang lungsod, kini human angkona sa duruha atol sa special meeting sa Task Force Kalasangan, nga gipatawag ni Gob. Lando Yebes didto sa SP Session Hall kagahapong adlawa, kung sila uyon ba nga magpadayon ang DACON nga mamutol ug kahoy didto sa ilang dapit.

Si Mejorada mitutu ug pangutana sa duruha, ilabi na sa mayor tungod kay mieymbro man kini sa maong task force ug dili maayo nga mosuhi kini sa baruganan sa iyang mga kauban. Si Mayor Cariño, nga miangkong usa ka IFMA holder sa IFMA no. 021 nga nagbaton ug 959 ka hektaryang luna, ang misaysay nga iyang pag-uyon sa operasyon sa DACON tungod lang kay mawad-an ug tarbaho ang pipila ka mga katawhan didto.

Gipanghimakak usab sa maong mayor ang mga radio reports nga nagsaway siya sa gobernador diha sa mga media interviews tungod kay matud pa niya, basin ang gihimong basehanan lamang sa maong mga media reports mao ang iyang pag-uyon sa operasyon sa DACON.

Iya hinoon nga gi-angkon nga human sa pagpakanaog sa Executive Order sa gobernador niadtong Disyembre, nga nagpatuman usab sa kamanduan sa Presidente pinaagi sa DENR nga nagdeklarar ug total log ban nga nalakip ang probinsiya, matod pa wala na siyay laing mahimo gawas sa pag-uyon niini.

Hinoon gi-angkon ni Mayor Cariño nga ang ilang Sangguniang Bayan lakip siya ang mipaduso ug motion for reconsideration ngadto sa presidente, aron nga dili malakip ang DACON sa maong log ban. Ang maong resolusyon nga ilang gipadala sa Sangguniang Panlalawigan ang pasiuna nang gikataho nga dili supportahan sa maong konseho tungod kay supak kini sa baruganan sa TF Kalasangan.

Si Mayor Cariño nagkanayon atubangan sa mga sakup sa maong Task Force nga mitambong siya isip miyembro sa Task Force ug dili isip usa ka IFMA holder. Atubangan kagahapon sa meeting sa maong task force ug atubangan usab sa chairman niini nga si Gob. Lando Yebes nga mao ang nag-preside, si Mayor Cariño ang minghimakak nga mibuhi siya ug mga pulong batok sa gobernador ug sa task force, tungod kay matud pa niya ang iyang gibuhian nga pulong mao lamang ang possibleng displacement sa mga tarbahante niini.

Sa pikas bahin si vice-Governor Francis Olvis isip chairman sa TF Kalasangan Special Concerns nagkanayon nga ang tinguha sa ocular inspection didto sa triple SB niadtong nakalabay nga semana mao ang paglantaw sa mga katawhan nga maapektahan sa maong log ban, apan matud pa niya iya lamang hinoong gikasubo nga sa dihang nahiabot ang insepction team didto sa Sirawai, wala nay tawong nanimuyo sa ilang mga payag ug wala usab sila kadawat ug reklamo gikan sa mga LGU nga apektado ilabi na ang Sirawai. Buot ipaabot sa Bise Gobernador nga wala pasagdi sa Task Force ang mga katawhan nga ma-displace sa ilang tarbaho tungod kay aduna na silay mga plano batok sa maong panghitabo.

Ang iya lamang gipangayo mao ang cooperation sa mga opisyales sa maong lungsod. Sa iyang kabahin si Gobernador Lando Yebes ang miawhag sa tanang mga sakup sa TF Kalasangan nga dalion na nila ang ilang mga report aron nga masugdan na ang consolidation aron nga ikapadala na kini sa mga kadagkoan sa DENR ug ngadto sa Presidente mismo.

Matud pa sa gobernador nga gikinahanglan kaayo nga sa labing dali nga panahon mahuman na ang maong report, tungod kay iyang gipaabot usab ang tukmang aksiyon gikan sa mga agencia sa gobyerno nga nagpatuman sa Executive Order sa presidente. Gikabalak-an sa gobernador nga mahitabo unya sa probinsiya ang mga nagpanghitabong katalagman sa ubang mga lalawigan, diin mingkalas ug gatusan ka mga kinabuhi, tungod sa naghinobrang pagpuril sa atong kalasangan.

Matud pa sa gobernador nga ang environmental protection maoy nag-una sa mga priority programs, tungod kay dako kini ug ikatabang alang sa sustainable growth sa probinsiya, ilabi na diha sa mga katawhan. Giawhag usab sa gobernador nga himoan dayon ug hinanaling aksiyon ang resulta sa ocular inspection sa TF Kalasangan. (Mindanao Star, Vol. I No.6)

Gipahibalo karon sa City General Services Office sa pagpangulo ni Engr. Jose Ocupe ang mga katawhan ning dakbayan nga kanunay magsunod sa eskedyul sa pagkuha ug basura diha sa ilang kabangayan ug likayan ang pagbutang sa ilang sinakong basura sa bisan asang dapit ilabi na diha daplin sa karsada aron malikayan ang pagpasad niini kon koykoyon sa mga iro ug iring. Gisugyot usab ni Engr. Ocupe nga dili ipagawas ang ilang basura diha sa ilang balay kon dili pa eskedyul sa pagkuha niini sa mga basurero aron  dili kini maka-hatag ug kahugaw sa palibot.

Alayon niini, ilang gipahibalo ang ilang eskedyul sa pagpangolekta ug basura palibot ning dakbayan.  Gikan sa Lunes hangtud Dominggo sila mangolekta ug basura sa  Central Public Market ug gikan Lunes hangtud Biyernes mao ang City Proper nga naglakip sa  Quezon Avenue, General Luna, Rizal Avenue, Echaves St., Arcade, Bus and Jeepney  Terminal ug Malvar St.

Samtang sa matag adlaw nga eskedyul, sa Lunes, Miyerkules ug Biyernes  ang ilang serbisyuhan mao ang Barangay Turno, Martes sa Minaog ug Tambak, sa Lunes, Miyerkules, Huwebes, Biyernes ug Sabado mao ang Estaka, sa Martes ug Biyernes ang Biasong, sa Martes, Hu-webes ug Sabado sa Barra.

Dugang eskedyul sa pagpangolekta ug basura naglakip sa adlaw nga Lunes nga mangolekta sa Martinez ngadto na sa Mosque, Magsaysay St., Fish Port, Provincial Hospital, Kati-punan St. ug  Governor’s Village. Sa Martes naglakip sa Villa Maria, Gampis, Sta. Isabel ug Medical Center.  Sa Miyerkules sa Gulayon, Magsaysay  ug Sta. Filo-mena.  Sa Huwebes mao ang Highway Galas,  ug Olingan Relocation.  Sa Biyernes mao ang Relocation sa Dicayas, sa Sabado ang Look Estaka, Surf ug Boulevard,  ug sa Dominggo mao ang Bus Terminal, Malvar St ug Arcade, ug Provincial hospital.

Dugang nasayran nga adunay walo ka mga sakyanan nga mangolekta sa mga basura sa kabarangayan ug kini naglakip sa tulo ka compactor ug usa ka mini-compactor ug upat ka mga dump truck. Gihangyo usab ang ka-tawhan nga mosabot sa mga basurero kon adunay pag-kadelatar sa pagpangolekta ug basura tungod kay dunay mga panahon nga dili mali-kayanang maguba ang sak-yanan  ug maoy makaapek-tar sa gitakda nga eskedyul. (CIO Press Release, lbt)

Kusganon nga gipalanog karon sa mga NGO’s nga nanungha sa maong meeting sama sa NBIGun Club, Western Mindanao Environmental Protection Association nga girepresentahan ni Atty. Dodoy Ubay, REACT Space Group nila ni Engr. Roland Soliva, Michael Malacca ug Nick Nacaytuna ug uban pa ang midasig sa TF nga hayan mapasakaan gayud ug tukmang kaso ang mga responsible sa paglapas sa mga environmental laws, ilang gitumbok ang DACON human matud pa nila tataw ang nadokumento nilang kalapasan niini.

Atol sa panagtigum sa TF Kalasangan niadtong nakalabay nga Huwebes didto sa SP Session Hall ang maong mga NGO’s nga matod pa naghupot ug mga dokumentasyon sa kalapasan sa DACON ang nanawagan karon sa gobernador ug sa Task Force nga human unya sa consolidation sa maong report sa oculaar inspection niadtong nakalabay nga semana, tukmang kaso sa paglapas sa environmental laws ang ipasaka unya batol sa DACON.

Si Michael Mallaca, president sa REACT Space Group dinhi sa dakbayan nagkanayon nga sa ilang kinaugalingon nga inspection niadtong nakalabay nga Oktubre, sila ang nakahipos ug mga kalapasat.

Kini sigon na sa gibutyag ni Mayor Norbie Edding, atul gihapon sa maong panagtagbo. Sa pikas bahin ang bag-ong natukod nga Western Mindanao Environmental Protection Association sa pagpangulo ni Atty. Franklin Ubay ang kusganon nga miduso karon sa ilang pagsalig ug supporta sa mga kalihukan sa Task Force Kalasangan.

Matud pa niya nga anaa sila magpaluyo sa mga kalihukang legal nga himoon unya sa maong Task Force aron nga gukdon gayud ang mga makalapas sa mga environmental laws dinhi sa lalawigan. Iyang gikalipay ang gihimong subsub nga paningkamot karon sa gobernador aron panalipdan ang nagpabiling lasang dinhi sa Mindanao nga anaa sa triple SB dinhi sa lalawigan. (Mindanao Star, Vol. I No.6)

DIPOLOG CITY-Malamposong napanday ang usa ka resolusyon nga nagatugot alang na sa paghatag ug lugway ngadto sa gikatakdang deadline alang sa pagpang-renew sa tanang mga lisensiya sa patigayon dinhi sa dak-bayan, atol sa pagpahi-gayon sa regular nga sesyon sa Sangguniang Panlungsod, kaniadtong Enero 18, 2005.

Kining maong kalam-boan ang nakab-ot human gipadas-ug kining maong resolusyon ubos sa pag-pangamahan ni konsehal Romulo Soliva, diin nagahangyo alang na sa paglugway sa petsa sa deadline alang sa pagpang-renew sa mga business permits nga unang gikatakda sa Enero 20, ngadto na sa Pebrero 18, ning susamang tuig.

Matud pa sa konsehal nga kining nasangpit nga lakang ang iyang gihimo aron usab sa paghatag ug dugang higayon niadtong wala pa maka-parenew sa ilang mga lisensiya sa patigayon nga makahikay pa sa ilang mga papeles.

Dugang pa sa konsehal nga nakadawat usab siya ug sulat hangyo gikan sa buhatan sa mamahandi ning dakbayan alang na sa posibleng paglugway sa maong deadline pinaagi na sa usa ka resolusyon nga paga-aprobahan sa Sangguniang Panlungsod, ning dakbayan.

Hinoon, sama sa milabay’ng mga tuig, pagalugwayan gayud sa Sangguniang Panglungsod ang pagpahigayon sa renewal sa mga business licenses/permits, aron masiguro sa kagamhanang lokal sa dakbayan nga ang tanang mga magpapatigayon dinhi ang maka-renew sa ilang mga lisensiya sa pati-gayon, ug luwas sila sa posib-leng silot nga ipahamtang alang niadtong napakyas sa pag-renew niini. (CIO Press Release, ALB)

Ang P500 mil nga tabang sa barangay ipatuman sulod sa mosunod nga tulo ka tuig. Kini ang giklaro ni Board Member Cedric Adriatico sa pangutana kon tinood ba gayud nga ihatag ang nasangpit nga proyekto para sa tanang barangay sa Zamboanga del Norte nga mobalor ug tag tunga sa milyon ka pesos. Sa samang bahin giklaro usab ni Board Member Adriatico nga kadtong mga barangay diin midaug ang ilang grupo sa partido gawas sa P500 mil pesos nga balor sa proyekto kini mahatagan pa ug dugang pundo para lang gihapon sa lain pang proyekto nga balor ug P200 mil pesos.

Sa kabahin usab sa iyang Provincial Identification Fund, matud pa ni Adriatico si Vice Governor Francis Olvis, nagtudlo gayud ug empleyado nga maoy motutuk alang na sa implementasyon sa ilang mga proyekto gikan sa ilang tagsa-tagsa ka PIF. Kini gidasonan usab sa provincial planning and development officer nga ang mga proyekto nga gipangayo karon sa mga barangay nga mobalor ug tag tunga sa milyon ka pesos ipatuman gayud kini.

Matud pa ni Mrs. Rosevic Lacaya-Ocampo, hinoon dili gayud tanan madungan sa pag-implementar ilabi na nga mokapin sa 600 ka barangay ang tibook probinsiya, kay dili usab kini kaya atubangon sa Provincial Engineering. Sa pagkakaron, matud pa ni Mrs. Ocampo gipa-ilawom na sa evaluation ang gisumitir nga mga program of works para sa mga proyekto sa kabarangayan aron sa pagsuta kon unsay angayang unahon sa pag-implementar.

Kini nga proyekto sa barangay magkinahanglan ug kapin sa P300 milyones ka pesos. Samtang sa laing bahin hingpit nga gipanghimakak ug gisalikway sa Provincial Planning and Development Coordinator sa Zamboanga del Norte ang mga alegasyon nga gipang-embargohan sa administrasyon ug proyekto ang mga barangay nga gisugdan sa napilding administrasyon kon ang kapitan dili mopasilong sa ilang partido sa politika. Si Mrs. Rosevic Lacaya-Ocampo, sa programang Kapihan sa RPN sa 1948 Cafeteria mipahayag nga wala gayud kini sukad mahitabo sa administrasyon ni Governor Rolando Yebes nga ang mga proyekto sa kabarangayan nga gihatag sa miaging administrasyon gipang-embargo ug balik. 

Samtang si Atty. Dante Dalman ang tigpamaba ni Governor Yebes, mipahayag nga sa paglingkod sa bag-ong administrasyon adunay gihimong pag-imbentaryo sa mga materyales ug pagsubay sa nagkadaiyang mga proyekto diha sa barangay aron sa pagsiguro nga ang mga nabilin nga materyales wala mahilabti ug unsay status sa gihatag nga mga proyekto para kon adunay kuwang kini mahimuan ug lakang para matiwas ilabi na gayud kon kini gikinahanglan gayud sa katawhan.

Si Ocampo sa iyang paha-yag nagkanayon nga wala gayud kini himua ni Governor Yebes nga pang-embar-gohan ang mga barangay ug mga proyekto nga hinatag sa miaging pamunuan. Matud pa ni Mrs. Ocampo ang ilang opisina uban sa buhatan sa gobernador ug provincial engineer wala gayud makadawat bisan na lang ug usa ka report gikan sa barangay kapitan kabahin niini nga mga alegasyon.

Gitataw usab sa provincial planning officer nga ang kasamtangang lederatu sa probinsiya komitiba sa paghingpit sa tanang mga proyekto nga naa gisugdan na diha sa mga kabarangayan. Kon aduna may mga proyekto sa barangay nga giusab kini gihimo uban sa konsultasyon sa mga hing-tungdang opisyales sa ba-rangay kon aduna may hangyo nga usbon ang proyekto.

Matud pa usab ni Atty. Dalman kon ang usa ka proyekto nasugdan na sa pagtrabaho dili na kini madali-dali ug kuha o kaha balhin kay mamahimong makaso-han ang gobernador niini sanglit nagbatun kini ug approved appropriation ug ang proyekto gisugdan na sa pagtrabaho. Kahinumduman sa sayu pa gibutyag ni Mayor Gabriel Catane sa lungsod sa Rizal ug presidente sa liga sa mga mayor sa probinsiya nga sa iyang lungsod pipila ka proyekto nga gipamuyok sa mapilding gobernador sa nagsingabot na ang eleksiyon sa Mayo 2004 ang gipang-embargo ang mga materyales sa dihang nakita nga napilde kini sa piniliay.

Pipila niini mao ang pag-atop sa gymnasium sa Barangay Damasing ug perimeter fencing sa Rizal Central School, diin ang mga materyales pagkahuman sa eleksiyon nga napilde si Amatong ang gipangkuha ug balik sa taga provincial engineering. Matud pa ni Mayor Catane maayo na lang kay ilang napugngan ang mga materyales ug gitiwas ang proyekto sa paglingkod na ni Governor Yebes. (Press Freedom, Vol. XVII No. 29)

Asang dapita kaha maka-ingon ang mga katawhan nga kapitolyo wala maayong pagkadumala, aw kung adto ka maminaw sa radyo ni Amatong, wa gyud ni silay ika-estorya nga maayo sa kapitolyo, hinungdan? Sa tataw kaayo nga rason, nga wala silay tinguha nga mahimong balanse basta bahin na sa kapitoyo ang higutan.Wa silay laing tinguha mao ra gyud ang pagbutang ug lapok sa tanang mga nagtarbaho sa kapitolyo ilabi na gyud sa mga sinaligang sakop sa gobernador. Tiaw nimo, tungod kay bisag unsaon nilag birada sa gobernador, gikan sa mga hinungaw sa utok, mga bakak, tumotumo, hangtud na sa ilang mga imahinasyon, ang mga katawhan wa gyud mopalit sa ilang mga isyo, gawas noon adtong mga loyalista kaayo nga sa atong tan-aw nagkahilis na kaayo, tungod ra usab sa dili epekibong pamuhal sa ilang mga announcer, ang uban kanila mibiya na u paminaw kay gihilasan, ug gani sa atong nahibaw-an nalouy na hinoon sa kasamtangan nga administrasyon ug ang ilang paglabanadto na didto sa tinuod nagserbisyo sa katawhan.

Para namo dire sa MinStar, dili gyud maghimpos ang maong pamaagi, kung ugaling politika man ang hinungdan ning tanan, tungod kay ang mga katawhan mat-an pa karon sa buka, bisan gani diha sa mga kabarangayan nga aton nalibot, ang mga tawo didto nagbagotbot, tungod sa punay na lang gyud tawon ug kywakyaw batok kapitolyo bisan kung ang mga isyu wa nagyudkapuslanan paminawon. Matod pa sa mga lumad natong mga higala diha sa Roxas, Katipunan ug Manukan, matod nila, naunsa na man ning radyo ni Amatong, wa na gyud nila silay nakit-ang katarong sa administrasyon ni Yebes?

“Kami gani, giduaw na man sa mga serbisyo sa gobernador bisan dire labing layo na namo nga pinuy-anan? Siguro gibutaan na sila sa sobrang kalagot sa pagkapildi sa ilang gobernador, apan human man ang eleksiyon, angay magtinabangan unta kita aron nga mahiabot na gyud dinhi ang kalamboan sa among dapit, ilabi na sa among panginbuhian.”

Mao kini ang kinsakingkasing pulong sa atong higala nga lumad, dili na karon panahon sa politika, angayan karon sa paghiusa, apan unsaon paghiusa kung adunay gyuy mga binayrang tigpamuhal diha sa media. Gani didto sa 3rd district ang maong pagsibya gidala sab sa radyo nga suod ni Carloto, mao nga didto gubot kaayo ang mga tawo, gisapot na ug maayo matag buntag, kulang na lang tunglohon nila kining ilang giingong ‘simang’ ngamagsisibya. Ang hinungdan personal nga atake na gyud ang ilang gihimo batok sa mga opisyales didto nga nakapildi pod sa ilang amo, buot nimong huna-hunaon, dili naman mga announcer kini sila, mga mersenaryo na ni sila, kay motingog ni sila susama sa juke-box, dili mokanta kung way kuwarta. Na-eskandalo intawon ang taga Labason ug Gutalac, hangtud nga matud pa sa atong mga higala didto, gipul-an na silag paminaw, adto na lang sila sa mga radyo nga nagsibya ug maayong butang, kay sobra na gyud kuno intawon dili na katuuhan.

Busa ang ilang gibuhat didto, gitabangan na lang nilag tunglo ang maong magsisibya, hahahahahaha, pastilan ug madutlan no? Mosamot man gyug kaburot nang dagway, ang usa masamot gyud ug kakarap-karap. Usahay biya dili maayo ikumpiyansa aning kapungot sa ma inosenteng tawo, mosalir baya ni, labi na batok aning mga tawo nga way laing tinguha nga mopukan sa kinabuhi ug pagkatawo sa uban. Dili gyud maayo nga kining mga magsisibya mogamit sa ilang katungod aron nga molapas sa katungod sa uban, tungod kay sobra na kaayo kana nga abuso di ba? Ang katungod nato nga gihatag kanato sa atong Batakang Balaod ug sa kahitas-an wala ihatag ngari kanato aron atong himoong hinagiban aron sa paglapas sa katungod sa atong isig katawo. Usa kana ka dakong paglapas sa sugo sa atong Labaw nga Makagagahum. Ilabi na kung mogamit pa gyud ta’s ngalan sa atong Ginoo aron nga manlupig ta’s atong isig katawo. Hala mooo? (Mindanao Star, Vol. I No.6)

Haskang panimbawot sa balhibos tingkoy sa mga membro sa tinuod nga media practitioners nga nakabase dinhi sa Dipolog-Dapitan, Zamboanga del Norte sa migawas nga balita nga gi-kondinar kuno sa National Media (take note: “National media”) ang insedenteng pagpanumbag batok sa reporter sa doble Ah..Ah.. nga gihimo sa kaswal ni Lando sa Capitolyo. Ang mga surador pong dako nga kauban sa prensa haskang naka bahakhak ug katawa daw ilang giyam-iran ang pag-angkon intawon sa media nga ang mga membro loyal sa pildidong kanhi gobernador. “Unsa...! national mediaaaaa mikondenar? mikondenar sa ilang mataaaaa,” dalang agik-ik ug pangatawa.

“Na-unsa na god na sila oy...magpapansin man gihapon bisan wala nay lahay...hahayyyy....

---------------------------

Dili nimo mabasol ang ubang kauban sa prensa kon mao kini ang ilang reaksiyon tungod kay nasayod sila kinsang utok ang nagpatuo-tuo nga kuno ikondenar ang nahitabo ni Winnie Montallana. Matud pa gud atol sa tigum sa Press Club, si James Verduguez nga maoy presidente sa maong kahugpongan mapugsanon kaayong mipahungit sa iyang kinoloskolos nga baruganan nga i-kondenar kuno ang nahitabo ni Winnie nga gisumbag sa kaswal sa Capitol kay nahitabo kuno kini samtang manginterview unta sa provincial accounting. Apan si Prosecutor Ruben Legorio nga membro usab sa Press Club nga nakasabot sa katuyuan ni Verduguez wala magpadala, mibaraw sa sugyot ni James kay kinahanglan pang dunay imbestigasyon himoon. Matud ni Legorio, kinahanglang sutaon unta unsa gyud ang tinuod nga nahitabo, dili kay motuo lang “kita sa pikas side nga wala pa nato masubay ang kinauyokang hitabo.”

Wala gyud intawoy mikagat sa mga membro sa Press Club sa kinulos-kulos nga sugyot ni Verdugo este Verduguez. Unsaon na lang kahag kining tawhana maoy ma huwis no? magsalig lang sa testimoniya sa usa ka tawo dayog kondenar. Patay! sa maka una lang unyag ngaab daug na. Mao na dagway na roy bag-ong defination sa gitawag ug due process.Towewew!!!!!!!

---------------------------

Natingala nalang ang ubang membro sa prensa nga gikondenar naman hinuon kuno sa national media, nagkanayon ang aw aw sa opaw!..Ha..Ha  Ha...Wala gani ang lokal media nag-kondenar, ang national media na nuon...Ha..Ha..Ha...Nah...mao nani karon. Mao na nga dili gyud mabasol ang ubang media practitioner dinhi kon maoy ilang gipakitang reaksiyon (dalang yagayaga ug yam-id)  tungod kay matud pa nila, “hilas ra kaayo kining mga tawhana nga magpapansin japon bisag wala nay lahayyyy....”

---------------------------

In the first place, si Winnie dili membro sa Press Organizations (ZN Press Club, City Press Club, ZNUC, Zambo. Del Norte Broadcasters Asso. ug uban pa) dinhi sa Dipolog-Dapitan ug Zamboanga del Norte. Dili pod kini accredited sa KBP isip lisensiyado nga magsisibya ubos sa regulasyon ug balaod sa Kapisanan ng mga Brodkaster nang Plipinas. Sa ato pa, iya ra kadto sa pamantalaan ug radio ni Mr. Ex ang deklarasyon nga ang usa sa ilang inulog-ulogang reporter ikondenar ang hitabo.

---------------------------

Daghan man pod ang naluoy sa nahitabo ni Winnie. Apan si Winnie biktima lang sa ulog-ulog nila ni Polpol ug Mr. Ex. Dunay nangutana kon si Cantone...iro pa kaha ang nasumbagan o kaha si Mr. Tinudloan, haskang daghanang mikomentaryo “maayo unta si Suringiw o kaha si Boringog ang nasumbagan kay haskang mga hamboga.” Mao gyud kini ang sagad nga estorya sa uban nga gihilasan na kaayo aning duha nga ang ilang sura, mao na usab karon ang gidangga sa mga tawo ngadto kanila. O kaha kon sila pang duha  ang nasumbagan daghan dagway pod sigurong maglagot. maglagot nganong sumbag ra, wala pakapini ug bugsok. Hahahaha!!!!

---------------------------

Nia ra ba intawoy tingog aning cantone...iro, hilabihang pagka langgisa gyud kaayo. Mura bitaw’g tingog anang dahon sa sibuyas nga kalingawag bulhot-bulhot sa mga bata. Unya di ra ba gyod ma-uwaw manghambog nga siya na kuno ang pinaka-ngilngig nga komentarista karon dinhi. Niangkon pa ang tortugok nga komentarista kuno siya. Kumentarista sa iyang nawong burot! Wa man gani’y direksyon nang iyang diskusyon or tsika ba na. Mag-agad lag unsay i text sa iyang mga agalon, dayon pasanginlan dayon ang publiko nga maoy nag text.Wa gyod tay makuhang leksyon anang iyang tagaw-taw. Unsaon na lag manakod nang iyang ‘virus’ sa mga tinun-an sa ABC nga nagpahigayon sa ilang internship? Pagkadaghannn na unyang suringiw sa Dipolog!

---------------------------

Hapit ma gisi ang baba ni Tinudlo-an dihang nanawag kunohay sa iyang peryahan, este, programa diay, ang ginganlag pedro bato.Kay lagi misimpatiya kuno niya si pedro sa kaso nga iyang gisagubang. Misamot ka tagingting ang agik-ik sa kanahan dihang miingon si pedro nga “ako bilib kaayo ko nimo mer.” Pero dihang miingon si Pedro bato nga “...kuan man gud ka mer, kanang, near-sighted man gud ka...,” kalit lang giputol ang linya. Niingon dayon si Tinudlo-an alyas boringog nga naputol kuno ang linya ni pedro.Pero nakaatik biya dayon ang uban. Kay lagi kini si pedro suwapang kuno ni kaayo ug mas labaw’ng nasayod si Tinudlo-an nga pataka ra ning tawhanag pangunay. Mao kuno to nga pag-ingon ni pedro ug near-sighted, giputol dayon ni Tinudlo-an ang linya kay naapsan niya nga ang mga tirada ni pedro didto na gipuntariya ug sugod sa iyang tinan-awan.nahadlok siyag unayon ug kalit ni pedro diha pa gyod sa iyanag programa.Dunay nangutana: kay ngano unsa man diay tinan-awan aning tawhana? Na, kon kami inyong pangutan-on dinhi sa HANTAKAN, ang among ikasugyot mao ra gyod ni: adto-a ninyo si Tinudlo-an ug hangyo-a nga hubo-on kadyot iyang antiyohos nga lagitom kaayog bildo aron inyong masaksihan ang iyang kyut kaayo nga tinan-awan. Hahahaha!!!!!!!!!

---------------------------

Pwerting tirada ni Tinudlo-an sa TF Kalasangan kay palpak lagi kuno ang lakaw. Dayog hisgut-hisgut ug balaod nga wa kunoy katungod ang kapitolyo nga manghilabot sa operasyon sa dakon. Kon ato bitaw’ng huna-hunaon pag-ayo ning isyu sa DACON usa ra man gyud ang dugokan ani ba ug kini nga punto ma sumada nato aning 2 ka pangutana: Una, mo sugot ba ta nga ma-opaw sa hingpit ang atong probinsya sama sa ulo sa iyang amo? Ikaduha, mosugot ba ta nga bahaan ug lunopan unya sama sa nahitabo sa Ormoc ug ang sa Luzon niadtong Desyembre? Kay ang liderato sa kapitolyo karon nagtan-aw man nga ilikay ang katawhan aning mga kalamidara, dan makaingon ta nga dalaygon ang ilang gibuhat. Gani, suportado man ni sa mga NGOs sama sa grupo mismo ni Bishop Manguiran. Kon makapasalig pa unta nato si Tinudlo-an nga siya ray ma igo ug naa na unyay katalagman, simbako palayo, niana, murag mopagakpak unta ta sa iyang mga yama-yama diha sa iyang programa. Pero lagi kay ang iyang agalong opaw wa may aksyon aning problemaha dihang mao pay nagbatog sa kapitolyo, karon nga ang publiko na mismoy nabalaka gumikan sa sunod-sunod nga katalagman, ni-a intawon ning mga aw-aw, nag sige gyog paghot aron siguro matabunan ang palpak sa ilang amo. Unsa man Tinudlo-an, gusto gyud ninyo nga ang atong nahibiling kalasangan sa triple SB maupaw na gyud sa hingpit sama sa bagol-bagol sa inyong amo? Unsa man ning inyo, panabla? Soloha ninyo diha!

---------------------------

Ni-a pay laing estilo nga ilang gipa-aw-aw ni tinudlo-an ay. Gigamit na pod nila ang ngalan sa 168 interprises aron gub-on ang liderato sa kapitolyo. Naningil na kuno ang establisemento sa utang sa buhatan sa torismo sa kapitolyo. Gidudahan pa si Atty. Ang nga miidlom ug porsento sa salapi...naghisgot-hisgot dayon ug balaod si tinudlo-an. Haskang hilasa gyod kaayo.Pero kay palpak puro ang iyang tirada ug pulos pa gyod bot-bot, nahilom dayon ug wa na gyod mag-hisgot-hisgot. Maayooooo unta kon ang bot-bot aning mga tawhana adto na mo toybo sa ilang lubot, dili lang unta sa ilang baba aron malimpyuhan ang kahanginan sa ilang paghugaw-hugaw bahala na kon unya sa ilang paglingkod magtakilid na sila kay mosanglad ang bot-bot. Hapdos ra ba kuno kaayo ning bot-bot ug mosanglad. Hahahahhaha!!!! hangtud na lang sa sunod, atangi ninyo mga suki, himotbutan nato ning mga tawhana bahalag hapdosan sila. Bwahahahah!!!!!!!!! (The New Nandau, Vol. XIV No. 35)