January 6, 2005

 MOA tali NHI ug LGU-Dapitan pirmahan na alang sa kalambuan sa Rizal Shrine

Mahitabo mismo sa dakbayan sa Dapitan ang pagpirmahanay sa kasabutan kun Memorandum of Agreement o MOA tali sa National Historical Institute kun NHI ug LGU-Dapitan ubos sa pamunuan ni Mayor Dominador G. Jalosjos, Jr. diin kini naglangkob sa dugang kalambuan sa Parke ni Rizal nga anna-a nahimutang sa Talisay, dakbayan sa Dapitan.

Kini ang pinakaulahing kalambuan nga nakutlo gikan kang Konsehala Apple Marie A. Agolong, ang Chairman sa Komitiba sa Turismo sa Dapitan human ang negosasyon niini sa National Office sa NHI didto sa kauluhan.

Matud pa ni Konsehala Agolong personal niini nga gibisitahan ang NHI-Manila ug nahinabi ang NHI Executive Director nga si Director Ludovico D. Badoy alang sa pagdali sa maong lakang.

Kahinumduman personal nga gibisita ni Director Badoy ang Dapitan ug mismo ang Rizal Shrine nga naghatag ug kahigayunan sa pakighinabi sa konseho sa Dapitan ug ni Mayor Jalosjos diin nag-ani kanila nga mosulod sa usa ka kasabutan nga mopundar ug kantidad alang sa hingpit nga kalambuan sa parke ni Rizal.

Gani matod pa gihangyo sa kagamhanan sa dakbayan sa Dapitan ang paghatag sa deriktang superbisyon niini sa parke ni Rizal gikan sa NHI. Apan kay nahipatik man sa balaod nga ang Rizal Shrine isip adunay National Significance kini ubos gayud sa pagdumala sa nasyonal nga kagamhanan ug nga mo-kunsulta ang Dapitan sa NHI una kini mopadapat ug kalambuan sa parke ni Rizal.

Dugang saysay ni konsehala Agolong una sa plano pangtorismo sa kasamtangang administrasyon ang kalamboan sa Rizal Shrine diin matod pa maoy hinungdan sa pa-kasyudad sa Dapitan ingon man ang pagka-ila niini sa tibook nasud. (Maricon Reina G. Fabian, Dapitan City Information Division)

*

 TMG dili na deputize sa LTO

Hayan dili makahimo sa pagpatuman ang Traffic Management Gruop kon TMG sa Republic Act 4136, kon Land Transportation and Traffic Code of the Philipines human gimandoan sa Assistant Secretary sa LTO ang mga regional directors sa pag-revoke sa deputation sa TMG operatives. Mao kini ang gipahayag ni LTO Chief Yusoph Ismael base sa nadawat nilang kamanoan gikan ni Assec. Anneli Lontoc sa Land Transportation Office, Manila.

Ang maong kamandoan nagapahimangno sa operatiba sa TMG nga ang ila lamang tutokan sa ilang operasyon mao ang pagmintinar sa kahapsay ug kalinaw sa mga kadalanan ilabi na sa operasyon batok sa highjacking, carnapping ug highway robbery. Niini, gimando ni Lontoc ang mga LTO Regional Directors sa pagkansela sa deputation nga ilang gilugway ngadto sa TMG operatives, Ingon man, gimanduan usab sila sa pag-recall sa Temporary Operator’s Permit kon TOP nga gi-issue ngadto sa taga highway patrol.

Hinoon gipasabot ni Lontoc nga walay labot ang ubang lokal PNP operatives nga nadestino sa traffic function nga na-deputize sa LTO. (The New Nandau, Vol. XIV No. 32)

*

 Pagbansaybansay para mamahimong tour guide

Subay sa kagustuhan sa Provincial Tourism nga mamahi-mong lugar pangturista ang lalawigan sa Zamboanga del Norte tungod sa buhong ug maanindot nga mga talan-awon niini, giawhag karon sa maong buhatan nga mangandam na unya ang mga interesadong mamahimong tourguides dinhi sa probinsya.

Mao kini ang nasayran gikan ni Atty. Ivan Patrick Ang, ang Provincial Tourism Officer atol sa pagpakighinabi kaniya. Kahibaloan nga si Secretary Joseph Durano sa Department of Tourism ang mohatag ug mga professional tourguides nga nagagikan pa sa kaulohang Manila para dinhi sa probinsya, “free of charge” aron mama-himo kini sila ug pagbansay-bansay sa mga interesadong mamahimong tourguides unya.

Si Atty. Ang nag-awhag sa mga interesadong mama-himong tourguides nga moduol lang unya sa iyang buhatan. Nasayran atol sa ilang Executive Committee Meeting bag-ohay pa lamang nga ang Zamboanga del Norte Provincial Tourism Council ang mohimo usab kini ug usa ka island tour libot sa probinsya sa sunod tuig 2005, aron mahibaw-an, makita ug malista nila ang mga maanindot nga mga talan-awon alang sa kalamboan sa turismo dinhi sa lalawigan. (The New Nandau, Vol. XIV No. 32)

*

 Laing pebble smuggling nasakpan

Laing pagsuway sa pagsmuggle ug pebbles gikan sa lalawigan sa Zamboanga del Norte ang nasikop sa mga tinugyanan sa Provincial Environment and Development Office o PEDO didto sa lungsod sa Labason. Kini ang gibutyag ni Mr. Remelo Damuag, human masikop sa iyang mga ginsakupan ang usa ka transit mixer nga gipanag-iyahan sa DAKAY Construction Company nga maoy gikarga-han sa pebbles gikan sa Labason para ipayuhot unta pagawas sa atong lalawigan.

Ang PEDO workforce sa Labason nga gipanguluhan ni Antonio Cruz sa ilang gipahigayong checkpoint sa may Barangay Antonino, Labason sa Philippine Army Detachment ang malampo-song mikonpiskar sa gi-ismagol nga pebbles lakip na sa transit mixer nga maoy gikargahan niini.

Ang pagtransportar sa pebbles gipahigayon sa lawom na nga kagabhion mga alas 11:30 ang takna sa tuyo nga makalusot kini gikan sa mga otoridad. Si Mr. Damuag midugang sa pagpahayag nga ang pagbantay sa mga tinug-yanan sa PEDO gipahigayon nila sulod sa 24 oras, aron sa pagsiguro nga masakpan gayud kadtong gusto mopa-yuhot ug mga mineral resources nga walay hustong permit o pagtugot gikan sa gobyerno.

Mokabat sa 103 ka sakong pebbles ang nasikop nga gisuwayan sa pag-isma-gol sakay sa maong transit mixer nga gipanag-iyahan sa usa ka kontraktor nga taga Sugbu ug kasamtangang may proyekto karon diha sa Port of Pulauan sa dakbayan sa Dapitan ug gimaneho sa usa ka Demetrio Baguio. Ang nasangpit nga peb-bles gikatahong gipanag-iyahan sa usa ka Mrs. Lumbos.

Kahinumduman sa pag-lingkod sa administrasyong Yebes gimandu gilayon niini ang pagpahunong sa tanang pagmina sa pebbles lakip na ang pagtransportar niini. Matud pa ni Mr. Damuag kini nga kaso ilaha nang gisumitir ngadto sa buhatan sa Provincial Attorney aron maoy mopakanaug sa tukmang lakang kon kini multahan ba o kasohan atubangan sa hukmanan susama sa naha-unang mga pagsuway usab ug ismagol sa pebbles. (Press Freedom, Vol. XVII No. 26)

*

  18 ektaryas yuta gipalit ni Amatong kwestiyonable

Milutaw karon ang nagkadaiyang mga depekto sa transaksiyon nga gisudlan ni kanhi Governor Isagani Amtong may kalabutan na sa pagpalit sa 18 ektaryas nga yuta sa pamilyang Aguirre sa Barangay Don Jose Aguirre, Manukan, Zamboanga del Norte. Kini ang nasuta sa gihimo karong pagreview sa nasangpit nga transaksiyon sa buhatan sa gobernador basi na sa mga dokumento sama sa Deed of Absolute Sale nga gipirmahan ni kanhi Governor Amatong ug Mr. Teodoro Urquiaga.

Ang nasangpit nga yuta gipalit sa probinsiya sa kantidad nga P1.8 milyones ka pesos niadtong Hulyo 2003. Ang maong yuta nga gipalit sa probinsiya gipla-nohan ni Amatong nga maoy balhinan sa bag-ong sports complex human gimandu niini ang pagpademolish sa Zamboanga del Norte Cultural and Sports Center kay iyahang pulihan ug Performing Arts Center. Sa gihimong pagreview karon sa mga dokumento sa bag-ong administrasyon sa probinsiya milutaw nga ang maong transaksiyon daghan ug kuwang ug mga bikil.

Nasuta nga hangtud karon wala pa mabalhin sa pangalan sa lalawigan sa Zamboanga del Norte ang titulo sa yuta nga napalit gikan sa mga kaliwat ni Dona Maria Aguirre, ilabi na ang portion sa maong property nga gipalit sa lalawigan. Gawas niini wala usab iklaro sa Deed of Absolute Sale nga gipirmahan ni Amatong ug Urquiaga ang mga dulunan sa yuta nga gipalit sa probinsiya.

Sumala pa ang maong transaksiyon depektoso kay mibayad na ang probinsiya ug P1.8 milyones ka pesos bisan ug wala pa mabalhin ang pangalan sa titulo sa yuta pabor sa Zamboanga del Norte, sukwahi sa pagpamalit ug yuta nga gihimo sa ubang mga kagamhanang local sama sa Dipolog nga ang pagbayad himoon sa higayon nga mahingpit na ang tanang mga gikinahanglan ilabi na ang pagbatun sa titulo sa yuta nga napalit.

Apan ang nahitabo sa maong transaksiyon sa kanhi gobernador, bisan wala pay titulo nga napagawas ang tag-iya sa yuta gibayran na sa kuwarta gikan sa buhis sa mga katawhan. Kahinumduman usa ka kaso ang gipasaka karon atubangan sa Ombudsman batok na ni Amatong human masuta sa Sangguniang Panlalawigan sa miagi nga ang mibayad sa ‘capital gains tax’ ang probinsiya ginamit ang kuwarta sa mga magbubuhis, sigun na sa nahipos nga dokumento gikan sa Provincial Accountants Office, nga nahasukwahi sa unod sa gipirmahan nga Deed of Absolute Sale nga ang tag-iya sa yuta maoy mobayad sa maong buluhisan ngadto na sa BIR.

Gawas sa maong mga depekto nga milutaw karon, nakita usab nga ang tag-iya sa yuta wala makatuman sa gikapasalig niini diha sa kontrata nga sila ang responsable sa paghinlo sa maong yuta sa tanang mga nag-okopar niini karon sulod sa 30 ka adlaw gikan sa pagkahingpit sa maong kontrata. Matud pa sa buhatan sa gobernador hangtud karon nagapabilin nga anaa pay mga tawo nga nagpuyo sulod sa propriedad nga gipalit sa probinsiya nga wala pa mapapahawa ni Mr. Urquiga. Samtang padayong gisubay karon ang report nga agig regalo sa pagka palit sa maong yuta, si kanhi Governor Amatong gitumbok sa mga katawhan sa Don Jose Aguirre, nga gihatagan ug upat ka ektaryang yuta tapad sa napalit sa probinsiya. (Press Freedom, Vol. XVII No. 26)

*

  P80-M utangon sa Dipolog aron pagpataas sa boulevard

Ang Dipolog Boulevard Phase II mao ang top priority sa administrasyong Uy para karong 2005.

Kini ang gipahibawo ni Mayor Roberto Uy ngadto sa Sangguniang Panlungsod nga hangtud karon padayong nagtuki sa wala pa mahuman nga 2005 executive budget.

Kini ang giklaro ni Mayor Uy ngadto sa balay balauranan sa Dipolog, atubangan sa gipadas-og niining P80 milyones nga pagpangutang nga pagasudlan sa siyudad karong 2005.

Ang nasangpit nga tinguha ni Mayor Uy nakaani ug suporta gikan sa Sangguniang Panlungsod diin wala tanduga ang gibutang nga P80 milyones ka pesos nga pagpangutang nga pagahimoon sa siyudad sa sunod tuig. Si Vice Mayor Senen Angeles, mipahayag nga ang nasangpit nga pundo diha sa budget para sa tuig 2005 gipabilin nila tungod sa maong rason.

Hinoon ang maong kantidad gipasabot ni Angeles dili sigu alang na sa paghingpit sa Phase II sa boulevard kay sa gihimong pagbana-bana kini mokostar man ug balig P147 milyones ka pesos.

Sa sayu pa gipahayag usab ni City Treasurer Sancen Caroro, nga ang Dipolog aduna pay borrowing capacity nga kapin sa P100 million. Gawas sa tinguhang pagpangutang ug dugang para patas-an ang boulevard, nasayran nga ang administrasyong Uy mihangyo usab ni Presidente Gloria Macapagal-Arroyo nga ang maong proyekto mapahatan ug pundo sa Malacañang. (Press Freedom, Vol. XVII No. 26)

*

Dungan niining kasaulogan sa pasko ug sa umalabot nga bag-ong tuig, midagsang na pag-ayo ang mga kabataan nga misulabi ug pagpangayo ug limos sa mga katawhan diha sa kadalanan. Ang maong mga bata anaa sa linghod nga pangidaron ug haduol sa disgrasya sa kadalanan nga posibling makaguba sa ilang kaugmaon.

Usa lamang kini sa mga sitwasyon sa mga kabataan nga namatikdan sa probinsya nga kinahanglan hatagan ug tukmang pagtagad. Tungod niini ang provincial nga pangagamhanan sa Zamboanga del Norte pinaagi sa Committee on Women, Children and Family Affairs nga gipangulohan ni Board Member Cedric “Adre” Adriatico uban sa buhatan sa Provincial Social Welfare and Development Office nga gipangulohan usab ni Mrs. Hiede Maraon ang karon mihimo sa Children’s Welfare Code of Norte Zamboangueños.

Matud pa ni Ms. Katherine Barangot, legal researcher ni Bokal Adriatico, diha sa pagmugna sa maong childrens welfare code nga sulod sa maong balaodnon mao ang paghatag ug espesyal nga pagtagad sa mga programa alang sa mga bata dinhi sa probinsya. Lakip sa maong pagtagad ang survival and protection program sa mga kabataan ilabi na niadtong mga kabataang biktima sa exploitation and abuse pinasubay sa R.A 7610. Ang buhatan ni Board Member “Adre” Adriatico padayon karon nga gihimo sa mga paningkamot ug pagtuon aron maduso gilayon ang maong Children’s Welfares Code ngadtu sa Sanguniang Panlalawigan. Dugang pa ni Bokal Adriatico ila na nga gihimo ang mga pagpangandam alang sa ipahigayon nga public hearing.

Sa panapos nga pamahayag gipalanog ni Bokal Adriatico nga si Governor Rolando Yebes mihatag sa iyang kinatibuk-ang suporta aron mahatagan ug igong pagtagad sa probinsya ang mga kabataan nga nanginahanglan sa atong mga pag-amping ug pagpangga. (The New Nandau, Vol. XIV No. 32)

*

   extra cash gift ordinance Napasar na kaniadtong Desyembre 28

Napasar na kaniadtong Martes, Desyembre 28 atol sa gipahigayong regular nga sesyon sa konseho ning dakbayan sa Dipolog ang  Appropriation Ordinance  nga gipangamahanan ni Konsehal Ricky Mejorada nga maoy pagahimoong basihanan sa pagpahatag ug extra cash gift alang sa mga kawani sa kagamhanang lokal karong tuig 2004.

Dungan usab niini nga naaprobahan mao ang resolusyon nga nag-provide ug guidelines sa pagpanghatag sa nasangpit nga extra cash gift nga nagkantidad ug P5,000.

Kahibaluan nga dakong tinguha sa administrasyon ni Mayor Roberto Uy nga mahatagan ug extra cash gift ang mga kawani sa kagamhanang lokal sa Dipolog panahon sa pasko apan tungod sa pagpangita usab sa lig-ong basihanan sa pagpanghatag niini hinungdan nga adunay gamay nga pagkadelatar.

Sa pagkakaron ang mga kawani sa kagamhanang ang naghikay na sa ilang mga payrolls   alang sa extra cash gift aron maproseso sa mga hintungdang buhatan ug nagpaabot na lamang kon kanus-a kini nila makobra. (CIO Press Release No. 05-01, lbt)

*

MA nangalisngaw ang kaspa  sa kakusog sa hangin

Daghang kaspa miulbo ning bag-o lang gumikan sa ka kusog sa hangin ug sa ka pula sa botbot aning komentarista kuno sa estasyon sa mga Amatong. Gikus-kos na lang sa uban sa ilang ulo ang kahilas ug kalagot ilang gibati samtang nagpaminti nga naghinubay sa tagawtaw ni  MA.diha sa peryahan,este,programa diay sa radyo. Haskang espisoha gyud kuno kaayo sa hambog ni MA. Tiaw mo na nga naghisgot na man ug Quantum of Evidence, dayon paminaw dagway sa kaugalingon ngilngig na siya kaayo, nagsalimuang intawon ug panghagit ug debate sa mga abogado sa kapitolyo.Gi lektyuran pa niya ang mga abogado diha sa iyang peryahan, este sa kahanginan diay. Hoy! Murag Amaw! Tang-tanga sa kuno kadyot ng imong antiyuhos bi, itom man gud na kaayog bildo. Panamin sa, dayon pagkahuman hayurag hinay ang panit anang imong nawong basin baga na kaayo ug kunot-kunot na pareha sa panit sa imong kuan... Hehehehehe!

oooOooo

Pastilan si MA, nagsigeg panghilabot sa ubang sakop sa medya kay kuno mga turotot. Wa kabantay sa iyang kaugalingon. Kanang imong pagsigeg hisgot ug balaud sa radyo di ba hulhog man na anang mga abogado nga putig log-its sa imong luyo?di ba nag-agad ra ka unsay ilang itudlo?Unya unsa may atong itawag nimo karon? Labaw pa ka sa tarutot. Mura kag PANGHAW! Bwahhhhh!!!!!

oooOooo

Mura gyud si MA ug plakang guba nagbalik-balik ug yawyaw anang quantum of evidence lagi kuno.Gimanduan niya ang kapitolyo nga moimbistigar gyud sa kaso sa ilang  reporter, dili mag-agad sa resulta sa kaso nga nasang-at sa piskaliya kay substantial evidence ra kuno ang gikinahanglan sa balaod kon mohimo ang kapitolyo ug kaugalingong paghusay sa maong kaso. Unsa man MAW, dili gyod kaya patud-an sa quantum of evidence nga gitawag ug proof beyond reasonable doubt nang kasoha mao nga gusto ninyong sarapon? Sige, kay MA man gyod kaha ka, hala tang-tanga na pod nang imong dagtom kaayong antyuhos tan-awa ug ayo ang inyong sibot aron makit-an gyod ang dakong buslot ug dili gyod ma zero balance ang inyong pagpanarap. Ayaw lang gud kaulaw unsay porma sa imong kalimutaw, cute bitaw na ug ayuhog tan-aw, Hehehehehehehe!!!!!!!!! (The New Nandau, Vol. XIV No. 32)

*

kagamhanang lokal sa Marikina ug Dipolog Magbinaylo-ay ug development strategies
 

Gumikan sa daghanang kaayuhan, mabungahong kasinati-an ug pagbukas sa maayong relasyon pinaagi sa pagbinaylu-ay ug mga maayong ideya padulong sa kalamboan, usa ka resolusyon ang nadawat karon sa buhatan ni Mayor Roberto Y. Uy, gikan sa Sangguniang Panlungsod sa Marikina, nga mipabati sa ilang daku nga pasalamat sa kagamhanang lokal sa Dipolog tungod sa mainitong pag-abi-abi nga gipakita sa mga opisyales sa Dipolog, atol sa ilang gipahigayong Lakbay Aral ning dakbayan, niadtong ulahing bahin sa tuig 2004.

Gipabati usab atol sa maong resolusyon numero 169 sa Marikina City ang ilang wala damhi nga hospitality ug friendship nga gipakita sa mga opisyales nga gipangunahan ni Mayor Uy, Vice Mayor Senen Angeles ug mga konsehales niini, lakip na ang First Lady ning dakbayan nga si Madame Evelyn T. Uy, nga maoy nakapadugang sa ilang kaasgot nga makiglambigit dinhi sa dakbayan pinaagi sa pagbinaylo-ay ug development strategies nga naglangkob sa torismo ug investment, nga makahatag ug dugang kalambo-an sa duruha ka mga dakbayan, aron mapausbaw ang socio-economic conditions sa mga dakbayan.

Ug gumikan sa maong mga kalambo-an sa ilang gipahigayon nga lakbay aral sa Dipolog, ug sa tanang nahimo nilang mga experiences sa hamobo lang nga schedule, gilantaw karon sa mga opisyales sa Marikina City ang usa ka mabungahon nga relasyon tali sa Dipolog. nga makapadugang sa kalambo-an sa tagsa-tagsa ka mga siyudad. (CIO Press Release No. 05-02, PRR)

11 high pressure sodium lamps sa River Control gipasiga na
 

Pormal nga gipasiga ang 11 ka mga high pressure sodium lamps didto sa River Control sa Barangay Estaka, ning dakbayan sa Dipolog kaniadtong Desyembre 29, 2004.

Ang switch on sa mga suga gipangunahan ni Konsehal Alton Ratificar kinsa nagrepresentar kang Mayor Roberto Y. Uy  ug gisaksihan usab nila ni Kapitan Carlito Ortega kauban sa iyang mga konsehales ug kanhi Board Member Florentino Daarol uban pang mga dinapit nga bisita.

Human sa pagpasiga sa mga suga, si Kapitan Ortega ang mipaabot sa iyang dakong pasalamat sa kagamhanang lokal ubos sa administrasyon ni Mayor Uy tungod sa paghatag niini ug katumanan sa pangandoy sa ilang barangay nga masugaan ang River Control ilabi na kay kini makahatag ug dugang atraksiyon sa barangay Estaka lakip na sa tibuok dakbayan .

Kini makatabang usab aron mamahimong luwas ang pagsuroy-suroy sa katawhan sa maong dapit panahon sa kagabhion ug malikay usab ang krimen.

Samtang, dungan sa Switch On sa mga high pressure sodium lamps sa River Control, gipahigayon usab ang Turn-over sa Daycare Center sa Purok Violeta sa Looc Estaka nga gihatag sa kagamhanang probinsyal.

Gipahigayon usab ang Unveiling sa gipintang hulagway  sa unom ka mga Barangay Chairman sa Estaka  nga nagserbisyo sa maong barangay sukad kaniadtong 1972 ug kini  naglakip nila ni Fiscal Arquipo L. Adriatico, Franciso D. Barrientos, Agustin R. Adriatico, Cesario O. Santillana, Florentino A. Abrasaldo ug Engr. Carlito Ortega. (CIO Press Release No. 05-03, LBT)

Mayor Uy manumbalik sa katawhan pinaagi sa  pagpatuman sa mga nagkalain-laing proyekto

Walay hunong ang kagamhanang lokal sa Dipolog ubos sa administasyon ni Mayor Roberto Y. Uy sa pagpatuman sa mga nagkalain-laing proyektong pang–imprastraktura  dinhi ning dakbayan  sa tuyo nga kini kapahimuslan sa katawhan dili lang karong panahona apan lakip na sa sumosunod nga henerasyon.

Kahinumduman nga kaniadtong nakalabay nga tuig daghang mga proyekto ang nahuman sa administrasyong Uy sama sa pagbukas ug pagkongreto sa mga kadalanan, mga farm-to-market roads, pagtukod ug mga outdoor stage ug pag-repair sa mga school buildings ug uban pang edipisyo nga gipanag-iyahan sa kagamhanan, pag-instalar ug mga high pressure sodium lamps sa daplin sa kadalanan palibot sa dakbayan, pagpahimutang ug linya sa kuryente sa hilit nga mga kabarangayan, pagpanindot sa mga tourist spots sama sa Sungkilaw Falls ug Cogon Eco Park ug daghanang pang mga proyekto.

Natapos usab ang pagtrabaho niadtong nakalabay nga tuig ug karon sa katawhan ang Cogon-Diwan Modular Steel Bridge nga naghatag sa mga mag-uuma ug kasayon diha sa ilang pagtumod sa ilang produkto ngadto sa merkado ug nakatabang usab kini aron nga luwas ang mga residente nga makatabok sa suba panahon sa kusog nga ulan ug baha.

Samtang gamay nalang usab ang kulang ug hingpit na nga ma-turn-over ang usa sa pinakadakong proyekto sa administrasyong Uy nga mao ang Seawall and Foreshore Development Project o boulevard nga pormal nga gibuksan ngadto sa publiko kaniadtong Desyembre 6 ug karon padayong gidugok sa katawhan ilabi na panahon sa kagabhion.

Ang mga nagkalain-laing proyektong pang-imprastraktura nga gipatuman ni Mayor Uy dinhi sa Dipolog ug uban pang mga proyekto nga gilaraw niyang ipatuman karong tuiga, usa lamang sa paagi nga pagsumbalik sa gihatag nga pagsalig ug suporta sa katawhang Dipolognon ngadto na sa iyang administrasyon.  (CIO Press Release No. 05-04, LBT)

Magpapatigayon sa Dipolog Gi-awhag usab magpa-renew sa ilang mga business licenses

Gitawag karon ang atensiyon sa tanang magpapatigayon ning dakbayan sa Dipolog nga magpa-renew sa ilang tinuig nga mga business licenses, nga ang kagamhanang lokal sa Dipolog, ang nagapadayon ug dawat karon sa assessment ug renewal sa mga business licenses alang sa tuig 2005.

Gi-awhag usab ang hingtungdang magpapatigayon nga mopa-ilawom una sila sa usa ka assessment sa buhatan sa licensing division sa buhatan sa City Mayor sa dili pa sila molukat sa ilang Community Tax Certificate (CTC), aron sa panahon nga mobayad na unya sila sa ilang mga lisensiya, hingpit o tukma na ang balayronon nila sa CTC ug dili na magbalik-balik ug lukat kay nagkulang. Dugang pa ni Ms. Lourdes Pabilona, ang hepe sa nasangpit nga licensing division, nga dad-on usab nila ang ilang mga resibo sa miaging tuig (2004) isip usa sa requirement sa pagpahigayon sa assessment sa dili pa sila mokuha sa ilang barangay clearance ug CTC, aron ma-usa na lang ang pagahimo-on nila nga balayronon.

Gipaklaro ni Pabilona nga ang himoong assessment sa ilang buhatan maoy pagabasehan unya sa community tax certificate nga ilang pagabayron sa barangay. Kini nga pama-agi ilang gi-implementar karong tuiga aron malikayan ang inconvenience sa parte sa taxpayer nga makakuha ug duruha o tulo ka set sa ilang sedula kay nagkulang ang ilang gibayran nga community tax.

Nahibalo-an nga ang deadline sa pag-renew sa mga business licenses ug permits gitakda karong Enero 20, 2005.  Busa gi-awhag ang hingtungdang magpapatigayon nga mo-renew sa ilang mga lisensiya sa dili pa ang gitakda nga deadline aron malikayan unya ang dili pagsinabtanay o inconvenience. (CIO Press Release No. 05-05, PRR)

Daghan na ang nakapahimulos sa programang Tabang ni Lando sa Comunidad

Sulod lamang sa unom ka bulan nga paglingkod ni Governor Rolando Yebes sa miaging tuig, daghan na gayud nga mga katawhan ning lalawigan sa Zamboanga del Norte ang nakapahimulos sa Tabang ni Lando sa Comunidad (TLC) nga kasamtangang gidumala sa Community Development Assistance Unit (CDAU) nga gipanguluhan ni Roney Pacilan.

Mao kini ang gibutyag ni  Provincial Health Officer  Dr. Carmencita Icao diin adunay 19, 379 ka mga residente dinhi sa lalawigan, sulod pa lamang sa 53 ka mga barangay dinhi sa lalawigan ang libreng nakapahimulos sa maong serbisyo medikal sugod niadtong bulan sa Hulyo hangtud na sa Desyembre sa miaging tuig.

Dugang pa ni Dr. Icao nga adunay 2,406 ang naibtan ug ngipon, 5,371 ang nakonsulta sa mga doktor ug nahatagn sa libreng mga tambal  ug 1,306 ang natuli.

Nasayran nga ang TLC usa kini sa gitutukan nga programa sa administrasyong Yebes aron paglugway sa maong serbisyo ilabi na ngadto sa labaw’ng nanginahanglan sibo sa iyang panultihon nga “Una sa Tanan ang Katawhan”.

Duyog usab sa maong kalihukan mao ang pagpanghatag ug mga tilapia fingerlings, seedlings, pagpakaon sa mga bata ilabi na niadtong kulang sa timbang. 

Ang pagpahigayon sa TLC inabagan usab kini sa mga kawani sa Police Provincial Office nga gipanguluhan ni P/Supt. Jufel Adriatico, Provincial Health Office, nga gipanguluhan ni Dr. Icao, Provincial Nutrition Office nga gipanguluhan ni Mrs. Leila Realiza, Office of the Provincial Agriculturist nga gipanguluhan ni Mr. Vicente Sanchez, ug Provincial Social Welfare and Development Office pinaagi ni Mrs. Heidi Maraon. (Sheng, Provincial Information Center)

3 ka distrito sa Zamboanga del Norte Humod sa Proyekto sa inprastraktura ni Governor Yebes

Humod sa Proyekto sa inprastraktura ni Governor Rolando Yebes ang tulo ka distrito sa Zamboanga del Norte. Sulod sa unom pa lamang ka bulan nga paglingkod ni Governor Rolando Yebes isip amahan ning probinsya kini minghatag ug dakong pagtagad sa sektor sa inprastraktura, kahibaloan nga aduna nay dul-an gatosan ka mga proyekto ang naturn-over sa Gobernador sugod sa bulan sa Hulyo ngadto na sa bulan sa Disyembre sa tuig 2004.

Sa unang distrito ning lalawigan adunay kinatibuk-ang 20 ka mga proyekto ang napatuman niini, lakip sa mga dagkong proyekto mao ang paghatag sa pipeline extension sa barangay Sianib ug ang pag-ayum ayum sa Rural Integrated Development Program Building sa lungsod sa Polanco nga mokabat sa dul-an P500,000 ang kantidad nga inabagan sa Provincial Identification Fund ni Vice Governor Olvis. Ug usab ang Sprinkler Irrigation Project sa Brgy. Teresita sa Lungsod sa Piñan nga mokabat sa sobra 500,000 ka Pesos ang kantidad.

Sa Segundo distrito ning lalawigan adunay kinatibuk-ang 40 ka mga proyekto ang nahatag niini, lakip sa mga dagkong proyekto ang gitagana sa pagconstruct  sa stage sa Miputak East Central School ug ang perimeter fencing sa Livelihood Center sa Barra ning dakbayan nga mingkabat ang kantidad sa sobra usa ka milyon ka Pesos.

Samtang sa lungsod sa Roxas ug Siayan aduna usay gihatag nga proyekto ang Gobernador nga nagkantidad 3,300,000 milyones ka pesos kini mao ang Electrification Project sa brgy. Salisig sa lungsod sa Roxas ug usab ang Electrification Project sa Gunyan-Seriac-Soguilon-Mangilay sa lungsod sa Siayan.

Adunay 42 ka mga proyekto sa inprastraktura ang nabobo usab sa Tersiro distrito. Lakip sa mga proyekto niini mao paghatag ug sugang dagitab sa San, Isidro Sas sa Lungsod sa Gutalac ug duha ka Purok sa San Isidro sa lungsod sa Labason nga nagkantidad sa 1,604,000 ka pesos ug ang pag-ayum ayum sa District Hospital nga nagkantidad sa 700,000 ka pesos. (Roldan, Provincial Information Center)

Plow, Plant Now, Pay Later gihingusgan karon sa buhatan sa Provincial Agriculture

Mga programang pang-agrikultura nga gibaliwala sa miaging administrasyon, gihingusgan karon sa buhatan sa Provincial Agriculture pinaagi sa pagpahigayon sa programang Plow, Plant Now, Pay Later ngadto na sa mga pobreng mag-uuma. Subay sa maong programa ang paghatag ug pautang nga serbisyo truktura, ug pautang sa mga materyales para gamiton sa pagpananum, sama na sa cassava ug mga liso sa kamatis, talong ug uban pa.

Matud pa ni Vicente Sanchez, Jr., ang Head sa Provincial Agriculture, tumong ug tinguha gayud sa maong programa ang pagtabang sa mga pobreng mag-uuma aron duna silay makitang abot nga sagad makapaasenso sa ilang kaugalingon, aron dili usab kini magpabilin sa kapobrehon. Ang maong programa ubos usab sa tabang sa Community Development Assistance Unit kon CDAU nga maoy mangunay sa pag-identify sa nga recepiente, ug ang buhatan sa Provincial Agriculture na maoy mohatag ug technical assistance ug material assistance.

Tan-awon sa ilang buhatan ang mga recepiente kung aduna ba silay kapabilidad ug aduna bay paghigugma sa pagpananum, ug tinuod ba sila nga mga mag-uuma. Midugang pa ni Sanchez nga walay gibungat nga limitasyon sa pagpautang, kundili ila lamang lantawon ang kapabilidad sa mga recepiente ug asa taman ang ilang makaya. Andam ang ilang buhatan nga mohatag ug unsay ilang gikinahanglan. (Richel, Provincial Information Center)

Gov. Yebes gustong mapalambo ang turismo dinhi sa probinsya

Aron maila ug makita unsa ka nindot ang mga talan-awon dinhi sa probinsya sa Zamboanga del Norte, ang Zamboanga del Norte Provincial Tourism Council mobuhat ug usa ka ocular inspection sa kada distrito sugod Enero karong tuiga.

Kini pagasuroyon sa council alang na sa pagsanong sa kagustuhan ni Gov. Rolando Yebes nga mahibaw-an unsaon nga mapalambo pag ayo ang tourism industry dinhi sa probinsya ug makita sa mga domodoong ang ka maabi-abihon ug kamapahiyumon sa mga lomolopyo ning lalawigan.

Kahibaloan nga ang council karong Enero mohimo ug usa ka ocular inspection sa kada distrito ug kini pagasugdan karong Enero 15, diin mobisita kini sila sa Distrito I partikularmente sa Piñahon Island, Enero 21 ang falls sa Rizal, Enero 26 ang falls usab sa Sergio Osmeña ug Enero 30, sa Libuton Cave sa Manukan.

Si Engr. Remchile Sienes nga representante sa ZamboNorte Association in Illinois (ZAMNAI) ug si Erika Austin sa ZamboNorte Association in California (ZAMNAC) lumad nga taga Zamboanga del Norte nga bag-ohay pa lamang na-abot gikan sa Estados Unidos ang moduyog usab sa maong island tour sa tibuok probinsya aron masuta, maila ug makita ang mga maanindot nga talan-awon nga angayan ipromoter didto sa mga pinoy inig balik na unya nila sa Estados Unidos.

Subay usab niini, ang ZAMNAC nga usa ka organisasyon sa mga taga ZamboNorte sa California adunay programa nga gitawag ug “Balik ZamboNorte” diin aduna kini pagsubo karong tuig 2006. Ang maong programa gimugna para sa mga pinoy nga taga Zamboanga del Norte nga nanimuyo na didto sa Estados Unidos aron mobalik ug mobisita sa mga lugar pang turista dinhi na sa probinsya. (prets, Provincial Information Center)

Flying Session sa Manukan karong Enero 24, Ipahigayon

Dugang na usab nga hugna sa Flying Session ang pagahimuon sa lungsod sa Manukan karong Enero 24 ning tuiga.  Kini sumapa pa sa mga nakalap nga inpormasyon gikan sa gipahigayon nga unang sesyon sa mga bokal sa Sangguniang Panlalawigan niining tuiga.

Kahinumduman nga ang “Flying Session” namugna pinaagi sa resolution # 411 nga giduso nila ni Board Member Cedric “Adre” Adriatico ug Board Member Joseph Brendo C. Ajero.

Gimugna ang maong flying session aron mapaduol sa mga katawhan sa lungsod ang mga kalihukan sa probincyal nga pangagamhanan ug aron mahimamat usab sa mga opisyales sa probincya dili lang ang mga katawhan kon dili usab ang mga nanag unang mga problema ug panginahanglanon sa kalungsuran. 

Gikan sa lungsod sa Polanco nga maoy nahimong unang dapit diin gihimo ang maong flying session, karon aduna nay upat ka mga lungsod nga naagian niini nga mao ang mga lungsod sa Katipunan, Salug, Sibutad ug mamahimong ikalima ang lungsod sa Manukan.

Gikalipay pag ayo sa mga sakop sa Sangguniang Panlalawigan ang imbitasyon sa mga lokal nga opisyales sa lungsod sa Manukan nga didto pagahimuon ang flying session kay diha sa maong lungsod dako kaayo ang ilang pasalamat sa gihatag nga suporta sa mga katawhan ngadto kang Gov. Rolando E. Yebes ug Vice-Gov. Francis Olvis lakp na ang ilang mga kaubang mga board members.

Labot usab sa maong kalihukan ang pagahimuon nga Consultative Dialogue tali sa nagkadaiyang buhatan ug opisyales sa probinsya pinanguluhan ni Gov. Yebes aron mahatagan ug hingpit nga katin awan sa lungsod sa Manukan kabahin sa programa ug proyekto nga itagana alang sa dugang kalamboan sa nasangpit nga lungsod. (Hisyl Palma, Provincial Information Center)

BALITAHULAGWAY