January 14, 2008

 

Gov. Yebes: “Decision sa usa ka huwes nga hapit nang mo-retire”
zamboanga judge nanghunaw sa desisyon ni jalosjos -atty.jimenez

Wala hatagi ug gibug-aton sa hukmanan sa Zamboanga City ang gipresentar nga mga ebidensiya sa giduso nga petisyon samtang nanghunaw kini sa gipakanaug nga desisyon aron ibasura ang Writ of Habeas Corpus nga gipasaka sa kampo ni kanhi Congressman Romeo “Nonong” Jalosjos. Kini ang reaksiyon ni Atty. Alfredo M. Jimenez, lead councel ni Jalosjos sa giduso nga Habeas Corpus sa dihang iyang nadawat ang desisyon nga gipakanaug ni RTC Presiding Judge Jesus C. Carbon, Jr. niadtung Huwebes sa hapon.

Matud ni Atty. Jimenez, si Judge Carbon nag “Pontio Pilato” kay nanghunaw sa iyang desisyon samtang wala hatagi ug ‘credit’ ang mga argumento atubangan sa gipresentar nilang ebidensiya kabahin sa ‘validity’ sa discharge certificate nga giluwatan sa Bureau of Corrections sa dihang illegal kining gi-aresto ug balik nga walay arrest order gikan sa tukmang ahensiya sa gobiyerno. Wala magtuo si Atty. Jimenez nga ingon niini ang kausaban sa prinsipyo sa huwes nga kaniadto iyang girespetoan ug gitamod tungod kay duna siyay bug-at nga mga kaso sa maong sala nga gi-impluwensiyahan sa Department of Justice apan wala gayud magpadala ug mipakanaug kinig hukom base sa mga ebidensiya.

Usa sa gihisgutan ni Jimenez ang kasong ‘illegal recruitment’ batok sa usa ka arabo (Arabian citizen) diin ang nahimo niyang klienye taga Zamboanga. Upat ka adlaw sa wala pa gipakanaug ang desisyon, ang Assistant Secretary of Justice miadto sa Zamboanga aron hangyuon ang huwes nga dili konbiktohon ang arabo kay basin maapektahan ang ubang OFW nga atua nanarbaho sa gawas sa nasud. Apan sa gipakanaug nga desisyon ni Judge Carbon, matud ni Atty. Jimenez, gi-konbikto gayud ang langyaw’ng recruiter ug ‘life improsonment’. “Ang Assistant Secretary of Justice mura rapod kana ug Secretary of Justice pero wala siya magpadala.”

Tungod sa maong kaso, dili magtuo si Jimenez nga ingon niini ang mamahimong hukom ni Judge Carbon kabahin sa Writ of Habeas Corpus nga ilang gipasaka gumikan kay atol sa pagdungog sa petisyon wala gani makapresentar bisan usa ka book ebidensiya ang Solicitor General aron babagan ang pagawas ni Jalosjos sa San Ramon Penal Colony samtang illegal kining gidakop sa mga polis.  Para ni Atty. Jimenez ang giluwatang desisyon ni Judge Carbon wala mohisgot sa mga argumento nga ilang giladlad diha sa petisyon kay ang gihatagan ug pagtagad mao lamang ang gisubmiter nga ‘motion to dismiss’ nga gipasaka sa Solicitor General nga ang computation sa Bureau of Corrections walay ‘approval’ sa Department of Justice nga maoy adunay ‘supervision and control’ isip ‘alter ego’ sa presidente nga maoy mipakanaog sa pag-commute sa sentensiya ni Jalosjos. 

“What kind of justice system we have” maoy reaksiyon ni Nonong Jalosjos sa dihang iyang nasayran nga gi-deny ang iyang petisyon. Si Jalosjos nga wala na mohatag pa ug dugang reaksiyon sa kabalaka nga piiton na usab siya sa gobiyerno namatikdan nga daw nawad-an na ug paglaum sa atong hustisya. Sa dihang gihangyo kini sa iyang abugado nga moduso ug Motion for Reconsideration kini direkta niyang gibalibaran. “Ano paba ang gawin natin…wala na eh!”, nagkanayon si Nonong ngadto kang Atty. Jimenez samtang mihangyo nga ilang sulayan nga mopasaka ug motion for reconsideration.

Niadtung Biyernes si kanhi Congressman Romeo “Nonong” Jalosjos nakadisisyon nga mobalik nalang sa National Bilibid Prison sa Muntinlupa ug dili na maghulat nga ipakuha siya ug polis ni Justice Secretary Raul Gonzales.

Gipasabot ni Jimenez nga sa ilang MR (motion for reconsideration) adto sila mo-fucos sa pinaka importanting ‘issues’ sa petisyon nga wala tanduga sa huwes. “One last chance lang” sa pamasin nga mausab pa ang baruganan sa hukmanan. Apan matud pa ni Jalosjos, ila nang giladlad tanang argumento ug ebidensiya diha sa petisyon nga mismo ang Solicitor General naulawan atol sa hearing sa korte kay wala kini makapresentar ug bisan usa ka ebidensiya apan tungod sa mando sa justice secretary na-usab ang dagan sa kaso.

Si Nonong nga nawad-an ug paglaum sa hukmanan sa Zamboanga naglaraw nga adto nalang niya kini kombatehon sa Manila kay gusto niya nga dunay ‘full blown hearing’ aron ipatawag ang tanang miperma sa Discharge Certificate from Prison aron mahiklad sa korte ang tanang kamatuoran. Si Governor Rolando Yebes sa iyang ‘opinion’ mipahayag nga ang desisyon wala motukma sa ‘merit of the case’. “Ang desisyon sa judge nahisama sa desisyon sa usa ka tawo nga hapit nang mo-retire kay wala man niya (Judge Carbone) gi-delve ang ‘key issues’ nga maoy gisandigan sa gipasaka nga Habeas Corpus ni Nonong.”

Usa sa gihisgutan ni Governor Yebes mao ang ‘order of release’ nga wala hisgute sa desisyon sa korte. Ang gihisgutan lamang sa kamandoan sa hukmanan mao ang ‘implied powers’ sa secretary of justice nga ilawom sa office of the president. Dako ang pagtuo sa gobernador nga ang desisyon sa huwes ilawom sa ‘pressure’ sa usa ka tawo hinungdan nga wala kini makahatag ug tinud-anay nga hukom sa ‘constitutional rigths of a person.

Hinoon gipahayag ni Governor Yebes nga daghan pang alternatibong pamaagi nga mabuhat ni Nonong sama sa motion for reconsideraton o kaha moapela sa mando sa secretary of justice atubangan sa pag-usab sa computation sa iyang sentensiya o kaha mopasaka ug Mandamous ngadto sa Court of Appeals aron mahibaw-an kadtong gikuha nga Good Time Conduct Allowance (GCTA) ug ‘preventive imprisonment’ nga parehong giwala nga prebilihiyo mabalik ngadto kaniya.

Sa iyang kabahin gipahayag ni Governor Yebes nga motabang siya kutob sa iyang mahimo para mapahiluna sa husto ang proseso pinaagi sa legal nga systema. Matud ni Governor Yebes duna siyay gipadala nga sulat ngadto kang Presidente Gloria Macapagal-Arroyo nga nag-apela sa hingpit nga pag-implementar sa discharge certificate nga giluwatan sa Bureau of Corrections. Gibatbat sa gobernador ang mga hinungdan ug rason ngano nga kinahanglan si Nonong pagawson tungod kay makalolooy ang iyang kahimtang gumikan kay gitagaan na ug higayon nga makagawas na unta apan giusob sa usa lamang ka tawo.

Sumala pa niya nagdepende na kini ni Nonong unsay pagabuhaton gumikan kay dunay duha ka ‘avenues’ nga masulbad ang problema pinaagi sa legal ug political. “He is the one that should decide whether to go on the legal battle or go on the political maneuovering.” Pagkakaron si Nonong midawat pa ug mga sugyot ug o kaha komentaryo gikan sa nagkalainlaing legal advices sa iyang mga abugado ug sa mga ordinaryong politiko, “iya pa kining gihunahuna ayha siya mopakanaug ug desisyon,” nagkanayon ang gobernador sa ilang panag-estoryahanay ni Nonong.

Aminado si Governor Yebes nga sama kaniya nga abugado nakapaluya kanila kay wala man sa ‘merits of the case’ ang gipakanaug nga desisyon sa huwes. (The New Nandau, Vol. XVII No.26)

*

 

ZaNorte mopalit 5 ka ambulansiya

Giaprubahan sa Sangguniang Panlalawigan sa Zamboanga del Norte ang pagpahat ug P14 milyones ka pesos nga pundo alang na sa pagpalit ug lima ka units sa ambulansiya nga state of the art. Kini ang nadasonan sa Sanggunian sa ZaNorte sa gipahigayong special session sa hinapos nga bahin sa miaging semana pinasikad sa hangyo nga gipadangat ni Governor Rolando Yebes.

Sumala pa gitugot ilawom sa kasamtangang gimbut-an sa Government Accounting and Auditing Rules nga ang 5% Calamity Fund mamahimong magamit diha na sa pagpalit sa susamang mga kahimanan silbing kabahin sa preparasyon alang na sa mga kalamidad ug katalagman. Si Governor Yebes sa iyang kabahin nagkanayon nga lima ka mga state of the art nga mga ambulansiya ang iyang paliton samtang laing tulo ang dawatonon sa probinsiya nga hinatag gikan sa OISCA International sa Japan.

Ang pagbatun karon ug mga modernong ambulansiya sibu na sa plano karon sa probinsiya sa pagpatikyop sa ubang mga hospitals nga giplanohang himoon na lang nga mga clinic o infirmary sa tuyo nga ang mga personahe niini ug ubang doctor magamit para na sa operasyon sa ZaNorte Medical Center. Kay sa pagkakaron adunay mga hospital nga ilawom sa pagdumala sa probinsiya wala makalugway ug tukmang sirbisyo sa rason nga nagkuwang sila sa gikinahanglang kahimanan ug mga doctor busa nagpunay ug gastu ang probinsiya sa ilang operasyon nga wala makahatag sa hustong sirbisyo sa katawhan kay kasagaran sa mga pasiente mosangko lang gihapon sa Provincial Hospital.

Kini maoy rason nga mopalit ang probinsiya ug mga ambulansiya kay sa maong mga tambalanan ipahimutang kini aron panahon sa emerhensiya ang pasiente mahatud gilayon sa Medical Center. Ang nasangpit nga mga ambulansiya nagbatun gayud sa mga life support system dili sama sa ambulansiya nga gipanghatag sa PCSO stretcher ray nakabutang. Sa pagka karon upat ka mga hospital ang giplanohang ikonbirtir na lang ngadto sa usa ka infirmary clinic, hinoon wala maghisgut si Governor Yebes unsa kaayo kini nga mga hospitals sa probinsiya. (Press Freedom, Vol. XX No. 12)

*

 

prayer rally alang sa hustisya ni jalosjos gidugokan sa mabagang duot sa katawhan

Gihugpaan sa mabagang duot sa mga katawhan gikan sa nagkalainlaing sektor sa katilingban ang gipahigayon nga prayer ug march rally alang sa hustisya ni kanhi Congressman Romeo “Nonong” Jalosjos gihimo atubangan sa Capitol Plaza niadtung Miyerkules. Mga mayores sa tulo ka mga distrito uban sa ilang supporters, board members, religious groups, mga kawani sa kagamhanang probinsyal nga gipangulohan ni Governor Rolando Yebes ang mitambong sa maong rally. Lakip sa mitambong sa maong kalihukan mao ang duha ka mga mayor sa lungsod sa Tungawan ug Ipil, Zamboanga Sibugay kuyog ang ilang mga membro sa sangguniang bayan.

Gibanabana nga modul-an sa kuatro mil ka mga katawhan ang hiniusang misinggit sa usa ka tumong, “buhian na si Nonong Jalosjos” ug ihatag niya ang hustong hustisya ug kagawasan. Nagkalainlaing mamumulong ang gihatagan ug higayon nga makapabate sa ilang panahom kabahin sa nadangatan sa kanhi kongresista ang parehong nanawagan ngadto sa nasudnong pangamahanan ilabi na kang Justice Secretary Raul Gonzales nga dili na babagan ang gilugway nga release order nga giluwatan sa Bureau of Corrections tungod kay tapos na giserbe ni Jalosjos ang iyang sentensiya sulod sa bilangguan.

Ang mabagang duot sa mga katawhan gikan sa nagkalainlaing sektor sa katilingban ang gipahigayon nga prayer ug march rally alang sa hustisya ni kanhi Congressman Romeo “Nonong” Jalosjos gihimo atubangan sa Capitol Plaza niadtung Miyerkules.

Si Mayor Reil Manigsaca sa lungsod sa Rizal mipa-hayag nga niadtung Disyem-bre 22, nga nakapaule si Nonong Jalosjos apan gipadakop ug balik nahugno ang iyang paglaum tungod kay usa siya sa daghanan nga nakasaksi sa hilabihan untang pagmaya sa mga katawhan. Matud niya, imbes panahon sa pasko nga anaa ang kalipay ug paghudyaka kay nakapaule na ang giilang political leader sa probinsya apan sa kalit ug takulahaw lamang napalong ang tanan human kini gipa-aresto ug balik sa justice department.

Si Mayor Jesus Lim sa lungsod sa Salug ug maoy presidente sa Mayors League of the Philipines, Zamboanga del Norte Chapter nagkanayon nga sila sa mga mayores wala magpanuko sa pagkondenar sa gihimong aksiyon ni Justice Secretary Raul Gonzales gumikan sa iyang pagmando nga ibalik sa bilangguan si kanhi Cong-ressman Nonong Jalosjos. Ikaduhang lakang nga ilang gisagop mao ang pagtaud ug itom nga ribbon libot sa municipyo sa mga kalung-soran timaan sa ilang pagpadayag sa kamatayon sa hustisya.

Matud ni Mayor Lim ang maong prayer rally maoy ilang gikasabotan bisan tuod ug maoy permerong adlaw sa tingtrabaho sa tuig dos mil otso apan kini ilang gihimo aron paminawon ug dunggon sa mga kadagkoang opisyal sa kaulohan ang gibate nga sentemento sa mga kataw-han sa Zamboanga del Norte.

Si Mayor Augustines Magsalay sa lungsod sa Sergio Osmeña mipahayag nga ang ilang pagtambong sa prayer rally aron mapa-dayag sa mga katawhan nga sa ilang lungsod mibate usab sa dili makiangayon ug makatarunganon nga pag-tratar sa kanhi kongresista.

Matud ni Mayor Magsalay si Nonong Jalosjos ilang giisip nga usa ka amahan, igsuon ug matinud-anon nga higala tungod kay samtang usa pa kini ka gawasnon mao kini ang kalagmitan nga dangpanan sa mga problema sa mga katawhan. Si Mayor Carlito Feras sa lungsod sa Roxas mipabate sa iyang solidong supporta alang kagawasan ni Jalosjos gumikan kay dili siya mahimong mayor ug wala pa ang kanhi kongresista mitabang kaniya. Para ni Mayor Feras, ang hustisya para kang Nonong nahisama sa ‘hatag bawi’ kay samtang gibuhian na kini, gibakwe napod sa DOJ sa wala matinong hinungdan.

Gipadayag ni Vice Mayor Patri Jing Chan nga sila sa dakbayan sa Dapitan dili matukib ang ilang dakong kahasubo sa nadangatan ni kanhi Congressman Romeo Jalosjos. Kini ang gipabate nga pamahayag ni Vice Mayor Chan tungod sa bag-ong panghitabo sa usa ka tawo nga maoy ilang gilantaw nga haligi alang sa kalamboan sa dakbayan sa Dapitan. Matud ni Chan, sa dihang ilang nahibaw-an nga si Jalosjos gibuhian na niadtung Desyembre 16, 2007 ug dayon na kining makapaule sa dakbayan sa Dapitan ilang gihimo ang selebrasyon diha sa tumang pagsadya ug pagmaya. Gani sa dihang gika-eskedyul na ang pag-abot ni Nonong dugang pa ni Chan, daghan ang prepa-rasyon sama sa mga pag-kaon aron ihalad ug idulot diha sa dakong selebrasyon.

Apan taliwala sa ilang pagpangandam, takulahaw lamang kalit napalong tungod sa dakong babag nga gihimo sa justice department. Si Vice Mayor Chan mi-pahayag nga sila sa Sanggu-niang Panlungsod mipanday ug resolusyon nga nagapelar ngadto kang Presidente Gloria Macapagal-Arroyo nga ipatuman na ang dis-charge certificate nga gilu-watan sa Bureau of Correc-tions alang sa pagpagawas kang kanhi Congressman Romeo Jalosjos nga gipetsa-han ug Disyembre 16, 2007.

Gawas sa mga mayores sa Zamboanga del Norte nga mipabate sa ilang pamahayag, mipadayag usab sa ilang syentimento ug pagsupporta ang mga mayores gikan sa Zambo-anga Sibugay kinsa mitam-bong kagahapon sa gihimo nga prayer rally. Si Mayor Randy Climaco sa lungsod sa Tungawan, Zamboanga Sibugay mihu-lagway kang Jalosjos nga usa ka maayong tawo, sumala sa iyang nasinate sa ilang paghimamat didto sa kaulohan. Maoy hinungdan matud ni Mayor Climaco, wala siya magpanuko sa pagsuporta sa panawagan alang sa sayo nga pagawas ni Nonong Jalosjos. (The New Nandau, Vol. XVII No.26)

*

 
PERMITS SA LGU’S WALA KINAHANGLANA PARA SA 
PAGHATAG SA LISENSIYA SA ZANORTE MEDICAL CENTER

Giklaro sa Department of Health nga wala na kinahanglana ang pagtuman sa lukat sa mga local permits gikan sa kagamhanang local para sa gikinahanglang lesensiya alang sa bag-ong Zamboanga del Norte Medical Center. Kini ang gipahayag ni Assistant Regional Director Edgardo Gonzaga sa DOH Regional Office sa dakbayan sa Zamboanga.

Giklaro usab ni Director Gonzaga nga sila sa Department of Health higpit nga nagapaluyo sa programa nga gipadas-og ni Governor Rolando Yebes ilabi na sa sumbanan sa pangagamhanan niini “Una sa Tanan ang Katawhan.” Giplanog usab ni Director Gonzaga ang pagpahalipay kang Governor Yebes sa gihimo niining mga paningkamut ug mga kalihukan para sa ZaNorte. Gipahibawo usab sa DOH Regional Office nga sa tanang higayon ang ilang buhatan andam mohatag unsa may pangayuon sa ZaNorte para sa health service delivery.

Sila sa Department of Health higpit nga nagapaluyo sa programa nga gipadas-og ni Governor Rolando Yebes ilabi na sa sumbanan sa pangagamhanan niini “Una sa Tanan ang Katawhan.”

Ang lesensiya sa ZaNorte Medical Center, matud pa ni Director Gonzaga kasamtangan nang giproseso karon sa ilang central office dungan sa pasalig nga motabang sila sa pagfollow-up niini. Matud pa niya ang ilang buhatan sa reheyon nakapagawas na sa Certificate of Needs para sa ZaNorte Medical Center samtang wala usab undangi sa ilang licensing team ang pagpagawas sa bag-ong lesensiya. Pinasikad sa gipahigayong inspection sa licensing office sa DOH, ang ZaNorte Medical Center matud pa ni Director Gonzaga nagpakita nga naka comply na kini sa tanang mga gikinahanglan ug gamay na lang ang kuwang.

Si Assistant Director Gonzaga nagkanayon nga ilang tabangan si Governor Yebes nga mogawas na ang lesensiya sa medical center para makasingabot sa plano niining pagbukas sa hinapos nga bahin sa buwan sa Enero 2008. Sa samang bahin pormal nga gidawat kagahapong adlawa sa kagamhanang probinsiyal sa Zamboanga del Norte ang modul-an sa tunga sa milyon ka pesos nga pundo gikan sa President Gloria Macapagal-Arroyo Priority Program ilawom sa Department of Health.

Kini gipahigayon sa usa ka yanu nga seremonyas sa regional office sa DOH didto sa dakbayan sa Zamboanga kagahapong adlawa diin maoy mirepresentar kang Governor Rolando Yebes sa pagdawat sa pundo mao si Provincial Attorney Jes Gal Sarmiento, Jr. Ang pundo gitugyan ni Health Assistant Regional Director Edgardo Gonzaga kinsa mipasabot nga ang maong pundo nagagikan sa Center for Health Development-Zamboanga Peninsula nga mokabat sa P488,000. Sa interview sa mga meyembro sa Zamboanga del Norte United Correspondents, si Assistant Regional Director Gonzaga nagkanayon nga ang nasangpit nga pundo kabahin na sa Hospital Development Project nga gipatuman sa tibook nasud diini ang ZaNorte Medical Center usa na sa gipahatan ilawom sa maong programa.

Matud pa ni Director Gonzaga tungod sa gipakitang kadasig sa kagamhanang probinsiyal sa ZaNorte sa pagkonstrak ug bag-ong medical center sila sa Department of Health naikag usab sa paghatag ug ayuda aron matubag ang mga gikinahanglan sa usa ka bag-ong tambalanan. Ilawom sa maong pundo ilang gitinguha nga madeveloped nila mao ang Hospital Information System diin ilang gituhuan nga pinaagi sa pagpahiluna sa E-Library o Electronic Library makatabang sila sa pagpalambo sa hospital management information system sa tuyo nga makahatag kini ug mas epektibong sirbisyo ngadto sa katawhan.

Gipahibawo usab ni Assistant Regional Director Gonzaga nga sa kasamtangan nagsugod na sila sa pagtabang sa lalawigan sa ZaNorte pinaagi sa paggahin ug pundo alang na sa upgrading sa hospital ug mitabang usab sila sa pagdevelop sa province wide investment plan for health nga nagtinguha sa pagtabang sa tanang mga district hospitals sa lalawigan. (Press Freedom, Vol. XX No. 12)

*

 

Atty. Palpagan: “No decision at all”

Kon ang hukmanan wala maka-desider kon ‘fugitive from justice or not” si Nonong Jalosjos “then there is no decision as to whether the arrest was legal or not legal.” Kini ang legal opinion nga gipadayag ni Atty. Cresencio Palpagan, Jr. sa dihang gidismiss sa korte ang Writ of Habeas Corpus nga maoy gibasehan niini ang mando sa presidente pinaagi sa Department of Justice isip iyang ‘alter ego’ nga dunay control and supervision sa Bureau of Corrections kinahanglan respetoan tungod kay ang hukmanan dili maka-inquire sa ‘validity’ sa pagdakop ni Jalosjos hinungdan nga ang pagbilanggu niini dili illegal.

Atol sa hearing sa petition for Writ of Habeas Corpus sa sala ni RTC Presiding Judge Jesus Carbon, Jr., niadtung Desyembre 26, 2007 si Assistant Solicitor General Carl Miranda gipangutana sa husgado kon duna ba kini intensiyon nga ilang dal-on ug balik si Nonong Jalosjos sa National Bilibid Prison sa Muntinlupa apan wala kini makatubag. Dihadiha ang korte mimando nga dili dad-on ug balik si Jalosjos sa Manila ug magapabilin siya sa San Ramon Penal Colony sa Zamboanga City hangtud nga makapagawas siya ug desisyon.

Apan nabale ang hangin sa dihang ang korte mopagawas na sa iyang desisyon kay nanghinaw na kini. “The entire decision of the court, for me it is a no decision at all because the court did not decide,” nagkanayon si Atty. Palpagan. Matud ni Palpagan, kon ang korte moingon nga ang detention ni Jalosjos legal gumikan sa mando sa presidente, “were in the law that the president can order the arrest and detention of anybody?.” Sumala pa niya, ang batakang balaod duha ra ka klase, ang una mao ang constitution ug ikaduha ang rules of court nga nagmando nga ang tawo pagadakpon kon dunay warrant of arrest nga gi-isyu sa court or tri-bunal. “For the secretary of justice is never a court, never a tribunal vested by law to issue a warrant of arrest.”

Apan si Secretary Gonzales mimando nga dakpon si Jalosjos kay siya usa ka “fugitive from justice” kay milukso nga wala pa mahuman ang iyang serbisyo, apan ang korte (RTC Zamboanga City) miingon “I cannot decide whether he was a fugitive from justice or not”, para ni Palpagan kon ang korte dili maka-decide nga ‘fugitive from justice or not’ si Nonong, then there is no decision as to whether the arrest was legal or not legal. Therefore there should have been no decision whether the detention was lawful or not lawful and why did the court dismiss the habeas corpus…inconsistent.”

Gibasehan sa desisyon sa korte mao ang kamandoan sa presidente pinaagi sa Secretary of Justice ngadto sa Bureau of Corrections atubangan sa recall order sa justice department mahitungod sa commutation kabahin sa gipakanaug nga Discharge Certificate from Prison nga kinahanglan respetoan. Tungod kay duna may recall order ang secretary of justice, ang hukmanan miingon nga ang discharge certificate para kang Jalosjos dili na epektibo. Apan matud ni Palpagan, ang korte wala mohisgot kon kadtong recall order sa

Secretary of Justice sa desisyon sa Bureau of Corrections nga naghatag na ug penal nga kagawasan ni Nonong “legal ba o dili.” Ang hukmanan miingon, “the power to determine whether the act of the president in recalling the certificate of discharge was valid or not is not whithin the jurisdiction of the court in habeas corpus proceedings. “So..nanghunaw ang korte,” kanayon si Palpagan.

Matud niya ang tanang proseso gikan sa pag-compute sa sentensiya ni Nonong human mahatag ang ‘final computation of sentence’ ngadto sa office of the president ngadto na sa pagawas sa New Bilibid Prison ngadto na sa pagsubmiter sa gahum sa balaod sa dihang gidakop kini sa Regional PNP Command sa Zamboanga City ug ngadto sa paghatud kaniya sa San Ramon wala hisgute sa korte “whether it is legal or illegal.” Wala hisgute kon duna bay kalapasan nga nahimo si Congressman Jalosjos tungod kay ang gihisgutan lamang “tungod kay mando sa presidente pinaagi sa iyang ‘alter ego’ nga mao ang secretary of justice” kinahanglan tumanon.

Gipasabot ni Atty. Palpagan nga ang habeas corpus “is a transition remedy” ug dili “final remedy”. Ang habeas corpus dugang pasabot ni Palpagan ‘is a temporary relief,” apan tungod kay dunay ‘legal controversy’ kini ayagon pinaagi sa hustong proceedings kon si kanhi Congressman Nonong Jalosjos “was a fugitive from justice” sa dihang milakaw kini gikan sa prisohan (National Bilibid Prison). Para ni Palpagan, ang angayan husayon sa korte sa ilang gipasaka nga haebas corpus mahitungod sa issue kon ang Regional PNP Command ug pagbilanggu ug balik ni Nonong Jalosjos sa San Ramon legal o ba dili.

Alang ni Palpagan dunay hustong prosesso ang giagian sa pagawas ni Nonong. Ilawom sa BuCor manual, ang Certificate of Discharge from Prison nga gi-isyu sa Bureau of Corrections “is considered final and is not revocable.” Ang discharge certificate sa BuCor dugang ni Palpagan usa ka public and official document. “Dili bastabasta ang pag-recall sa usa ka public document nga naka-atain na ug status of finality,” apan dunay interbensiyon gikan sa opesina sa presidente pinaagi sa office of the secretary of justice. Ang interbensiyon kabahin sa gihimong aksiyon sa BuCor diha sa giluwatan nga release order apan alang kaniya dili ma-revoke o ka ma-recall. Mahimo lamang kini kon dunay court proceedings nga gub-on, validate ug i-revoke ang public document. Apan para ni Palpagan wala mahitabo tungod kay order lang sa secretary of justice nga gi-recall ang time credit isip pribilihiyo sa sayo nga kagawasan ni Jalosjos.

Ang issue sa habeas corpus mao ang validity sa detention ni Jalosjos apan wala kini hisgute sa desisyon. Matud niya ang pagbilanggu kang Jalosjos dili balido tungod kay ang pag-aresto dili usab balido gumikan kay wala kini suportahe ug arrest warrant o re-commitment warant nga giluwatan sa korte o kaha sa tribunal. “Tungod kay walay arrest warrant, walay commitment warrant not falling within the exception is also not valid.” Para ni Palpagan niadtung Disyembre 16, 2007 natapos na ang pagserbisyo sa sentensiya ni Nonong tapos gimando sa presidente ang commutation sa iyang silot gikan sa double life improsonment gipaubsan ngadto nalang sa 16 ka tuig, tulo ka bulan ug tulo ka adlaw.

Mikompleto ang iyang sentensiya sa dihang naang-kon ang ‘Good Time Conduct Allowance’ nga makapa minus pa gayud ug dugang nga tuig hangtud misibo sa Disyembre 16, 2007.  Si Atty. Banjo Cordero, usa sa mga legal councel ni Jalosjos nagkanayon nga ang pribilihiyo nga gihatag kang Jalosjos gikan sa Bureau of Corrections kabahin sa GTCA kon Good Time Conduct Allowance dili na ma-revoke ilawom sa Manual of Colonist nga gipermahan kanhi ni Secretary of Justice Artemio Toquero. Ilawom sa Section 16 sa manual kabahin sa revocation of GTCA. “GCTA once granted shall not be revoke without just cause.” Taliwala sa maong balaod, si Secretary Gonzales mi-revoke sa GCTA pinaagi sa iyang giluwatang memorandum pinitsahan ug Enero 1, 2008.

Para ni Atty. Corder, usa ka ulahi nga lakang sa justice department aron mahulipan ang ilang mga tinunto ug binuang aron iduot sa ka-alaotan si Nonong Jalosjos. Mahitungod sa giingon ni Secretary Gonzales sa iyang memorandum nga walay basehan ang gihatag nga Good Time Conduct Allowance hinungdan nga miubos ang commuted sentence ni Jalosjos, si Atty. Cordero nagkanayon nga walay igong kapasikaran nga gisandigan ang kalihim tungod kay gitugotan sa Classification Board nga si Nonong isip colonist maka-avail sa maong pribilihiyo.

Sumala pa ni Atty. Palpagan sa panahon ni Bureau of Corrections Director Ricardo Dapat, subra sa kinientos ka mga binilanggu ang gipagawas sa prisohan “discharge from service” uban na niini si kanhi Congressman Jalosjos sa susamang kahimtang, “applying equally under the provision of the law on GTCA (Good Time Conduct Allowance) and ATA (Additional Time Allowance) for prisoners. “Why was Congressman Jalosjos singled out, why was he arrested.”

Matud ni Palpagan nga buot bang ipasabot kon nasayop or illegal ang computation sa Bureau of Corrections manawagan ang gobiyerno sa pilipinas nga kadtong mga piniriso nga gibuhian pabalikon sa bilangguan? Si Palpagan isip abugado ug advocates dili siya mosanong nga adunay ‘total failure of justice’ sa kabahin ni Jalosjos ug iya lamang gituhuan nga kining maong panghitabo usa lamang ka exceptional circumstances. Naglaraw karon ang kampo ni Jalosjos pinaagi sa iyang mga abugado nga ilang dal-on ang desisyon ni Judge Carbon ngadto sa Court of Appeals ug ang ikaduhang plano mao ang pagpasaka ug petition for Certiorary and Mandamous mahitungod sa desisyon sa Secretary of Justice. (The New Nandau, Vol. XVII No.26)

 
 

JALOSJOS DISMAYADO SA DISISYON SA KORTE

Dismayado si kanhi Congressman Romeo “Nonong” Jalosjos sa nahimong hukom nga gipakanaug sa korte sa dakbayan sa Zamboanga may kalabutan na sa giduso nilang Writ of Habeas Corpus kay milihay ang huwes sa pagtuki sa isyu kon ang pagbiya ni Nonong sa New Bilibid Prison pinasikad sa Certificate of Discharge gitugutan ug uban pang mga isyu.

Kini ang gihimong paghulagway sa mga abogado ni Nonong Jalosjos sa gipasaka niyang Writ of Habeas Corpus atubangan sa Regional Trial Court Branch 16 ilawom sa sala ni Judge Jesus Carbon, Jr. sa dihang gipakanaug sa korte ang napulo ug unom ka pahinang disisyon niadtong Huwebes sa hapon Enero 3, 2007. Ang disisyon ni Judge Carbon migawas mga pasado alas 4:00 sa kahaponon sa Enero 3.

Sa iyang disisyon nga giluwatan si Judge Carbon nagkanayon nga alang sa mga isyu kon si Jalosjos may pagtugot ba sa pagbiya sa New Bilibid Prison pinasikad sa iyang Certificate of Discharge nga pinirmahan ni Penal Superintendent Juanito Leapando, ika duha kon si Jalosjos mieskapo ba gikan sa prisohan ug ikatulo kon gipasikad ba sa balaod ang iyang pag-aresto ug balik didto sa dakbayan sa Dapitan ang maong mga butang nga dili angayang hisgutan ug iresolbar sa gipasakang habeas corpus.

Bugtong gidisisyonan ni Judge Carbon nga si Nonong Jalosjos ang “lawfully detained” sa San Ramon Prison and Penal Farm sa dakbayan sa Zamboanga aron sa pagsirbi sa iyang commuted sentence nga 16 ka tuig ug tulo ka buwan ug tulo ka adlaw. Ang mga abogado ni Nonong Jalosjos, midason nga husto ang nakabutang sa disisyon ni Judge Carbon nga ang commuted sentence ni Nonong 16 ka tuig. Kini maoy pabilin niyang sirbisyohan sulod sa prisohan kon dili ilakip na sa pagkwenta ang Good Conduct Time Allowance ug Additional Time Allowance.

Sa gihimong pagsumada sa Bureau of Corrections sa Good Conduct Time Allowance ug Additional Time Allowance ni Jalosjos milugwa nga si Nonong mamahimo nang makagawas sa prisohan sa nakalabay nga Desyembre 16, 2007. Ang nasangpit nga computation maoy gikwestyon ni Justice Secretary Raul Gonzales ug iyaha kining gikanselar kay sumala pa nasayop ang Bureau of Corrections. Sa tigum sa mga abogado ni Nonong didto sa San Ramon Prison and Penal Farm, matud pa ni Atty. Cres Palpagan, Jr. usa sa legal counsel nga ang kanhi kongresista sa ZaNorte ang midisidir nga dili na sila moapilar o kaha mangayo ug rekonsiderasyon sa hukom nga gipakanaug ni Judge Carbon kay sa nakita niini dili gihapon sila mahatagan sa gipangayo nilang hustisya.

Sa nasayran si Nonong wala na maghuwat nga kuhaon pa ug mga tinugyanan sa Bureau of Corrections aron dalhon balik sa New Bilibid Prison, diin kagahapon sa hapon luwan sa usa ka pribadong abyon uban sa mga escorts niini milupad kini ug balik sa Manila ug mibalik sa Muntinlupa. Matud pa ni Atty. Palpagan gidawat ni Nonong nga dili gayud siya makaangkon sa gipangita niyang hustisya taliwala sa klaro kaayong mga paglapas sa iyang katungod ug wala pagsunod sa gimbut-an sa balaod.

Matud pa ni Atty. Palpagan sa disisyon nga gipakanaug ni Judge Carbon kini nagpakita nga daw aduna kiniy pag-ukon-ukon ug labaw sa tanan wala kini mopakanaug ug disisyon sa mga isyu nga ilang giduso atubangan sa hukmanan. Sa iyang kabahin si Governor Rolando Yebes nga naatol sa iyang pagbisita kang Nonong Jalosjos sa San Ramon Prison and Penal Farm sa hapon sa Huwebes sa dihang gipakanaug nga disisyon sa korte, nagkanayon nga sa iyang kaugalingong opinion nga ang disisyon nga gipakanaug ni Judge Carbon, usa ka disisyon sa huwes nga hapit na moretiro sa sirbisyo.

Matud pa sa gobernador wala gayud tukia ni Judge Carbon ang mga nanag-unang mga isyu nga gisang-at atubangan sa iyang korte nga maoy gisandigan sa petisyong habeas corpus ni Nonong. Gihulagway ni Governor Yebes ang disisyon ni Judge Carbon nga usa ka disisyon nga nagpakita nga under pressure ang judge nga napakyas sa pagpakanaug sa pagpakanaug sa tinud-anay nga disisyon alang sa constitutional rights sa usa ka lungsuranon. Taliwala sa maong disisyon sa RTC sa dakbayan sa Zamboanga ang gobernador nagkanayon nga nagapabiling daghan pang kapilian ang kanhi kongresista sa ZaNorte sa pagpanalipod sa iyang nayatakan nga katungod.

Usa na niini matud pa sa gobernador mao ang pagpasaka ug motion for reconsideration, ika duha ang pag-apilar sa gipakanaug nga kamanduan sa kalihim sa hustisya nga giusab ang pag-ihap sa iyang sentensiya ug mamahimo usab nga mopasaka si Nonong ug mandamus aron manduan sa korte nga ipa-epekto ang iyang discharge order ug ibalik sa pagkwenta sa iyang commuted sentence ang mga deductions alang na sa Additional Time Allowance ug Good Conduct Time Allowance lakip na sa pagka colonist ni Nonong.

Apan niining tanan si kanhi Congressman Nonong Jalosjos mao ra gayud ang makadisidir unsa nga option ang iyang pagapilion. Samtang sa ilang kabahin nga mga opisyales sa probinsiya padayon nilang ipadas-og nga hatagan na si Nonong sa iyang kagawasan sanglit hingpit na kining nakasirbisyo sa iyang sentensiya. Kahinumduman ang League of Municipalities-ZaNorte Chapter nagpahigayon ug usa ka protest rally niadtong Enero 2, 2008 ning dakbayan sa Dipolog atubangan sa ilang giilang illegal nga pagditinir ug pag-aresto kang Nonong. Sa iyang kabahin si Governor Yebes nagpadala usab ug suwat ngadto kang Presidente Arroyo nga nag-apilar alang na sa pagpagawas ni Nonong pinasikad sa nahisgutan nang mga rason.

Sa kasamtangan si Nonong padayon pang naminaw sa mga sugyot gikan sa iyang mga abogado ug kauban unsay pinaka epektibong lakang nga pagasagupon. Giklaro usab ni Governor Yebes nga wala makapaluya sa ilang grupo ang nasangpit nga disisyon hinoon kini maoy nakadugang sa ilang kadasig sa pagpadas-og alang na sa hustisya para kang Nonong. Gihulagway usab sa gobernador ang reaksiyon ni Nonong pagka hibawo sa disisyon nga kini nahugno apan dali ra usab nga nakarecover. (Press Freedom, Vol. XX No. 12)

*

 

“Walay makaputol sa akong bungot bahala  mosangko sa yuta hangtud dili pagawson si Nonong”
Mayor Eding: Hangtud dili makagawas si Jalosjos magapadayon ang mass action

Gideklarar ni Mayor Norbe Eding sa lungsod sa Sibuco nga hangtud dili makagawas si Nonong Jalosjos sa bilangguan, magapadayon ang mass aksiyon sa mga ka-tawhan sa Zamboanga del Norte. Kini ang gpadayag ni Mayor Eding, legal adviser sa Mayors League of the Philipines, Zamboanga del Norte Chapter sa iyang pakigpolong atol sa prayer rally nga gihimo sa Capitol Plaza.

Para ni Mayor Eding, ang Zamboanga del Norte nahimutang sa alanganin ug dakong kaulaw kay samtang gideklarar kini nga usa sa pinaka pobre nga probinsya sa tibuok pilipinas, nasinate pa gayud ang krisis sa inhustisya. Matud ni Mayor Eding ilawom sa Arroyo administration nagbaton kini ug secretary of justice nga unta ‘good standing member of the philipine bar’ apan subo lamang pamalandungon nga siya, isip usab membro sa philipine bar, si Gonzales nagpakaulaw lamang sa ilang legal profession.

Sumala pa niya, si Secretary Gonzales dili pareha sa ubang mga abugado sama kanila nga makatawhanon ug nagtamod sa prinsipyo sa balaod. Matud niya, si Gonzales sama lamang sa usa ka ordinardyong tawo nga molopyo sa pilipinas apan naka-tsamba kay gitudlo sa presidente isip secretary of justice. Tungod sa iyang posisyon, dugang pa ni Eding, gipakaulawan ni Gonzales ang mga katawhan sa Zamboanga del Norte. Tungod niini, samtang temporaryo pa ang posisyon ni Gonzales isip secretary of justice, iyang gihagit ang mga katawhan uban sa pagpakigduyog sa resolusyon nga gidasonan sa Mayors League sa Zamboanga del Norte nga babagan ang confirmation ni Gonzales ngadto sa Commission on Appointment.

Matud ni Mayor Eding, kon nahisama pa siya ni Nonong nga giyatakan ang iyang katungod, hayan dili na siya makita karong mga panahona tungod kay dili niya kaya nga makigharong sa usa ka institusyon nga dili maantigong morespeto sa hustisya ug sa tawhanong katungod. Sa interview, gipahayag ni Mayor Eding nga dili niya balbasan iyang bungot hangtud nga dili makagawas si Jalosjos. Sa pikas bahin, gipasalamatan ni Governor Yebes ang mga katawhan nga miduyog sa usa ka dakong kawsa alang sa hustisya ug kagawasan para kang kanhi Congressman Romeo Jalosjos.

Matud pa ni Governor Yebes, wala siya magdahum nga ingon niini kadaghan sa mga tawo ang mitambong sa maong prayer rally ug kini maoy nagpaila nga ang mga katawhan sa Zamboanga del Norte mahigugmaon sa kaangayan ug kagawasan. Human sa prayer rally gihimo ang pagmartsa sa mga nag-unang kadalanan libot sa dakbayan sa Dipolog bitbit ang mga streamers ug placards nga nagdemanda sa hustisya ug kagawasan ni Jalosjos. (The New Nandau, Vol. XVII No.26)

*

 

ELMEDULAN GI-ARESTO SA DIPOLOG POLICE

Giaresto kagahapon sa Dipolog Police ang usa ka magsisibya sa radio atubangan sa giluwatang warrant of arrest ni Judge Victoriano Lacaya, Jr. sa Municipal Trial Court in Cities Branch I ning dakbayan sa Dipolog. Ang giaresto sa kapulisan mao si Elmer Elmedulan mga ala 1:30 kagahapon sa hapon tagad mitapos usab ang radio program niini sulod mismo sa ABC Compound ug kasamtangang gibalhog sa prisohan sa Dipolog Police.

Si Elmer Elmedulan ang giaresto sa kapulisan mga ala 1:30 sa hapon tagad mitapos usab ang radio program niini sulod mismo sa ABC Compound ug kasamtangang gibalhog sa prisohan sa Dipolog Police.

Ang warrant of arrest may kalabutan na sa kasong gipasaka ni Gaudencio Dalagan nga sumbong Falsification of Public Documents. Uban sa gimandu ni Judge Lacaya nga paga arestohon mao ang kapuyo ni Elmedulan nga si Bebelyn Jamero apan sumala pa sa Dipolog Police tagad kining naka eskapo ug wala na maabti sa mga tinugyanan didto sa ilang pinuy-anan sa may Fishermen’s Village ug sa gamay niining tindahan atubangan sa DENR.

Si Elmedulan nabalhog gayud sa detention cell sa Dipolog Police sulod sa pipila ka oras apan sa wala pa mag-alas singko sa hapon kini naka-angkon sa iyang temporaryong kagawasan human makabutang ug peyansa nga mobalor ug P12,000 ka pesos. Ang warrant of arrest nga gipakanaug ni Judge Lacaya gipagawas niadto pang Desyembre 14, 2007 ug sa nakita daw tagad pa gipasaulog sa Dipolog Police si Elmedulan sa pasko ug bag-ong tuig ayha gipa-epekto niini ang arrest order gikan sa korte.

Sa dihang diha na sulod sa selda si Elmedulan pipila sa mga kauban niini ang mibabag sa pipila ka mga photo journalist sa pagkuha ug hulagway nga diha siya sulod sa prisohan. Sa dihang dugang photo journalist ang miabot kay gusto mokuha ug hulagway ni Elmedulan kini milokluk ug maayo sa kilid aron dili makuhaan ug hulagway. Angayang kahinumduman si Gaudencio Dalagan, mao ang bana sa kapuyo karon ni Elmedulan nga si Bebelyn Jamero.  Gikasohan sila Elmedulan ug iyang kapuyo nga si Bebelyn ug Falsification of Public Documents atubangan sa gihimong pag-usab nila sa birth records sa mga anak ni Gaudencio. (Press Freedom, Vol. XX No. 12)

*

 

Gov. Yebes andam manguna aron  kapanalipdan ang mga katawhan

Pagpakigbisog aron kapanalipdan ang katungod ug kagawasan maoy nahimong baruganan ni Governor Rolando Yebes nga siya manguna aron batokan ang bisan unsang inhustisya nga ipatigbabaw sa atong gobiyerno tungod ug alang sa mga katawhan sa Zamboanga del Norte. Kini ang gipadayag sa gobernador samtang nasi-nate karon sa mga katawhan ang dili maiangayon ug makatarunganon nga pagpa-hamtang sa hustong balaod alang sa usa ka tawo nga taga Zamboanga del Norte.

Para ni Governor Yebes, ma Jalosjos man ug dili, basta katungod ang hilabtan sa mga katawhan andam siyang mobarug ug motindog aron makigbisog tungod ug alang sa tinuod nga hustisya. Matud sa gobernador, sa kaso ni Jalosjos mi-agi na sa hustong proseso hinungdan nga migawas ang release order. Mismo si Justice Secretary Raul Gonzales miperma pa sa commutation apan tungod sa iyang katigulangon nakalimtan na niya nga apil diay siya sa pagpagawas ni Nonong Jalosjos.

Sumala ni Governor Yebes, ang nasud sa pilipinas misunod sa usa ka prinsipyo nga “rule of law and not of men” nga ang balaod mao gayud ang mopatigbabaw sa tanan nga pagabuhaton ug dili ang panghunahuna sa usa lamang ka tawo. Matud niya, niadtung Abril dos mil siyete, pinaagi sa mando ni Presidente Gloria Arroyo si Jalosjos gihatagan ug commutation para mapaubsan ang silot gikan sa ‘double life imprisonment’ ngadto sa 16 ka tuig. Apan tungod sa ‘good time conduct allowance’ napaubsan pa gayud ug dugang tuig hangtud nga kini sayo nga nakagawas gikan sa bilangguan. Apan tungod lamang sa mando sa usa ka tawo, si Jalosjos gipa-aresto ug balik nga wala gani arrest order o kaha re-commitment order aron kini ibilanggu ug balik.

Niadtung Desyembre 16, 2007, ang Bureau of Corrections miluwat ug release order para kang Jalosjos. Sa maong petsa dunay pito ka lain pang konbiktado nga gipagawas sa National Bilibid Prison tungod sa commutation. Apan ang gikatingad-an kay ang release order lamang para kang Jalosjos maoy gikuwestion sa Department of Justice. Para ni Governor Yebes, usa ka pagyatak sa tawhanong katungod ang nasinate sa kanhi kongresista tungod kay siya lamang sa pito nga gipagawas sa bilangguan ang gibabagan sa justice department.

Matud ni Governor Yebes si Presidente Arroyo wala na manggilabot sa kaso ni Nonong kay gipasagdan lang ang secretary of justice. Apan tungod sa kapritso ni Gonzales, mihimo kinig review sa computation ug mituis sa nahaunang computation sa Bureau of Corrections ug mibutyag nga si Jalosjos adto pa makagawas sa tuig dos mil dyes. Sumala sa gobernador, ang maayong nabuhat ni Jalosjos samtang didto kini sulod sa National Bilibid Prison gipapas lamang sa usa ka tawo. Iyang gipanawagan nga magkahiusa ang tanan aron ipatigbabaw ang kagawasan ug hustisya alang sa mga katawhan sa Zamboanga del Norte. (The New Nandau, Vol. XVII No.26)

*

 
OPA GIBU-AK NA SA GOBERNADOR DUNGAN SA PAGPAKANAUG UG MARCHING ORDERS

Kasaba ang nahimong sinugatan sa unang adlaw sa trabaho sa tuig 2008 sa mga tinugyanan sa Office of the Provincial Agriculturist ug Provincial Veterinarian’s Office sa Zamboanga del Norte sa unang tigum nga gipatawag sa gobernador. Kagahapon tibook buntag nga gipatawag sa tigum ni Governor Rolando Yebes ang mga tinugyanan sa agrikultura sa probinsiya diin iyang gipahungaw ang tanan niyang kasuko may kalabutan na sa nag-aginod nilang performance sa tuig 2007.

Mahinumduman sa programang Kapihan sa 1948 Cafeteria prangka nga gipalanog ni Governor Yebes ang iyang pagka dismaya sa performance sa agrikultura sa probinsiya nga wala gayud makatabok sa iyang passing grade sa ilang nabuhat sulod sa tuig 2007. Sa maong tigum wala na mohatag ug rason ang mga tinugyanan sa agrikultura sa probinsiya kon ngano nga wala sila makapasar sa performance sa miaging tuig. Apan gipasaligan siya nga sa kada quarter hatagan siya ug performance report sa upat ka mga district office karon sa agrikultura.

Sa maong tigum gipatuman sa gobernador ang pagbu-ak sa agrikultura ngadto sa upat ka mga distrito. Ang iyang gitudlo nga mahimong special deputy provincial agriculturist para sa 1st district mao si Noli Bengua, sa 2nd district si Maybel Bustallino, 3rd district si Mr. Vicente “Vic” Sanchez, Jr. ug alang sa Gutalac, Baliguian, Siocon, Sirawai ug Sibuco mao si Tony Maloto. Samtang nangita pa siya karon ug tawo nga kuwalipikado para maoy himoong division manager usab sa pagdumala sa mga farm tractors sa probinsiya.

Matud pa ni Governor Yebes maoy iyang mandu karon nga kada deputy provincial agriculturist kinahanglan magbuhat sa ilang kaugalingong mga programa ug plano nga ipatuman sulod sa ilang tagsa-tagsa ka distrito nga maoy ilahang subayon sa pagtrabaho. Ang mga special projects sama sa ethanol magapabilin sa pag-atiman ni Bustallino samtang sa fishery projects ilawom gihapon sa hurisdiksiyon ni Mr. Vic Sanchez. (Press Freedom, Vol. XX No. 12)

 
 

 HULAGWAY BALITA

 

 

*

 

Dodoy namag-ong tuig sa Purok Tambak, Minaog

Ma-initong gisugat ug giabi-abi sa katawhan sa Purok Tambak, Brgy. Minaog dinhi sa syudad sa Dipolog si 2nd District Congressman Rosendo ‘Dodoy’ S. Labadlabad dihang didto kini sa maong lugar mipahigayon sa iyang unang adlaw sa tuig 2008. Dala sa batan-ong magbabalaod nga si Dodoy Labadlabad kinsa na-ila usab sa Ka-uban sa Kauswagan ang mga pinaskuhan alang sa mga molupyo sa Purok Tambak nga nag-ila usab nga Sto. Niño Village mao ang simple, apan makabuhong nga paniudto nga iyang gipakigsaw-an sa mga taga didto ug mga tambal alang sa komon nga mga balati-an. Gipahigayon usab niini ang pulong pulong o pagpakig-konsultasyon sa katawhan sa maong lugar aron personal niya nga masayran ang mga buot ipadangat nila ngadto sa gobyerno.

Atol sa iyang giluwa-tang mensahe sa gipahiga-yong prog-rama human sa makabu-hong nga paniudto, si Kong. Dodoy mibutyag nga ang iyang pinakadakung gasa nga gidala sa Brgy. Minaog mao ang balor singko milyones ka pesos nga River Control Project nga hapit nang ipatuman. Iyang gipasabut nga pagpalapad kini sa kasamtangang river control sa maong barangay aron mas kaprotektahan ang mga taga Minaog ug ang ilang mga kabtangan kon dunay mahitabo unya nga mga pagbaha.

Samtang dugang niyang gibutyag nga iya usab nga gisanong ang hangyo ni City Mayor Evelyn T. Uy nga makongkreto ang approaches sa bag-ong tulay nga gihimo sa syudad nga mao karoy nagdugtong sa Brgy. Barra ug Minaog. Laing singko milyones ka pesos ang gigahin niini alang sa maong proyekto. Angayang kahibawo-an nga atoll sa ika 111 nga paghandum sa kamatayon sa nasudnong bayani nga si Dr. Jose P. Rizal niadtong Disyembre 30 diin si Kong. Dodoy Labadlabad maoy nahimong pinasidung-gang mamumulong sa progra-ma nga gipahigayon sa Plaza Magsaysay, gawas sa iyang giluwatang hagit sa katawhan nga padayunon ang kawsa ug panglantaw ni Rizal aron mawagtang ang mga sakit sa katilingban, iya usab nga gipresenta ang usa ka tseke nga mobalor ug tres milyones ka pesos isip tipik sa iyang gisaad nga otso milyones alang sa pagpa-lambo sa wa magamit nga Galas Satellite Market ngadto na sa usa ka skills training center nga magtudlo sa nagkadaiyang kahibalo sa katawhan nga ilang mahi-mong pasaporte sa pagpa-narbaho sa gawas sa nasud.

Tungod sa iyang pagbisita sa Tambak, Minaog nakaani kini ug dakung pasalamat ug pagdayeg sa katawhan didto sa nasangpit nga dapit. Si Minaog Brgy. Capt Ricardo “Kadong” Albarote nagkanayon nga daku ilang garbo ang pagbisita didto sa magbabalaod sanglit sayud sila nga sa kadaghan sa mga barangay sa Segundo distrito ug sa kadaghan sa mga kalihukan niini, maoy gipili nga bisitahan ang ilang dapit. Ang maong pamahayag ni Capt. Albarote gidasunan usab sa upat niya ka Kagawad sa barangay nga didto niadtong higayuna nga sila si Hon. Roger Luna, Hon. Nilo Nalzaro, Hon. Miguelita Padayhag ug Hon. Edilberto Jasulin. Sa iyang kabahin, si Purok President Este Eguia nagkanayon nga wala nila damha nga usa ka Kongresista ang mobisita sa Tambak panahon sa bag-ong tuig, magdala ug pagkaon ug uban pang gasa ug makig-salo kanila sa pani-udto panahon sa bag-ong tuig. (The New Nandau, Vol. XVII No.26)

*

 

Pulso Sa Katilingban
Cicer M. Binghay
 

The poor becomes poorer everyday

Paghimugso sa bag-ong tuig nagkalain-laing pang “lihi” gihimo sa nagkalain-laing tinuohan sa matag usa kanato. Nahuman ug natuman ang naandan pagpang lihi dungan sa patugtog sa unang linganay pagbugaw sa 2007 pagtagbo sa 2008. Karon human sa mga lihi, isunod nato ang unsay atong pagabuhaton alang sa 2008. Resolutions for the year 2008. We know that a clean and pleasant environment is inductive to health. Let us help to make our place more peaceful, more healthful, and more pleasant. Avoid throwing garbage into our rivers. We are the people who can save our own planet. Rampant destruction’s of the forests and pollution have catch up with us and we are now experiencing global warming, nga maoy naka usab nakabikil sa atong kahimtang sa panahon sa mga katingad-ang ulan, bagyo ug flash flood.

Kanako isunod ang kausaban. Hibalo kita nga ang pagpa-kaaron-ingnon is a false pride, is the bane of all relationship. Maka destroso, it hurts and it is a sin. It is said that pretense harasses a ruined man. If we have the courage to be what we are, for it is this acceptance that disarms the sharpest thing. Nganong magpa-aron-ingon when we can readily accept our true selves? Practice humility. Dayon be thankful that we are still alive and enjoying life’s happiness. So, live the day right. Tabangi ang nagkihanglan sa imong panabang. Be willing to share bread with the needy. Timan-I kanunay. It is not only bread that we should share. Share love as well. Be generous with words of praise and kind words, kay ang tawo wala mabuhi sa pan lamang. To be generous, we must forget past aches. Cast away all bitterness. Be broadminded and let the sunshine through. Gani kon hilig ka sa awit. Awita ang SMILE, nia ang manindot titik: “Smile through your heart is aching. Smile even though it’s breaking. When there are clouds in the sky you’ll get by. If you smile thru your face with sorrows. Smile for maybe tomorrow, you’ll find the sun come shining through for you. Light up your face with gladness. Hide every trace with sadness. Although a tear maybe ever so near, that’s the time you must kept on trying. Smile what’s the use of crying. You’ll find the sun come shining through if you just smile”.

Thomas Paine, bantugang magsusulat miingon: “I love the man that can smile in trouble, that can gather strenght from distress, and grow brave by reflection.  “Ti’s the business of little minds to shrink; whose conscience approves his conducts will pursue his principles unto death”. Nahibalo kita nga dili malikayan ang kapalpakan. Kalimtan ang kapalpakan pero tan-awon unsay mga kadaotan nahimo sa kapalpakan. We cannot run  away from weakness. We have to fight it. And again what is important is our attitude in meeting defeat. Why cry over a loss? Why sulk over defeat? Be cheerful, and smile, for behind even the thickest of clouds, the sun shines in all its brilliance. In other words, be optimistic even when face to face with darkest situation. Atong malukso ang tanang kalisod kon maninguha kita, for every problem has a solution.

Dayon maghiusa kitang tanan, pag-ampo sa kahitas-an magpadayon nga niining tuiga 2008 ang maayong binuhatan sa atong kagamhanan sa lalawigan. Nga sa katapusan dili ikahikaw sa mayor sa dakbayan sa Dipolog paghatag sa gipangayong permiso nga maokupahan na ang bag-ong gitukod hospital ni Gov. Rolando E. Yebes aron ikahatag ang gipangandoy’ng serbisyo social diha sa maayong panglawas alang sa tanang katawhan. Ikaduha maghiusa kita sa pag-ampo nga magpadayon ang nagpabiling mantalaan lokal gawas sa kalig-on sa the The New Nandau Today ug Press Freedom hangtod na tanan nga magpabilin itigbabaw ang mga inpormasyon nga “relevant” nga ikatumod sa lungsoranon. Nga gikan sa mga tinubdan sa balita ug inpormasyones matugkad natong tanan ang kamatuoran, nganong ning atong nasod, the poor become poorer everyday. Maayong bag-ong tuig sa tanan nga nagtamod sa panahon lungsodnon. (Press Freedom, Vol. XX No. 12)

 
Credits: Press Freedom is published every Saturday and entered as 3rd class mail matter in Dipolog City. Printed by Young Printing Press with Editorial Office located at Upper Turno, Dipolog City. Tel. No. (065) 212-4343 or 212-6665

*

MORE NEWS NGA BINISAYA

 

 

NOTE: SEND US YOUR NEWS.  Tell us what's going on in your barangays, clubs, schools, businesses and non profit organization. You can also send notices and announcements.
          

 

    Email to webmaster@dipolognon.com

      
Google
WEB THE DAILY DIPOLOGNON