January 24, 2009

 

RELEASE ORDER NI JALOSJOS NAKA-ONG-ONG PA SA DOJ

Anaa na sa mga kamot ni Justice Secretary Raul Gonzales alang sa hingpit nga kagawasan ni Romeo “Nonong” Jalosjos gikan sa New Bilibid Prison tapos giduso ni Bureau of Corrections Director, Usec. Oscar C. Calderon ngadtu sa Department of Justice niadtung Disyembre 24, 2008 ang hangyo niini alang sa rekonsiderasyon sa confirmation sa pagka colonist status.

Si Jalosjos, nagpangidaron karon ug 69 anyos niining tuiga ang nagserbisyo sa iyang sentensiya sa prisohan sulod na sa unsi ka tuig, polo ka bulan ug byenti nuybe ka adlaw niadtung Disyembre 16, 2008 (actual time served). Sa paghatag kaniya ug regular good conduct time allowance (GTCA) ilawom sa Art. 97 sa Revised Penal Code, gihatagan siya ug credit nga duha ka tuig, siyam ka bulan ug byenti syete ka adlaw nga gi-aprubahan sa DOJ subay sa ilang resolusyon niadtung Enero 1, 2008. Ang confirmation sa iyang pribilihiyo sa GTCA isip penal colonist ang maghatag kaniya ug dugang credit nga balig usa ka tuig, unom ka bulan ug dese syete ka adlaw nga maoy mokompleto sa iyang commuted sentence nga giserbisyoan.

Hingpit na ang kagawasan ni Romeo “Nonong” Jalosjos gikan sa New Bilibid Prison tapos giduso ni Bureau of Corrections Director, Usec. Oscar C. Calderon ngadtu sa Department of Justice niadtung Disyembre 24, 2008 ang hangyo niini alang sa rekonsiderasyon sa confirmation sa pagka colonist status.

Niadtung Desyembre sa miaging tuig, duha ka memorandum sa Bureau of Corrections ang gipadangat ngadtu sa DOJ ang kabahin sa computation sa tuig nga pagserbisyo sa kanhi kongresista sulod sa bilangguan diin gihangyo niini nga ilakip sa commutation ang Good Conduct Time Allowance ilawom sa Revised Penal Code nga maoy usa ka pribilihiyo sa colonist status.

Niadtung Desyembre 16, 2008, si Mr. Alfredo C. Benitez, OIC sa Administrative Division sa Bureau of Corrections ang mipadala ug Memorandum kang Corrections Director, UnderSecretary Oscar Calderon nga nagpahibalo niini nga milibkas na ang sentensiya ni Romeo Jalosjos isip usa ka binilanggo.

Ang kalihim sa departamento sa hustisiya mimando sa Bureau of Corrections sa pag-reevaluate ug pag-recompute sa panahon sa iyang pagserbisyo isip piniriso ug i-determinar kon kualipikado ba kini nga hatagan ug pribilihiyo nga makagawas.

Sa gihimong re-eveluation ug re-computation sa iyang kaso, ang Bureau of Corrections ang mihimo ug hugtanong representasyon sa Department of Justice sa pag-aprobar ug paghatag ug konpermasyon sa iyang pagka colonist status nga maoy maka-justify sa iyang kagawasan.

Sa panahon nga ma-aprobahan ug makonpermar sa DOJ ang pagka colonist status, ang Bureau of Corrections miingon nga ang ilang reevaluation ug re-computation maoy mopamatuod nga si Romeo Jalosjos ang nakatapos na sa pagserbisyo sa iyang sentensiya niadtung Desyembre 14, 2008.

Niadtung Desyembre 18, 2008 si UnderSecretary Oscar Calderon mipadala ug Memorandum ngadto kang Justice Secretary Raul Gonzales mahitungod sa reevaluation ug re-computation sa Bureau of Corrections.

Sumala sa gihimong pagtuon, nagpakita nga dunay hustong proceeding ang gihimo sa New Bilibid Prison Classification Board sigon sa mga dokumento sa bureu. Ang paghatag isip colonist status ni Jalosjos sa kanhi Director of Corrections niadtung Marso 13, 2007 maoy nakapatukmod nga kahatagan ug paborabling rekomendasyon gikan sa NBP Classification Board.

Matud pa, ang aktibong partisipasyon ni Jalosjos sa rehabilitation ug transformation progams sa Bureau of Corrections maoy nakapabalik sa dignidad sa mga tawo nga anaa sa bilangguan. Ang iyang gipakitang liderato wala makahatag ug pagduda sa pagsabot, kooperasyon ug hugtanong pagsuporta sa nagkadaiyang programa, proyekto ug kalihukan sa Bureau of Corrections sigon sa bag-ohay palamang gipahigayon nga National Correctional Consciousness Week nga gisaulog niadtung Nobembre sa miaging tuig.

“During my stint as Director, I have personally observed the active participation of inmate Romeo G. Jalosjos N98P-0748 in multi-faceted rehabilitation/ transformation programs of the Bureau of Corrections,” nagkanayon si Calderon.

Ang Bureau of Corrections mihatag usab ug merito alang sa konpermasyon sa pagka colonist status ni Jalosjos gumikan sa gihimo niining aktibong membro sa Council of Elders sa Maximum Security Camp sa New Bilibid Prison. Pinaagi sa iyang aktibong partisipasyon sa iyang gitukod nga Lamb of God Foundation, daghanan sa mga binilanggo ang nakabenipisyo sa mga pagbansaybansay, skills upgrading programs, moral value enhancement seminars, legal, medical ug dental outreach activities.

Sumala sa computation nga gihimo, ilawom sa Good Conduct Time Allowance kon GCTA, adunay lima ka tuig ug dese nuybe ka adlaw pinasikad sa Article 29 sa Revised Penal Code, unom ka tuig, polo ka bulan ug polo ka adlaw ang akto nga pagserbisyo sa bilangguan human ang kaso nahimong final and executory, ug duha ka tuig, siyam ka bulan ug byenti syeti ka adlaw pinasikad sa Article 97 sa Revised Penal Code, pinasubay sa pag-aprubar sa GCTA sa resolusyon sa DOJ pinitsahan ug Enero 1, 2008.

Matud pa ni Under Secretary Calderon ngadtu kang Justice Secretary Gonzales, kon hatagan ug paborabling desisyon ug pagkonpermar ang pagka colonist status ni inmate nga si Romeo Jalosjos, aduna kini credit nga dugang Good Conduct Time Allowance ug balig usa ka tuig, unom ka bulan ug dese syeti ka adlaw. Subay sa akto nga panahon sa pagserbisyo ug sa regular GCTA, dungagan pa sa colonist GCTA credit, dunay supesyanting basihanan sa commuted sentence ang dese sayes ka tuig, tulo ka bulan ug tulo ka adlaw.

Pinasubay niini, si Calderon hugtanon nga mihangyo kang Secretary Gonzales nga ikonpermar ang colonist status ni Nonong Jalosjos aron makuha niini ang kompletong computation sa iyang sentensiya alang sa iyang hingpit nga kagawasan gikan sa prisohan. (The New Nandau, Vol. XVIII No.24)

*

 

NFA sa Dipolog wala nay bugas

Napalaw niadtong Lunes Enero 5, 2009 ang mga operators sa Tindahan Natin sa dihang gibalibaran sila sa National Food Authority ning dakbayan sa Dipolog nga wala na silay stock nga bugas nga tag P18.25 ang kilo.

Kini ang gibutyag ni Mr. Cipriano Jasmin usa sa mga operators sa Tindahan Natin outlet dinhi sa dakbayan sa Dipolog.

Matud pa ni Jasmin niadtong Lunes mao pay pagbalik nilang mga Tindahan Natin operators aron sa pagkuha sa ilang alokasyon human sa duha ka semana nga bakasyon niadtong Desyembre.

Gisaysay ni Jasmin nga katapusan silang nakakuha sa ilang alokasyon sa NFA rice niadtong Desyembre 22, 2008 ug gisultihan sa NFA nga mobalik pagka Enero 5, 2009.

Sa sayu pa gibutyag ni Jasmin nga niadtong miaging buwan ang tag napulo ka sakung alokasyon nila kada semana gihimo na lang sa NFA nga tag lima ka saku kay apiki na ang ilang pundong bugas.

Samtang sa ilang pagbalik karong semana para sa unang alokasyon sa NFA rice sa tuig 2009 gisugat sila sa balita nga walay stock ang NFA Dipolog.

Gipasaligan sila nga adunay shipment sa NFA rice nga moabot karong semanaha gikan sa dakbayan sa Zamboanga.

Sumala pa ni Jasmin daghan silang mga operators sa Tindahan Natin outlets gikan sa ubang bahin sa ZaNorte ang napalaw niadtong Lunes aron unta sa pagkuha sa ilang alokasyon.

Si Jasmin midugang sa pagsaysay nga ang stock sa NFA Dipolog nga nahibilin mao kadtong mahal nga klase sa bugas nga tag kapin sa P30.00 ang kilo.

Ang ilang gipangita mao ang tag P18.25 ang kilo kay mao ray makaya sa mga kabus karong panahona.

Subay niini subling mipalanog sa iyang pag-apilar si Jasmin ngadto kang Governor Rolando Yebes nga unta matabangan sila sa ilang kahimtang karon kabahin na sa walay klarong supply sa NFA nga unta kini mahimuan ug hinanaling aksiyon. (Press Freedom, Vol. XXI No.11)

*

 

Renewal sa business permits padayon
‘Pre-Licensing Confab’ gipatawag pagpanalipod
sa kabataan kabahin sa malaw-ay sa mga internet cafe

Isip lakang alang sa paghatag ug tubag ngadto sa mga mitumaw nga suliran kalabot sa operations sa mga internet cafes dinhi sa Dipolog, usa ka “Pre-licensing Conference” alang sa tanang mga internet operators ang gipahigayon niadtong nakalabay nga hapon sa Disyembre 24, 2008.

Kini gitambongan sa pipila ka mga opisyales sa mga buhatan nga direktang adunay kalambigitan sa operasyon sa maong mga negosyo, sama sa Dipolog PNP, City Legal Office, Association of Barangay Councils, City Information Office ug uban pa ilawom sa pagpanguna sa buhatan ni City Mayor Evelyn T. Uy.

Gituki sa panagtigom nga gipatawag ni Mayor Belen Uy ang mga lakang aron mapana- lipdan ang kabataan batok sa mga malaw-ay nga makita sa mga internet cafe, sa dili pa ang ilang permit.

Unang suliran nga gituki mao ang mitumaw karon diin ang mga kabataan sayon rang makasulod sa atong mga intenet cafes ug molantaw sa mga malaw-ayng pasundayag gikan sa internet nga matud pa walay tukmang aksiyon usab nga gihimo sa mga tag-iya sa nasangpit nga mga establismento.

Nakab-ot atol sa maong panagtigum mao ang hugtanong pagtuman gayud sa tanang mga internet operators sa mga napandayng balaod sa Sangguniang Panlungsod, partikular na ang nagdili sa pagpasundayag sa mga pornographic shows ug pagbaton ug mga siradong cubicles ug  uban pa.

Lakip sa giawhag ni City Mayor Belen Uy nga hugtanong mohimo ug pag-monitor sa tanang mga internet cafes ang tanang mga hingtungdang barangay chairmen diin ang nasangpit nga mga patigayon nahimutang.

Kadtong mga internet operators nga dili motuman sa mga nahalagdang gabayan alang sa tukmang operasyon hayan pagarebokahon ang business permit niini nga nagkahulugan usab ug paghunong sa ilang patigayon.(CIO-alb)

*

 
ZN priority sa $1-B Food Security

Nalakip karon ang lalawigan sa ZaNorte sa Priority No. 1 sa San Miguel Corporation ug Kuok Group sa Malaysia sa ilang $1-billion food security program.

Ang programa nga gitawag ug “Feeding the Future” unang ilusad sa Davao del Norte diin mokabat sa 18,494 ka ektaryang logged-over lands ang giila nga gamiton para sa maong programa.

Kini maoy unang hugna sa nasangpit nga joint venture sa San Miguel Corporation ug Kuok Group sa Malaysia uban sa Philippine Agricultural Development and Commercial Corporation nga maoy molantaw sa implemtasyon sa maong proyekto uban sa Department of Agriculture.

Mokabat sa usa ka bilyon ka dolyar ang gikatakdang ibobo sa duha ka mga kompaniya para sa pagdevelop sa usa ka milyon ka ektaryang kayutaan nga wala magamit para na sa produksiyon sa agrikultura.

Kini ang gipahibawo ni Marriz Agbon ang presidente sa Philippine Agricultural Development and Commercial Corporation.

Ang San Miguel Corporation ug ang Kuok mitimaan sa usa ka memorandum of understanding sa miaging tuig nga motabang sila sa kagamhanan sa Pilipinas nga nakab-ot ang tukmang siguridad sa pagkaun pinaagi sa maong proyekto.

Sumala pa kini maoy tubag sa duha ka kompaniya sa panawagan sa atong kagamhanan nga unta ang mga pribadong kompaniya molambigit diha sa pagpaningkamut nga ang nasud makabatun ug tukmang supply sa pagkaun.

Ilawom sa ilang plano ang San Miguel ug Kuok maoy mobutang sa gikinahanglang pundo para sa pagtikad sa yuta nga pagatamnan sa humay, tubo, mais ug lubi.

Ang nasangpit nga proyekto naglangkub usab sa pagtanum ug mga utanon, pagbuhi ug mga hayupan ug dairy products.

Ilawom sa maong programa ang San Miguel ug Kuok Group maoy mopalit sa tanang produkto sa bag-ong mga umahan nga pagatikaron sa mga tenant-farmers apan ang yuta padayong paga panag-iyahan sa gobyerno.

Ang lugar nga ipa-ilawom sa maong programa mao kadtong giilang mga logged-over areas nga giilang bukas apan walay kasamtangang tanum ug sibo para sa upland agro-forestry development plantation.

Mokabat sa usa ka milyon ka ektaryang luna ang gipasalig sa gobyerno para sa maong proyekto apan ang naila niini karon mokabat pa lamang sa usa ka gatus ka libu ka ektaryang luna ilawom sa mga lalawigan nga giilang Priority No. 1.

Ang mga lalawigan nga nalakip sa Priority No. 1 mao ang Zamboanga del Norte, Mt. Province, Zamboanga Sibugay, ug Saranggani. (Press Freedom, Vol. XXI No.11)

*

 

Bidding sa bag-ong ZN Cultural Center Enero

Gikatakda na nga ipa-ilawom sa bidding ang pagkonstrak sa bag-ong ZaNorte Cultural and Sports Center karong buwan sa Enero ug sugdan gilayon ang pagkonstrak niini.

Mao kini ang gipahibawo ni Atty. Uldarico Mejorada, ang tigpamaba ni Governor Rolando Yebes may kalabutan na sa mga prayoridad nga gihan-ay sa gobernador para karong 2009.

Matud pa ni Mejorada aduna nay pundo nga gitigum ang gobernador para kasugdan ang pagkonstrak sa bag-ong cultural center sa probinsiya.

Sa sayu pa gipahibawo ni Governor Yebes nga sa kasamtangan aduna siyay natigum nga usa ka gatus ka milyon ka pesos para masugdan sa pagkonstrak ang nasangpit nga ZaNorte Cultural and Sports Center.

Apan aminado ang gobernador nga nagkinahanglan pa kini ug dakung kantidad para gayud mahingpit ang nasangpit nga pasilidad nga mao karoy kuwang sa probinsiya.

Matud pa ni Atty. Mejorada, walay laraw ang probinsiya nga mangutang para lamang sa pagkonstrak sa maong cultural center.

Ang bag-ong cultural center ipatindog sa lugar nga nahimutang sa gipa demolish nga cultural and sports center aron magamit ang nanuyhakaw karong mga poste ug kabilya nga binuhat sa kanhi administrasyon.

Kahinumduman higpit nga gisupakan kaniadto ni Mejorada samtang meyembro pa siya sa Sangguniang Panlalawigan ang pagpademolish sa maong cultural and sports center kay alang kaniya usa kato ka landmark para sa ZaNorte nga angayang ipreserbar sama sa gibuhat sa mga kagamhanan didto sa Europa nga gipabilin gayud nila ang ilang mga karaang edipisyo.

Ang nasangpit nga cultural and sports center adunay historical value ug maoy kabilin ni kanhi Governor Virginio Lacaya apan gipaguba gayud sa kanhi gobernador.

Para niya ang mga landmark nga natukod sa mga kanhi lider sa atong probinsiya angayang ipabilin gayud isip handumanan. (Press Freedom, Vol. XXI No.11)

 
 

RENEWAL SA MGA BUSINESS PERMITS KARON PADAYON 

Sa nalambigit nga kalamboan, gipahibalo sa License Division sa buhatan sa Mayor ning dakbayan nga nagasugod na ang pagpang-renew sa tanang mga business permits sa tanang matang sa patigayon alang ning kasamtangang tuig 2009.

Mao kini ang gipahibalo ni License Officer Lourdes E. Pabilona karong semanaha. Matud pa niya, kining maong kalihokan gisugdan sa unang adlawng tingtrabaho ning tuiga ug molungtad lamang hangtud sa Enero 20.

Ang pagpang renew sa mga lisensiya ug permit sayon na tungod sa “One-Stop-Shop.”
 

Ang molukat sa bag-o o mopa-renew sa lisensiya ug permit dili moadto sa laing buhatan kondili diha ra tanan makuha sa “One-Stop-Shop” sa usa ka dapit sa City Hall.

Busa siya nanawagan sa tanang mga hingtungdang magpapa- tigayon sa paghikay na sa ilang mga papeles pinaagi sa pag-anhi dinhi sa City Hall diin gipahimutang ang “One-Stop Shop” nga gilankoban sa tanang mga hingtungdang buhatan sa kagamhanang lokal sa Dipolog nga nalambigit sa naasoyng kalihokan.

Kini tuyong gimugna sa kagamhanang lokal ning dakbayan pinaagi ni City Mayor Evelyn T. Uy aron katabangan ang atong mga kaigsoonang magpapatigayon nga kamenosan ang ilang kahasol dinha unya sa pagbag-o sa ilang mga business permits alang ning kasamtangang tuig.(CIO-alb)

*

 

Seriac electrification project gipatigaw sa batabata ni Dodoy
Gov. Yebes dunay katungod moangkon ug proyekto sa Seriac- Engr. Nalzaro

ADUNAY dakong katungod ang kagamhanang probinsiyal sa Zamboanga del Norte pinaagi ni Governor Rolando Yebes nga mo-angkon sa electrification project sa barangay Seriac sakop sa lungsod sa Siayan tungod kay ang pundo nga gigamit niini gikan mismo sa panudlanan sa lalawigan.

Kini maoy pagklaro isip tubag sa gika-alegar ni 2nd District Congressman “Dodoy” Labadlabad nga matod pa walay katungod nga mo-angkon ang gobernador sa probinsiya sa electrification project nga napahimuslan karon sa mga katawhan sa maong barangay sa Siayan tungod kay ang pundo gikan sa nasudnong kagamhanan.

Sa migawas nga balita sa tingpaniudto sa DXFL-FM, si Congressman Labadlabad mibatikos kang Governor Yebes nga nangangkon ug electrification project sa Barangay Seriac nga bisan usa ka dako wala may napahat ang probinsya.

Ang maong pagpangangkon matud sa kongresista makita sa tarpaulin nga gibutang sa maong barangay isip listahan sa mga proyekto nga napatuman ilawom sa Yebes administration.

Sumala ni Labadlabad, siya maoy mi-lobby sa maong electrification project ngadto sa Department of Energy kon DOE maoy hinungdan nga kini mipahat ug P2.2 milyones ka pesos alang sa maong proyekto.

Ang maong proyekto nahibaw-ang giturn-over karong bag-o, Enero 4, 2009.

Ang pamahayag ni Congressman Labadlabad gisuportahan usab ni ZANECO Board of Director Marcelo Yano nga wala siya makahinumdom nga dunay pahat ang kagamhanang probinsyal sa Seriac electrification project nga gipundohan sa DOE.

Sa iyang kabahin, Engr. Demet Nalzaro, incharge sa barangay electrification project sa Capitolyo probinsiyal mipahayag nga ang pagkutay sa linya sa koryente gikan sa Gunyan agi sa Barangay Seriac, Soquilon paingon sa Mangilay sa Siayan nga adunay gilay-on nga 12 kilometro kapin ang gigastohan gikan sa pundo sa probinsya. Kini ang migasto ug P3.7 milyon pesos kansang pundo ang gikan mismo 20% EDF sa panudlanan sa Zamboanga del Norte.

Ang maong proyekto ang napatuman kini panahon sa administrasyon ni Governor Yebes nga gisugdan ang pagtrabaho niadtong Septembre 13, 2005 ug nakompletro niadtong Hunyo 19, 2006 mga mao usab ang adlaw pag-turn-over niini ngadto sa barangay ug sa ZANECO.

Giklaro ni Engr. Nalzaro nga walay pundo nga gikan sa nasudnong kagamhanan o sa DOE ang gigamit alang sa maong electrification project. Gawas lamang sa counterpart sa barangay pinaagi sa pag-alayon niini sa mga poste nga madala ngadto sa lugar nga ma-agian sa linya sa koryente.

Gihatagan ug gibug-aton ni Engr. Nalzaro nga walay lig-ong kabasihan ang gipalanog nga alegasyton sa kongresista sa Segundo distrito. “Kinahanglan lang usab angkonon sa probinsya pinaagi ni Governor  Yebes ang maong proyekto tungod kay ang pundo niini ang gikan mismo sa panudlanan sa lalawigan”, nagkanayon si Engr. Nalzaro.

Tungod sa maong kontrobersiya, sa gihimong panginsusi, pareha sila si Governor Yebes ug Congressman Labadlabad nakahatag ug electrification project sa maong barangay. Ang kang Governor Yebes napatuman ug natugyan sa barangay niadtung dos mil sayes nga dili pa kongresista si Labadlabad, samtang karong bag-o nga gipahat sa DOE gitugyan niadtung Enero 4 niining tuiga.

“Pareha ra sila nga dunay electrification project apan managlahi ang tuig sa implementasyon. Kang Governor Yebes mitadlas gikan sa Gunyan, Seriac, Soquilon ug Mangilay gitrabaho niadto pang 2005, samtang duna poy sa DOE karong bag-o,” nagkanayon si OIC-Provincial Engr. Ramon Ochotorena.

Apan ang nakapalapad sa isyu kay nagduda ang kongresista sa segundo distrito nga ang gobernador nangangkon ug proyekto sumala sa tarpaulin nga gibutang niini nga mao usab ang pagpasabot nga gipabate ni Engr. Nalzaro kinsa maoy in-charge sa barangay electrification project nga ang gipahayag sa kongresista usa ka dakong bakak ug walay kamatuoran gumikan kay duna man gayoy proyekto ang probinsya sa maong barangay.

Kini usab nga kontrobersiya maoy nakapatigaw sa usa sa mga programa sa DXFL-FM kay ang tigpamaba sa kongresista nga giilang si Rayan Uy, casual employee sa siyudad sa Dipolog mipasibaw sa balikwaot niyang nga pagsabot sa isyu kay ang nagpagawas naman sa balita maoy iyang gipuntarya ug saway nga unta, igo raman kini nagpagawas sa maong impormasyon base sa interview nga nakalap sa pikas ug pikas habig nga parehong patas nga gipagawas sa maong programa.

Matud pa sa news anchor sa DXFL-Headline Balita, ang pinataka ug ngalngal sa maong maong caller nga nahibaw-ang sinugo sa dakong politiko arun maoy tigsupo sa mogawas nga balita maoy nakapahaling ug samot sa kontrobersiya kay imbes nahilom na ang maong isyu atubangan sa paghatag ug katubagan sa kampo nila ni Governor Yebes ug Congressman Labadlabad, kini nanawag pa sa programa sa Kasayuran ug mi-kuwestion sa kridibility sa tinubdan sa balita.

Si Joel Ello, news correspondent sa DXFL Headline Balita nga maoy nag-followup sa maong balita nagkanayon nga ang pagpataka ug ngalngal sa usa ka Rayan nga nagdala pa sa ‘tingug sa katawhang Dipolognon’ maoy pagdepensa sa iyang amo nga maoy nag-una-una ug pagawas sa alegasyon nga ang gobernador nangangkon ug proyekto, usa ka matang sa pamaagi arun kuhaan ug katungod ang media nga mopagawas sa tinuod nga impormasyon sukwahi sa iyang pagtuo nga siya (Rayan) maoy insakto sa iyang kaugalingong hunahuna kay nagdawat man siya ug suweldo nga maoy iyang trabaho arun labanan ang iyang amo nga politiko.

“Akong hagiton ning tigpamaba ni Dodoy ug makapakita ba siya, bisag usa lang ka dokumento nga si Congressman Labadlabad dunay gipermahan nga papeles arun pagpamatuod nga ang electrification project sa Seriac, Siayan proyekto sa usa ka kongresista”, hagit ni Popong.

Matud pa ni ZANECO General Manager Adelmo Laput sa miagi, programa ni PGMA ang tanang barangay sa Zamboanga del Norte pakutayan ug sugang dagitab sa dili pa siya mokanaug sa malakanyang. “Bisan pa ug wala ang congresssman naka-budget na kining daan kay programa man kini sa presidente.” (with reports from Mar Uy and Joel Ello)

*

 

Human gireklamo ngadto sa Korte Suprema
RTC Executive Judge ‘napasò’

DIPOLOG —  “NAPASÒ.” mao kini ang opinyon sa sirkulo sa mga law practitioners human ang korte suprema mitawag sa atensyon sa usa ka huwes ning dakbayan karong bag-o lamang human ang usa ka abugado mireklamo ngadto sa korte suprema.

Sa suwat ni Supreme Court Administrator Reuben P. De La Cruz ngadto kang Executive Judge Porferio E. Mah sa Regional Trial Court (RTC) ning dabayan kini mipahimangno nga insakto ang nahimong desisyon ni MTCC Judge Jose Rene G. Donyano sa Dapitan City, nga nananghid nga mo-inhibit sa usa ka election case nga nasang-at sa sala niini tungod kay paryente sa iyang asawa ang complainant, apan wa mosugot si Executive Judge Mah.

“We wish to inform you that the disqualification/inhibition of a judge requires purely judicial action addressed to his sound discretion. In this regard, we are inviting your attention to Circular number 7 dated 10 November 1980,” matud pa sa unod sa suwat ni Supreme Court Administrator Reuben P. De La Cruz ngadto kang Executive Judge Mah nga penetsahan ug Dec.11, 2008.

Sayo pa niini, Si Judge Dondayano gi-filan ug complaint ngadto sa Office of the Court Administrator sa korte suprema diin gusto sa complainant nga angayan siyang di maningamot ug husay sa usa ka election case sa sala niini tungod kay paryente sa iyang asawa ang usa sa involved parties.

Si Atty. Cres Palpagan counsel ni Sigayan Barangay Captain Jonico D. Oya sa Dapitan, maoy mipasaka sa complaint batok kang Judge Dondoyano. Apan si Dondoyano mi-render gihapon ug desisyon sa kaso ug mihimo pa gayod ug writ of execution.

“Ako siyang gisumbong kaduha administratively ngadto sa Supreme Court tungod kay among nakita nga nakalapas siya sa judicial ethics,” matud pa ni Atty. Palpagan ngadto sa mga tigbalita.

Sa kadugayan murag naka-alimadmad ra pud si Judge Dondoyano nga angayan gayod siyang di maningamot ug husay sa maong election case ug kini nananghid na kang Executive Judge Mah sa RTC ning dakbayan apan sa Judge Mah wa mosugot.

“Dili man gud kita mouyon sa maong mga pamaagi maong nangita usab kitag kaa-angayan ug mireklamo kita ngadto sa Supreme Court,” dugang pamahayag ni Atty. Palpagan.

Si Jonico Oya kandidato sa pagka barangay kapitan sa Sigayan batok kang Abelardo Bagasina kaniadtong 2007 barangay elections. Tabla ang nahimong resulta sa inihapay sa botos diin pareho silang nakakuha ug tag-250. Ubos sa Comelec rules kon adunay tabla sa inihapay sa butos adunay draw lots nga himoon ug mitumaw nga si Oya maoy gi-suwerte ug maoy napiling kapitan.

Apan si Bagasina mi-file ug judicial recount sa MTCC sa Dapitan sa sala ni Judge Dondoyano. Nidaog si Bagasina sa husay. Apan, nakit-an sa kampo ni Oya nga paryente diay sa asawa ni Dondoyano si Bagasina ug adunay conflict of interest si Judge Dondoyano ug nakalapas pa kini sa judicial ethics maong gi-reklamo sa kampo ni Oya uban sa counsel niini nga si Atty. Palpagan ngadto sa Supreme Court.

Si Executive Judge Mah kinsa wala usab mitugot sa pananghid ni Judge Dodoyano nga mo-inhibit sa maong election case, gibuyag usab sa korte suprema, human gi-reklamo usab sa kampo ni Oya.

“Judge Dodoyano’s inhibition to proceed with other incidents of the case was sustained by the Supreme Court and that the grounds for the call of his inhibition was a mandatory grounds,” punto pamahayag pa ni Atty. Palpagan. (Joey Ybañez, ZNUC Member, The New Nandau, Vol. XVIII No.24)

*

 

Gov. Yebes misubo pagtugyan ug proyekto sa unang adlaw sa 2009

GISUGDAN ni Governor Rolando Yebes ang pagsubo sa iyang ‘workaholik’ nga pagserbisyo pinaagi sa pag-turn-over ug mga proyekto ang unang adlaw sa trabaho sa bag-ong tuig 2009.

Gikalipay  pag-ayo sa mga katawhan sa sitio Palid barangay La Conception sakop sa lungsod sa Sindangan ang nadawat nilang proyekto gikan sa kagamhanang probinsyal sa Zamboanga del Norte nga dako kaayo ug ikatabang sa mga lomolopyo sa maong dapit.

Miaging semana dungan giturn-over ang duha ka unit nga Malawe Type Deep Well Pump  sa sitio Palid, Barangay La Conception sa Sindangan nga nagkantidad sa P66,320.00.

GISUGDAN ni Governor Rolando Yebes ang pagsubo sa iyang ‘workaholik’ nga pagserbisyo pinaagi sa pag-turn-over ug mga proyekto ang unang adlaw sa trabaho sa bag-ong tuig 2009. Miaging semana dungan giturn-over ang duha ka unit nga Malawe Type Deep Well Pump  sa sitio Palid, Barangay La Conception sa Sindangan nga nagkantidad sa P66,320.00.

Ang pagtugyan sa proyekto gipangunayan mismo ni Governor Rolando Yebes uban nila ni Provincial Administrator Atty. Rafael Cabanlit, Provincial Atty. Jes Gal Sarmiento, Jr., 2nd District Board Member Atty. Ricky Mejorada, taga Provincial Engineering Office pinaagi ni Engr. Ramon Ochotorena, uban sa pag-abag  ni Municipal Administrator former judge Mariano Macias nga maoy nag-representar kang Mayor Bert Macias. Ang maong proyekto ang mainiton ug malipayon nga gidawat sa mga barangay officials sa maong barangay sa pagpangulo ni Kapitan Crispin Taruc, Sr.

Gipadayag ni Kapitan Taruc ang ilang dakong kalipay sa proyekto nga ilang nadawat. Ang tubig maoy dugay na kaayo nilang gipangandoy nga ilang maangkon. Kaniadto adto pa sila magkuha ug tubig ilimnon sa poblacion sa Sindangan ug sa mga sikbit nilang barangay bisan sa tubig nga ilang gamiton para kaligo. Kini maoy dako nilang problema tungod kay matag adlaw mogasto pa sila ug plete para sa habal-habal paghakot ug mga tubig. Gidugang ni Kapitan Taruc nga bugtong si Governor Yebes lang ang gobernador sa probinsiya misulbad sa ilang problema.

Samtang sa kabahin ni Governor Rolando Yebes nga bisan sa gihimong pagpangataki matag adlaw sa mga binayran nga komentarista sa radyo sa Sindangan batok kaniya wala kini maghatag ug babag paghatud sa mga proyekto diha sa mga kabarangayan.Ang proyekto nga naangkon sa barangay La Conception kini ang nadugang sa 2 mil kapin ka mga proyekto nga napatuman sa Yebes Administration ug napahimuslan karon sa mga katawhan diha sa barangay. (Joel Ello) (The New Nandau, Vol. XVIII No.24)

*

 
Goat dispersal program gipangandaman

ARON pagsiguro nga mahan-ay ang pag-implimintar sa goat dispersal nga apil sa duha ka mga components sa livelihood program nga initiative sa nasudnong kagamhanan ug gihimong pilot province ang Zamboanga del Norte, si Governor Rolando Yebes ang personal nga misubay sa mga breeding stations nga anaa karon makita ang mga kanding sa probinsiya.

Niadtong mi-aging adlaw unang gisubay sa gobernador ang breeding station sa Misok, Sindangan aron personal nga masubay niini kung unsa nay kahimtang sa mga kanding isip pagpangandam alang na sa hingpit nga pag-implimintar sa nahisgutang programa.

Usa sa duha ka mga components sa livelihood program ang goat dispersal nga initiative sa nasudnong kagamhanan ug gihimong pilot province ang Zamboanga del Norte, si Governor Rolando Yebes ang personal nga misubay sa mga breeding stations nga anaa karon makita ang mga kanding sa probinsiya.

Sunod nga gisubay ni Governor Yebes ang Provincial Agro Industrial Center sa Irasan, Roxas nga anaa karon nagasentro ang Provet pag-alima ug pagpasanay sa mga nagkadaiyang hayop. Uban ni Police Provincial Director Atty. Cristito Gonzalodo gihimo ang pagbutang ug tag sa mga kanding. Sa karon adunay 60 kapin ka mga nagkadaiyang klase sa kanding ang anaa sa PAIC-Irasan.

Gikalipay ug dako sa gobernador ang maayong resulta karon sa programa sa Provincial Veterinary Office pinaagi ni Provincial Veterinarian Vicente “VIC” Sanchez. Gusto sa gobernador nga ang PAIC-Irasan maoy magsilbing sentro sa mga programa sa Provet nga hinay-hinay na karong gisugdan sa maong buhatan aron matabangan ang mga pobreng katawhan nga makapahimulos sa programa sa gobyerno pagpasanay sa hayop nga maoy gusto nilang buhion.

Sa karon padayon pang gitun-an pag-ayo ang maong programa alang sa hingpit nga pag-impimintar niini tungod kay dili itugot ni Governor Yebes nga ma-usik ang kuwarta sa gobyerno tungod sa palpak nga implementasyon ilabina nga lisud ang pagpasanay sa kanding tungod kay kaduha lamang kini sa usa ka tuig manganak.

Angayang masayran ang goat dispersal ug mariculture maoy mga components sa livelihood program nga maoy initiative karon sa national government pinaagi ni Presidente Arroyo pagsumpo sa kapobrehon. Ang Zamboanga del Norte maoy pilot province sa nahisgutang programa. (Joel Ello, The New Nandau, Vol. XVIII No.24)

 
 

 Renewal sa Bz Permits gihigpitan

Nanawagan karon si Revenue District Officer Cres Agad sa tanang mga kagamhanang local sa ZaNorte sa pagsunod sa higpit sa mga kasuguan ilabi na diha sa pagsingil sa tukmang buhis ngadto sa mga negosyante nga molukat ug bag-ong lesensiya para sa ilang mga negosyo.

Kini ang gipalanog ni Agad samtang nagsugod na karon sa paglukat ang mga negosyante ug bag-ong lesensiya para sa operasyon sa ilang negosyo karong tuig sa nagkadaiyang mga kagamhanang local.

Gihisgutan ni Agad nga adunay usa ka kasabutan nga gitiman-an ang Department of Finance ug Department of Interior and Local Government diha na sa paghatag sa mga mahinungdanong inpormasyon nga magamit usab sa BIR diha na sa pagsingil sa tukmang buhis.

Sa nasayran nagpahimutang karon ang BIR ug taxpayers assistance center sa kada kagamhanang local aron motabang sa pagsubay diha na sa mga balayronon sa tukmang buhis.

Matud pa ni Agad ilawom sa kasabutan nga gitiman-an sa Department of Finance ug DILG kinahanglan ang mga negosyante nga molukat ug business permit pangayuan na daan kon nagbatun ba sila ug Tax Identification Number gikan sa BIR.

Gikinahanglan nga ang usa ka negosyante nga molukat ug bag-ong lesensiya magbatun gayud ug Tax Identification Number sa dili pa moisyu ang kagamhanang local sa permit.

Matud pa ni Agad kini kabahin sa kampanya sa atong kagamhanan diha sa higpit nga pagkolekta sa buhis para sa katawhan alang sa dugang pang mga sirbisyo ug proyekto nga ipatuman pinaagi sa mga kagamhanang local.

Ang makolektang buhis sa BIR mobalik sa kagamhanang local pinaagi na sa Internal Revenue Allotment nga maoy nagpadagan karon sa atong mga kagamhanan.

Ang gipanghinaut ni Agad nga mosuporta ang mga kagamhanang local niining ilang kampanya karon pinasikad na sa gitiman-ang kasabutan. (Press Freedom, Vol. XXI No.11)

*

 

Daling malunopan sa dakbayan
Mayor nangitag plano unsaon pagpanalipod sa mga dapit bk. baha

Usa ka hinanaling tigum ang gipatawag ni Mayor Evelyn T. Uy karong bag-o tali sa mga hingtungdang ahensiya ug buhatan sa dakbayan, una aron pagmugna ug usa ka master drainage plan alang sa tibuok dakbayan aron kahatagan sa kasulbaran ang problema sa pagbaha sa pipila ka dapit sa Dipolog.

Lakip usab sa nahukman mao ang pagmugna ug husto ug dali nga koordinasyon tali sa kagamhanang lokal sa Dipolog ug sa Department of Environment and Natural Resources (DENR) ilabi na sa pagproseso ug sa pag-aprobar sa tanang mga aplikasyon alang sa pag-isyu ug titulo sa mga kayutaan.

Apil sa nasabutan mao ang paghimo ug inisyal nga hangyo ngadto sa mga sumusunod ni anhing Felipe Lacaya sa pagtugot alang sa posibleng pagpalapad sa Miputak Creek nga mitadlas sa tituladong yuta sa naasoyng nga tag-iya, pinasikad sa Resolusyon No. 49  sa Barangay Council sa Barangay Sta. Isabel.

Mao usay gitinguha ni Mayor Belen Uy nga kahatagan ug kasulbaran kining maong taud-taud nang suliran nga nasinati sa atong mga kaigsoonan panahon sa ting-ulan, sama sa hugtanong pagdili sa pag-abong o pagsira sa atong mga natural waterways dinhi palibot sa dakbayan isip pag-amping niini, ilabi na dinha sa mga tituladong luna nga gipanag-iyahan sa atong mga pribadong indibidwal, aron magpabilin kining maagi-an sa tubig panahon sa ting-ulan ug malikayan ang pag-awas niini nga makahimo sa paglanab sa kamad-ang bahin sa usa ka partikular nga dapit.

Isip paghatag ug hinanaling tubag sa suliran sa daling paglanab sa pipila ka mga dapit dinhi palibot sa dakbayan nga taud-taud nang nasinati sa atong mga kaigsoonan ilabi na kadtong nagpuyo dinha sa mga ubos nga dapit, ang maong panagtigum gipatawag ni Mayor Uy niadtong Enero 5 didto sa iyang buhatan.

Kini gitambongan sa pipila ka mga opisyales sa pipila ka mga buhatan nga nakitang adunay kalambigitan  sa  pagsulbad ning naasoyng suliran, sama kanila ni City Vice Mayor Senen Angeles, Konsehal Peter Y. Co, PENRO Carlito Tuballa, City Information Officer Atty. Alanixon A. Selda, City Legal Officer Atty. Cyril Ruiz, City Engineer Nedilla Magdayao ug City Planning Coordinator Engr. Albert Alimpulos.

Lakip usab sa mitambong mao ang pipila ka mga Barangay Chairmen sa mga barangay nga daling makasinati ning maong suliran ilabi na sa panahon sa ting-ulan, sama kanila ni Barangay Chairmen Maynard Baes sa Turno, Ricardo Albarote sa Minaog, Leonardo Tan sa Estaka, Tito Maligro sa Dicayas, Nelson Saldon sa Sta. Filomena, Graciano Aloba sa  Sicayab, Dioscoro Endab sa Sta. Isabel, Konsehal Janus Yu sa Miputak ug Engr. Regil Lacaya isip representante sa banay ni anhing Felipe Lacaya. (CIO-alb)

 

Managat nagpasalamat

Daku ang pagpasalamat karon sa mga yanung mananagat sa Dipolog ug Dapitan sa gihimong aksiyon batok sa operasyon sa compressor nga nakaapektar ug daku sa ilang panginabuhi sa miagi.

Kini karon ang ilang gipalanog nga reaksiyon sa gihingusgan nga kampanya pinaagi na sa Philippine Maritime Police ug Bantay Dagat sa kampanya paglutos sa mga nagpasiugda sa mga pangisda nga illegal sama sa pagdinamita ug paggamit sa compressor.

Sumala pa nila daku gayud ug kadaut nga nahimo ang operasyon sa compressor diha na sa coral reefs nga gitaliwad-an sa Dipolog-Dapitan ug isla sa Aliguay nga maoy lugar diin sila managat.

Gihulagway sa mga mananagat nga ang mga corals nga maagian sa paggamit ug cyanide moputi ug mamatay busa wala na usay isda ug buhilaman sa dagat nga mopuyo niini kay wala na man usab silay mahimong tinubdan sa ilang pagkaun.

Sila midugang sa pag-asoy nga ang mga nag-operate sa compressor magbawon na daan ug kemikal nga cyanide nga gisulod ug plastic container nga adunay nozzle diin pag-abot sa ilawom ang tanang lungag sa coral reefs maoy pasiritan sa kemikal hangtud manglutaw ang mga isda nga dagku lakip na sa gagmay.

Matud pa nila dila lamang isda ug ubang buhilaman sa dagat ang gipatay sa nag-operate sa compressor lakip na sa ilang gipatay ang coral reefs nga giilang usa ka butang nga nagbatun usab ug kinabuhi.

Ang mga operators sa compressor gitumbok nga maoy responsabli usab sa kawat sa mga gitaan nga bobo sa mga mananagat nga mga Muslim nga maoy kasagarang nagtaan niini diha sa mga takot.

Daku ang ilang pagpasalamat sa aksiyon nga gihimo sa kagamhanan sa dugay na nga problema nga ilang gimulo kay bisan pa sa gihimong pagbantay ug kampanya sa miagi gibaliwala lamang kini sa mga nalambigit sa operasyon sa compressor. (Press Freedom, Vol. XXI No.11)

*

 

Pulso Sa Katilingban
Cicer M. Binghay
Tong-it dakpa

Bunok kusog ulan, baha maoy gitagbo sa Dipolog sa bag-ong tuig.  Katawhan sa Sta. Felomina, Sta. Isabel, Governor’s Village ug uban pang mga kabarangayan.  Nangayo sila sa namunoan drainage canal kay ang tubig napundo gumikan sa mga basakan nga gitukoran mga bodega ug balay.

Sabton lang sa tanan, nga panahon sa daotang panahon, mga prohekto infrastraktora mapugos masuspenso.  Lisod makalihok ang mga ikipos, musamot mayotik ang dapit kon tundugon, mga graba ug balas dili ika bubo kay mabanlas.

Dili ikabalaka kon ang drainage canal wala pa matukod niining panahona.  Atong nahibaloan, panahon pa ni Mayor Berto Uy nga ang pag semento sa kadalanan ug drainage o mga pag montar mga imbornal maoy “pet project.”  Samot kay ang maong pet project gisunod usab sa atong mayor karon.  Mag pailob lamang makariyot kon kanus-a ang schedule sugdan pagtukod drainage dihang dapita.

Congratulations lang gihapon kang PNP Director Gonzalodo.  Iyang gisaad gubat batok swertres duna nay maayong resulta, kay dunay nadakpan mga coordinators.  Hangyoon usab nato si Gonzalodo nga maapil ang pagpanakop sa Tong-it nga kon atong tinud-on pag census, halos bisan asa tibook kasuokan sa lalawigan, gisimba sa mga tong-iteros, hamtong babaye ug lalake hasta na mga bataot.

Law-ay tan-awon sa katilingban, mga nagdula sa baraha skina-skina nga maoy naka babag samot sa katawhan nga walay trabaho nga mag-apong sa maong sugal.  Nabiya daghang mga bulohaton sa ilang panginabuhi.  Kon kining tong-it mapitol dako atong pagtuo nga matikad daghang mga kaumahan, garden, livelihood projects imbes mag atong sa tong-itan.

Ransack sa akyat bahay nagsunod-sunod.  Wala nay gipili kon si kinsa ang matongnan.  Taod-taod na nga hangtod niining pagsulat walay mga nasulbad sa gipang lungkab panimalay nga nakuhaan mga salapi ug mga alahas.  Nawad-an pagsalig ang katawhan sa dakbayan sa Dipolog sa kalihokan sa atong kapolisan.

Hinoon dili kita maka basol sa kapalpakan karon sa atong kapolisan.  Atong kapolisan gamay lamang ang ginsakopan.  Dili bastanti maka dupa sa tinud-anay nga pag-alagad.  Samot pa kay ang ubang kapolisan gigamit personal bodyguard sa atong mga opisyales.

Pero magpasalamat kita sa atong kapolisan, nga bisan miskino ilang gidaghanon, ato silang makita.  Dili ingon kaniadto nga zero police visibility.  Ilang presensiya nga mag saoy-saoy nakahatag natog pagsalig niining panahona nga daghang hulga sa mga terrorista nga mihimog kasamok karong bag-o sa lalawigan sa Cotabato.

Congratulation kang Mayor Belen Uy nga napiling “exceptional” woman in the world.  Nagpili kang Mayor Uy mismo ang International Alliance for Women.  To give honor to women who had made a difference in the world through their various contributions for economic empowerment among the women. (Press Freedom, Vol. XXI No.11)

 
Credits: Press Freedom is published every Saturday and entered as 3rd class mail matter in Dipolog City. Printed by Young Printing Press with Editorial Office located at Upper Turno, Dipolog City. Tel. No. (065) 212-4343 or 212-6665

 

Asa Ang Pabor, Ang Magpili Mayor
Ni:  Mlbn. Ruben B. Legorio

 

Sayo   sa buntag nanabo ko didto sa Fishport kay nangompra kog gabi aron among isagol sa linat-ang bihag nga among ipasud-an sa motambong sa prayer meeting nga ipahigayon sa among balay nianang pagkagabii.

Pag-agi nako sa mga gipang-display nga mga utanon, nadapit ang akong pagtagad niadtong tulo ka mga hamtong nang mga babaye nga nagtungkalo-libot sa gitapok ug mga pinungpong nga talong.

Mopadayon na unta ko ngadto sa unahan apan kalit kong napahunong ug napalingi sa ilang nahimutangan ug napatingkag and akong mga dalunggan sa akong nadunggan.

“ Abi nimo, mare,” matod sa tambukong babaye nga nagkupot sa usa ka dako ug taas nga talong ug samtang iya kining gihaploy-haploy iya sad ning gisukod pinaagi sa iyang tudlo ang gitas-on niini gikan sa pungango ngadto sa tumoy. “Kining gidak-ona ug gitas-ona, didto sa amoa tag dos sentabos ra ang usa.”

“Bitaw, mare,” matod sa ikaduhang niwangong babaye nga dako kaayog ngisi samtang nagpug-ok kini sa usa ka dakong ahos nga iya sab ning gihaplos-haplos. “Didto sab sa amoa ang gidak-on aning ahosa tag mamiso ra.”

Ang ikatulong babaye nga usa ka bungol apan guwapahon ra upod ug alindog mitindog nga mapahiyomon. “ahh…ako hinuon wala makadungog sa inyong gipang-estoryahan apan sa inyong mga gipang-aksiyon ug gipang-mustra, matay…kaila baya kaayo ko  kon si kinsa kanang lalakiha !”

Ngayaha ha ha!

######

Thanks ngadto ni Ms. Grace T. Onganiza nga maoy source nato ning ato karong gi-feature nga sugimedya.

He…He…He…, dili na lang ta manghikotar kon kinsang talong kadtong gipanghisgotan sa tulo ka hamtong nga babaye. Ang ako lang concern mao nga kining talong dako diay ug makitaan ug makuwartahan kon sa pagtanom niini ato lang kugihan.

Didto god dapit sa tersero distrito sa pag-adto namo didto aron pagtambong sa hubkas sa akong brother-in-law, may nasigpatan kong usa ka dakong garden sa mga utanon ug kadaghanan sa gipangtanom mao ang talong. Sa akong pagsusi-susi sa tag-iya niini akong nasayran nga sa pag-garden diay sa mga utanon mao karon ang ilang panginabuhian. Sa tag-iya pa, ang abot ra gyod sa ilang mga utanon maoy ilang gigasto sa ilang mga anak nga pulos nagtungha na sa Kolehiyo.

Didto misantop sa akong alimpatakan ang larawan sa uban natong kaigsuonan nga hangtod karon ania kanunay nagpangita ug trabaho sa atong lokal nga panggamhanan. Kadaghanan kanila nagagikan sa atong mga kabarangayan----kadaghanan kanila mga graduwado sa kolehiyo apan kay walay iligibility hangtod karon wala pa katrabaho diha sa atong gobiyerno. Ngano ba tuod kon mobalik na lang sila sa ilang mga dapit ug mag-uma---mananom ug mga utanon ug uban pang mga lagutmon, magbuhi ug mga manok, pato, baboy, kanding ug uban pang mananap nga mahimo nilang kabuhian?

Kadtong tag-iya sa maong garden (naghangyo lang nga dili siya ipaila) maoy usa ka panag-ingnan sa uban nato dihang kaigsuonan nga hangtod karon kanunay pa gihapon nga  nangandoy ug nagdamgo nga makatrabaho diha sa atong kagamhanan. Hunong na mo nianang binulok ninyong pangandoy kay sa tinuoray lang, kon trabaho lang ang atong panagsultihan, ang atong kagamhanan wa gyod niini ikatabang! Ingnon lang ta ‘unya na lang…balikbalik lang!’

######

Sa usa ka radio talk show nga gipahigayon sa miaging Domingo, usa sa mga bisita sa programa niadtong buntaga mao si Mayor Evelyn Uy ug ang iyang vice nga si Atty. Senen O. Angeles. Sa mga plano nga gibutyag ni Mayor Evelyn Uy, sigurado gayod nga sa di madugay may dakong kausaban nga masaksihan ning atong dakbayan. Gisugdan na ang Sports Complex sa atong dakbayan nga atua ipahimutang sa barangay Olingan. Dako kini nga proyekto sa atong dakbayan ug sigurado nga mapahimudsan kini sa atong mga katawhan.

Ug sa bag-ong napasa nga Business Incentive Code, segurado sab nga daghan nang mga magpapatigayon nga mopahimutang sa ilang mga negosyo ug mamuhonan dinhi sa atong dakbayan. So, kon daghang negosyo daghan sab ang makatrabaho.

Daghang maanindot nga mga proyekto ang umaabot ug kini tungod sa plantsado nga pagplano sa atong mga opisyal ning lokal natong panggobiyerno.

######

Na-interview ko usab si Konsehal Romulo “Muling” Soliva ug matod pod niya “busy” kaayo karon ang iyang komitiba. Hapit na mahuman ang ilang pag-amenda sa Local Revenue Code kang kansang mga “fees” nga gipangsitar didto obsolete na kaayo. Iya kining gipanghingosgan nga mahuman aron mapahimudsan na kini sa atong lokal nga panggamhanan kansang local Revenue Code hilabihan na kaaayo ka karaan! Kon mahuman na kini ug mapa-implementar, modako ang abot sa atong siyudad tungod sa bag-ong rate sa buhis nga mabayad.

Dugang pa ni Konsehal Soliva, may gipanday sab sila karon nga ordinansa nga mag-require sa mga negosyante dinhi nga mobayad ug inspection fee sa bisan unsang matang sa karne nga dili gikan sa atong slaughterhouse apan gipasulod dinhi aron ibaligya  sa atong dagkong tindahan ning atong dakbayan.

Kugihan nga Sakop sa Sangguniang ning atong dakbayan---mao kini si Konsehal Muling Soliva nga usa na sa mga silent millionaire dinhi sa atua!

Mabuhay ka,  Konsehal Muling Soliva!

######

May nangutana nako kon ngano man gyod  ni si Mayor Evelyn Uy nga si Maclang man gyod ang iyang gusto nga ma-Chief of Police dinhi sa atua nga gawas nga kontra kini sa mga politiko, gikontra pa gyod kini sa media?. Prangka nga pagkasulti, maihap ra man pod tingali sa tudlo ang mga politiko nga halang sa ilang balatian kini si Maclang. Gikontrahan sa taga Media? Ha ha ha…ang mikontra niya mao ra man tong taga media-media ug kadtong mahiligon sa komedya! Usab, ubos sa R.A 6975 as amended by the PNP Reorganization Act of RA 8551---ang mayor maoy mopili kon kinsa ang iyang gusto nga mamahimong Hepe sa Kapolisan sa iyang lungsod o dakbayan. Kay si Mayor Evelyn Uy gusto man ni Maclang, dan, wa tay mahimo niana kon iya man kanang gimbut-an. Iya kanang baroganan ug kana atong  tamdan ug respetohan!

May nagsugyot nga maayo unta kon taga dinhi ra ang atong mamahimong Hepe. Well, okay ra man pod tingali apan kon akoy pasultihon, maayo tong dili taga dinhi ang mamahimo natong Hepe. Pipila na ba ka hitabo niadto nga may  mga mireklamo dinhi nga naunsiyame kay lagi taga diri ang Hepe ug ang nakasala iya ra pod nga suod o kaha paryente! Pweeeee!

######

Atong itunol ang pahasubo ngadto sa banay sa mga Aseniero tungod sa kalit nga pagpanaw ni Chito Aseniero---usa sa mga kawani sa Prosecutor’s Office ning atong dakbayan.

Rest in Peace, Chito---mi Amigo, mio! (Dipolog Chronicle, VOL. VIII - NO. 28)

 
 

GATECRASHER
Mat-an Pa Sa Pinya

Karong  pagsugod sa bag-ong tuig, gitagaan dayon sa pagsulay ang daghang mga dapit sa Pilipinas pinaagi sa baha agi sa sigeng ulan sulod sa pipila ka mga adlaw. Tuod man, ang dakbayan sa Dipolog wala makaipsot tungod kay anaay mga barangay nga nalapawan sa tuig ang mga kabalayan. Dili hinoon kini ikatingala kay daan na man kining mga barangaya nga bahaanan sukad pa sa panahon ni Mampor.

Ang nakadaut lang kay adunay mga taga radio nga magpataka lang sa pagdaut sa administrasyon ni Mayora Evelyn T. Uy nga kuno wala kini mitabang sa mga nanglalin sa ilang mga kabalayan. Nagpadala sila sa mga hulhog sa uban nga dauton ang Hepe Ehekutibo aron lang adunay isyu nga ikatira.

Sukwahi sa mga pagarpar sa uban, paspas nga nagpadala ang dakbayan sa ayuda sa mga tulunghaan nga gilalinan sa mga katawhan kansang mga balay sa tubig nasudlan. Gani, aduna pay mga delata, noodles, bugas, kape ug salapi nga gitunol sa mga katawhan aron sila dili mapasmo. Aduna pay mga mananambal nga dali-dali nga mipadapat ug mga tambal sa mga katawhan nga nagdaut agi sa ulan.

Mismo si Mayora ang miduaw sa mga lugar nga nabahaan ug didto sa Miputak Gym nga maoy gihimong evacuation center. Unya, moingon sila nga walay gibuhat ang dakbayan? Daghan ang mga nakasaksi nga mga dagkong Hepe sa mga opisina sa dakbayan ang miadto usab didto aron makatabang sa mga hinanaling panginahanglan.

Sa atong pagsulat niining maong lindog karon, nahibaw-an nga aduna nay mga dugang lakang ang dakbayan aron sa pagpalabaw pa sa mga pagtabang sa mga tawo simbakuhay mausob na pud unya ang baha sa dili mahibaw-an nga panahon.

*****   

Usa usab sa mga sigeng gitirahan sa mga binayrang mga taga radio kuno mao ang Hepe sa kapolisan sa dakbayan nga kuno wala mapahunong ang mga kawat-kawat sa mga kabalayan. Tinuod nga trabaho sa mga pulis ang pag- panakop sa mga kawatan apan dili usab sila sa kanunay makabantay sa mga kriminal tungod kay daghang mga katawhan ug gamay ra ang mga kapolisan.

Hinoon, dili angay nga basulon lang kini sila ug adunay mga tulis o kawat nga manghitabo. Mas adunay katungod ang mga tag-iya sa mga balay patigayon ug mga balay puluy-anan. Kun sila dili magbaton sa insaktong mga pagpangandam ug insaktong mga pag-amping, sila na ang angay basulon.

Kining mga kawatan, mao kini sila ang gitawag nga mat-an pa sa pinya. Buot ipasabot, maayo sila sa pagpaniid sa usa ka balay o usa ka tindahan. Kun adunay higayon nga kini sila makapangawat, ila kining buhaton.Mao nga gikinahanglan nga dili lang sila sa pulis magsalig. Lihok taman sa mahimo kay mas mat-an pa kini sila sa pinya.

*****

Makaluya paminawon nga bag-ong tuig unta apan nagsige ug gubat sa Gaza Strip sa Israel. Makaluluoy intawon ang mga inosenteng mga sibilyan lakip na ang mga bata. Kanus-a pa kaha mahunong kining maong giyera? Daghan ra bang mga Pilipino ang naapil didto ug wala nay seguro nga makauli pa dinhi sa Pilipinas. (Dipolog Chronicle, VOL. VIII - NO. 28)

*

MORE NEWS NGA BINISAYA

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON