Sa usa ka programa sa radio, gihingusgan ni Governor Yebes nga sa kontorbersiya nga nanghitabo karon sa kaulohan kabahin sa isyu sa jueteng angayan usab unta nga makita sa mga miyembro sa senado sa ilang inbestigasyon ang kahimtang usab sa illegal nga sugal ilabina ang masiao dinhi sa atong lokalidad. Tinguha sa gobernador nga iya kining mapaabot ngadto sa mga hingtungdan sa national government aron mahatagan sa igong pagtagad ang maong problema.

“Dili lamang jueteng ang masentro sa inbestigasyon sa senado apil na usab ang pagtumaw sa masiao dinhi sa Dipolog.”

Wala gililong ni Governor Yebes ang kabugnaw sa kapolisan paghatag ug action sa maong problema.

Sa na-obserbahan sa pagtumaw karon sa mga outlet sa Jai-alai dinhi sa atong dakbayan dungan usab mitumaw ang pagpataya diha sa mga kabarangayan nga mao ang masiao gikuha gikan sa resulta sa jai-alai. Kini maoy naghatag karon ug dakong pagduda sa mga katawhan nga gipaluyohan ug dag-kong opisyal sa gobyerno ug bisan sa kapolisan.

Sa inbestigasyon karon sa senado kabahin sa jueteng migawas ang pangalan ni Alex Tang, gikatahong igsoon ni Mayor Evelyn Tang-Uy. Mahinumduman nga makadaghan nang higayon nga mi-anhi sa dakbayan sa Dipolog ang igsoon sa mayor uban sa giilang nalambigit usab sa jueteng nga  si ATONG ANG.

Kini ang gibutyag ni Adelmo Laput, General Manager sa Zamboanga del Norte Electric Cooperative kon ZANECO atoll sa gipatawag nga press conference tinambongan sa mga sakop sa local media dinhi sa dakbayan sa Dipolog atubangan sa nasinati karon nga kanunay pagka palong sa kuryente.

Ang rotating brownout sa nagkalainlaing area gisugdan ug patuman sa ZANECO niadtung Septembre 15 sa dihang gisugdan na usab ug kaltas sa NGCP ang gi-supply niining kuryente para sa Zamboanga del Norte tungod kay sumala pa, dunay generation deficiency hinungdan sa pagkadaot sa ilang pipila ka mga planta.

Niadtung Septembre 23, ang kooperatiba nakadawat ug sulat gikan sa NGCP pinermahan ni Leonardo Pacot, Head sa Aurora Substation subay sa giluwatan nga advised gikan sa Mindanao Regional Control Center pinaagi sa Zamboanga Area Control Center nga ipatuman ang curtail load gikan sa alas dyes sa buntag hangtud kanus-a, wala pa masayre kay ila ra ipahibawo tungod kay ang gibutang sa komunikasyon, “until further notice,” uban sa pag-awhag nga i-implemnentar ang curtailment sa load sigon sa gihatag nga alokasyon.

Ang ZANECO wala makonbensir sa gikaingon sa NGCP nga dunay power generation defenciency gumikan kay wala gidetalye kon unsa gayud ang lingtunganay sa pagkibra sa power supply nga gialokar sa kooperatiba.

Gipaklaro sa kooperatiba ngadto sa mga konsumante nga ang kanunay nga pagkapalong sa sugang dagitab dili kini iyang hinungdan sa ZANECO gumikan kay iya kini nga pagboot sa National Grid Corporation of the Philipines kon NGCP.

Gani imbes 2 megawatt lamang ang gikibra, karon miabot na sa 3 megawatt ang gikaltas hinungdan nga imbes tag duha lamang ka oras ang palong, sugod sa sabado moabot na ngadto sa tulo ka oras ang rotating brownout nga ipatuman sa ZANECO.

Matud ni General Manager Adelmo Laput, sukad gipatuman sa NGCP ang curtail load, sila usab sa ZANECO mihatag gilayon ug aksiyon pinaagi sa kanunay niini nga pagpadala ug komunikasyon aron mapaabot ang mga pangutana kabahin sa reklamo sa mga konsumedor. Apan taliwala sa ilang gihimong aksiyon, nagpalingog-lingog lamang ang taga NGCP gumikan kay wala kini mihatag sa ilang tubag.

Matud pa, kon padalhan ug sulat dili tubagon, ug dunay ipatawag nga meeting dili motungha ang taga NGCP.

Tungod niini, ang mga membro sa Board of Director sa ZANECO midason ug resolusyon address ngadto NGCP uban sa pagpahibalo niini nga wala na makaangay ang kooperatiba sa gihimo nga pagkaltas sa power allocation sa gipatuman niini nga load curtailment ug mikondenar sa kanunay nga padayong pagbungolbungol atubangan sa dili paghatag ug hustong impormasyon sa mga katawhan.

Matud ni Manager Laput, sila sa ZANECO kanunay mahasngan sa mga katawhan kon dunay brownout, bisan kon kini nga problema iya sa NGCP. Dili usab sila makapasabot pag-ayo sa mga konsumedor gumikan kay ang tanan nilang mga pangutana sa ilang gipadala nga komunikasyon, wala tubaga.

Ang mga biktima nailhan nga sila si Jundi Maghanoy Taman, 22 anyos taga Barangay Galingon samtang ang uyab babaye nailhan nga si Riza Plando Bañas, 17 anyos, lomolopyo sa Barangay New Barili parehong sakop sa lungsod sa Tampilisan.

Ang mga biktima linoog nga gipamatay sa mga suspetsado nga daw uhaw ug hayop nga gipanghiwa ang ilang pribadong party sa lawas.

Sa imbestigasyon nga gipahigayon sa Tampilisan Police Station milutaw nga ang mga biktima samtang nag-date sa Barangay Galingon kaniadtong miaging biernes, Septembre 10 sa sayong kagabhion, gi-tripingan sa grupo sa mga suspetsado.

Sa wala pa mahitabo ang linoog nga krimen, ang babayeng biktima gipanamastamasan pa ayha gipatay pinaagi sa pagdunggab sa nagkalainlaing parte sa iyang kalawasan samtang gilaslas pa ang kinatawo.

Ang duha ka biktima napalgan nga wala nay kinabuhi nga nagbuy-od na sa yuta diin ang babaye wala nay tabon ang kinatawo nga gituhoan nga gilugos una ayha gipatay.

Usa ka makuting imbestigasyon ang gihimo karon sa Tampilisan Police Station samtang blangko pa ang otoredad kon si kinsa ang responsible sa linoog nga krimen.

Gituhoan nga dili lamang usa ka tawo ang naghimo sa maong hitabo nga posibling grupo kini nga sabog sa ginadiling druga.

Sa pikas bahin, laing kaso sa pagpanglugos ang nahitabo sa lungsod sa Katipunan diin usa ka Grade III pupil sa Setio Guisokan, Barangay Sere sang gilugos usab.

Ang suspetsado nailhan nga usa ka Arturo Dumandan, 34 anyos lomolopyo sa susamang dapit.

Para ni Jalosjos, kon buot huna-hunaon, kagamay ra kaayo sa lugar nga iyang gi-aplayan para kaliguanan. Kay angay niini, kon mahimo palang, tibook pa baybayon sa siyudad sa Dapitan maoy iyang palamboon para sa turismo.

Unang miduso sa iyang sumbong ngadto sa Provincial Internal Affair Service sa Kampo Hamac, Sicayab ning dakbayan sa Dipolog mao si Modesto Ello, hingkod ang pangidaron usa ka barbero. Ang iyang gireklamo mao si PO1 Abunda nga maoy miliab ug misipa ug mikulata kaniya.

Sa iyang reklamo, gisaysay ni Ello nga samtang siya naglantaw lamang sa nagpa-away ug lawa-lawa kalit nga miabot si Abunda aron dakpon ang nagsugal. Apan sa iyang paglakaw, siya gipugngan ug giliab ni Abunda. Wala pa matagbaw ang maong polis siya gisipa pa gayud sa iyang likod atubangan sa daghang tawo.

Si Ello nga nabun-og nagpakuha ug medical certificate ug iyang giduso ang mao niyang reklamo ngadto sa PIAS. Matud niya, dili siya mopasaylo kang Abunda ug gusto niya nga kini matangtang sa iyang serbisyo tungod sa subra nga pag-abuso.

Sa pikas bahin, laing membro sa Dipolog City Police Station ang gireklamo sa usa ka batan-ong babaye nga siya gibilanggo sa detention cell gumikan lamang nga wala siyay lisensiya sa pagmaneho sa iyang motorsiklo.

Matud sa biktima, gipriso siya ni PO3 Alojamento gikan sa alas 6:00 sa gabii ug gibuhian na sa pagka alas 8:00 sa buntag. Didto pa gayud siya giipon sa mga lalake.

Ang iyang bana naghulat sa gawas nag-puk-ong sa daplin uban sa iyang anak nga nagbantay kaniya samtang gipriso sa detencion cell.

Iyang gikatingad-an ngano nga siya gibilanggo nga dili man siya criminal. Kon duna man siyay nabundolan sa laing motor apan iya man kining giangkon ug andam mobayad sa nadamyos.

Daw walay imik ang kagamhanang local ning dakbayan sa Dipolog sa mitumaw nga isyu samtang nahugyaw na pag-ayo ang mga katawhan nga mipa-dayag sa ilang nagkadaiyang baruganan sa kahanginan sa radio ilabi na sa programa Kasayuran sa DXFL.

Ang madungog lamang sa radio sa DXAA ang mga magsisibya nga haskang nakadepensa ug daw nahimo nang tigpamaba sa city hall ug sa nagpataya sa Jai-alai nga halata ra kaayong tigdawat ug suborno gikan sa immoral ug illegal nga pasugal.

Maoy  gidepensa nga ang Jai-alai, usa ka legal nga dula nga makita live sa telivision gumikan kay kini gitugot sa PAGCOR. Apan mga katawhan nakamatikod nga ang Jai-alai outlet gihimo lamang front o pantalya, kay ang resulta sa mogawas nga numero maoy gigamit sa illegal nga pasugal nga masiao nga nagpataya ug peso-peso sa mga pobreng katawhan.

Mga agent collector sa Jai-alai nga nagsuot pa ug ID dayag kaayo sa publiko nga naglibod-suroy sa mga nagkadaiyang lugar dinhi sa dakbayan nga nagpasugal sa gawas diin ang i-isyu sa motaya, estab nga papel nga gisulat ug ballpen ug mipasalig nga ang modaug adto lang mokobra sa Jai-alai outlet.

Misingaw ang pagduda ug katahap nga ang financier sa illegal nga sugal nga masiao mao lamang ang nagpasiugda sa gipa-uso ug balik nga Jai-alai, gamit ang pantalya sa legal nga jai-alai outlet.

Kabahin sa nagkalat nga padula ug vedio karera nga matud pa, dunay pipila nga dakpon sa polis apan ipalukat aron makabalik sa iyang operasyon, padayon nga tak-om ang baba sa kapolisan.

Lakip sa gisiperan ang baba sa kontrobersiyal nga isyu kabahin sa Jai-alai ug vedio karera mao ang mga piniling konsehal nga kaalyado sa politika dinhi sa dakbayan sa Dipolog.

Wala itago ni Governor Yebes ang gibati niyang kabalaka sa nakita niya karong pagkaylap sa sugal ilabi na dinhi sa Dipolog gikan sa swertres karon anaa na usab ang jai alai, small town lottery ug illegal nga operasyon sa video carrera.

Matud pa sa gobernador ang giluwatan niyang mga kamanduan kabahin sa paglakag sa illegal nga sugal wala hikutara ni Police Senior Superintendent Mejia, Provincial Police Director sa ZaNorte hinoon atua kini makigkoordinar ni Mayor Evelyn Uy sa dakbayan sa Dipolog.

Gipahibawo usab ni Governor Yebes nga aduna na siyay request nga ilisan si Mejia pagka provincial police director sa ZaNorte kay imbes maoy tahas niini ang pagsumpo sa mga sugal mao na may nahimo karong tigpanalipod sa sugal uban sa hepe sa kapulisan sa Dipolog nga si Maclang.

Sa samang bahin gihisgutan sa gobernador nga naglaraw siya nga mopasaka ug kaso batok sa tanang mga personalidad nga nalambigit sa operasyon karon sa jai alai dinhi sa Dipolog sa higayon nga mahingpit na niya ang gikinahanglang mga papeles.

Si Governor Yebes nagkanayon nga positibo siya nga ang operasyon sa jai alai sa Dipolog illegal kon ugaling ang gikuhaan niini ug resulta nga fronton nagagikan sa Freeport zone sa Port Irene sa Cagayan Valley province.

Matud pa sa gobernador sa dihang mireport kaniya si Mejia subli niyang gipalanog sa iyang kamanduan nga undangon ang swertres, video carrera ug uban pang sugal nga mikaylap karon sa Dipolog apan mao na lay iyang nadungog sa kahanginan nga gipanalipdan na hinoon sa oic provincial police director ang operasyon sa jai alai nga kini legal nga pasugal.

Giklaro daan sa gobernador nga ang makahatag ug franchise para sa operasyon sa jai alai mao ang PAGCOR ug kini pagapandayon pinaagi sa kongreso.

Ang operasyon sa jai alai fronton sulod sa Port Irene ilawom sa atong balaod gitugot lamang sulod sa maong free port zone.

Daku ang iyang pagtuo nga ang mga off fronton sa jai alai dinhi sa Dipolog illegal kay ang ilang resulta gikuha sa fronton sulod sa Port Irene nga usa ka free port zone ug walay gisandigan nga prangkisa nga gipanday gikan mismo sa kongreso.

Sumala pa sa gobernador magbuhat siya karon ug usa ka lakang uban sa tanang mayors sa ZaNorte aron ipadayag ang nasinati karong pagkaylap sa operasyon sa illegal nga sugal sa atong probinsiya ilabi na dinhi sa dakbayan sa Dipolog nga pakyas ang atong kapulisan sa pagsumpo.

Maoy ipuntirya sa maong petisyon ang kasamtangan karong provincial police director sa ZaNorte uban sa hepe sa kapulisan sa Dipolog ug Dapitan lakip na ang regional police director.

Kopya sa maong petisyon ipadangat ngadto sa DILG Secretary Jesse Robredo, retired Bishop Oscar Cruz ug hangtud na kang Presidente Benigno “Noynoy” Aquino, III kabahin na sa kahimtang sa sugal nga milaganap karon sa atong lugar nga walay aksiyon nga gihimo ang mga otoridad.

Sa iyang kabahin giklaro ni Governor Yebes nga limpyo ang iyang konsensiya kay wala gayud siya mag-apil-apil sa mga pasugal o kaha magdawat ug payola gikan sa operasyon niini.

Sumala pa wala gayud mahimong kabahin sa iyang programa ang pagpaluyo ug mga pasugal kay sigurado makaapektar kini sa panginabuhi sa atong mga katawhan kay makapasamot lang kini sa kapobre sa atong mga katawhan.

Mahitungod sa gipakitang pagka tulibagbag karon ni Mejia nga mas nakigkoordinar sa Dipolog kay sa probinsiya, iya usab nga gipahibawo nga may hangyo na siya nga pulihan ug laing police provincial director ZaNorte.

Gibutyag sa gobernador nga sulod na sa duha ka higayon nga aduna nay giluwatang kamanduan alang sa pag-asumir sa bag-ong provincial police director sa ZaNorte apan gibabagan kini sa mga politico nga miangkon nga kapartido sa presidente.

Giklaro ni Governor Yebes nga isip usa ka abogado ang tanan gipaagi ug gipasubay gayud niya sa mga gimbut-an sa atong balaod taliwala sa gibuhat nga pagsapaw sa iyang gahum sa ubang mga politico nga ang gilantaw ilahang kaugalingon lamang interests ug dili pagsirbisyo sa katawhan.

Matud pa ni Governor Rolando Yebes nga maoy laraw niya nga ang mga kabarangayan diha sa bukid nga idugtong ug mga dalan ilabi na ang mga barangay nga nahimutang sa mga utlanan sa nahisgutang upat ka mga lungsod.

Sa nasayran ang mga molopyo sa nagkadaiyang mga barangay nga nahimu-tang sa utlanan sa maong mga lungsod sa taas na nga panahon nga nagtabok-tabuk sa pagbaligya sa ilang mga produkto kon asa ang tabo tungod kay nagkana-it o sikbit ra ang ilang mga barangay diin mas sayun kanila ang pagdala sa ilang mga baligya kay sa paghandos niini paingon sa sentro sa ilang mga lungsod nga mas layu ang distansiya.

Una niyang giplanohan nga buslutan ang dalan gikan sa Tapeza paingon sa sentro sa Panampalay aron madugtong niya ang lungsod sa Roxas ug Jose Dalman.

Samtang ang kanhi pangulo sa CDAU nga si Ronie Pacilan mibutyag nga makatabang ug daku ang pagbuslot ug bag-ong mga dalan sa mga utlanan sa upat ka nahisgutang lungsod kay mas sayun ug duol na lang sa atong mga katawhan sa bukid ang ilang pagtabuk-tabuk paingon na sa mga poblacion.

Gihulagway ni Pacilan nga may mga barangay nga nahimutang sa utlanan sa upat ka mga lungsod nga mas sayun agi-on sa pikas lungsod kay sa moagi pa sila sa sentro sa ilang munisipyo nga molibot pa ug layu.

Sa samang bahin gipahibawo usab sa gobernador nga pipila sa mga ekipo sa probinsiya ilabi na ang mga Volvo dump truck nga pinalit sa kanhi gobernador iyahang idispatsar tungod kay daku ug gastu ang pagmintinar niini sanglit computerized ang sakyanan nga nagkinahanglan pa ug technician gikan sa kauluhan kon ugaling adunay depekto ang ekipo.

Nasayran sa buhatan sa inpormasyon nga nahimong mabulokon ang maong kalihokan pinaagi sa panag-indigay sa mga contestants alang sa Mr.ug Ms. Alay Lakad diin adunay pito (7) ka mga paresan ang nagtigi nga nagagikan sa nagkalain-laing ahensya ug mga tulunghaan sama sa Zamboanga del Norte Police Provincial Office, City Gov’t of Dipolog,Dipolog Community School, JRMSU ug Dipolog Pilot Demonstration School.

Kining maong kalamboan ang matud pa mainiton usab nga gitambongan sa mga empleyado gikan sa Pampubliko ug pribadong buhatan, mga estudyante sa nagkalain-laing tulunghaan, mga personahe sa ZNPPO gipangulohan ni PSSupt. James Mejia, mga kapitanes sa barangay, mga konse-hales, Vice Mayor Senen Angeles, Mayor Roberto Y. Uy, Congressman Rosendo Labadlabad ug ang pinasidunggan mamu-mulong nga si Ret.Gen Alexander Yano kanhi Chief of Staff.

Kini pinasikad na sa giduso nga reklamo sa nagkadaiyang Non Government Organization nga mas daghan ug membro ang Zamboanga City kon ikumpara sa ubang probinsya ug siyudad dinhi sa rehiyon.

Nasayran nga upat ang aspirante nga molansar sa pagka RDC chairman. Sila mao si Mayor Celso Lobregat sa Zamboanga City, Governor Tony Cerellies sa Zamboanga Del Sur, Governor Rolando Yebes sa Zamboanga Del Norte ug Dipolog City Mayor Evelyn Uy.

Ang National Economic Development Authority kon NEDA maoy nag-organized sa gipatawag nga tigum.

Si Board Member Cedric Adriatico maoy nangamahan sa resolusyon para sa NEDA aron kahisgutan atol sa RDC meeting ang kabahin sa komposisyon sa mga membro nga makiangayon ug patas ang representasyon sa mga membro sa NGO ug pribate sector.

Si Board Member Alan Ranillo misugyot usab sa amendments sa resolusyon nga gikinahanglan ang mamahimong membro accredited sa hingtungdang Sanggunian sa mga probinsya ug siyudad diin sila nagrepresentar.

Si Board Member Edgar Baguio sa iyang kabahin misugyot nga ipadayag usab ang isyu kabahin sa aspirante pagka RDC chairman diin nagrepresentar sa usa ka component city sama dinhi sa dakbayan sa Dipolog nga nahisakop sa Zamboanga del Norte.

Alang kang Floor Leader Baguio, ang angayan lamang makapansar sa pagka RDC chairman mao ang gobernador ug ang mayor gikan sa usa ka ‘highly urbanise city” sama sa Zamboanga City.

Tungod kay ang dakbayan sa Dipolog usa paman kini ka component city nga nahisakop sa Zamboanga del Norte, sama ra usab kini sa ubang mga lungsod dinhi sa tibook probinsya.

Nasayran nga si Mayor Evelyn Uy gusto molansar sa RDC kay sa tanang aspirante, siya lamang ang kaalyado sa politika ni President Benigno “Noynoy” Aquino.

ZaNorte  adunay Loan Capacity nga P1.5B

Ang kagamhanang probinsiyal sa ZaNorte mamahimong makapanghuwam ug pundo nga balig P1.5 bilyones ka pesos nga sarang magamit sa pag-implementar sa nagkadaiya niining mga programa ug proyekto.

Mao kini ang gibutyag ni Governor Rolando Yebes, human gipasubay niya sa Local Finance Committee pila ang balor sa kagamhanang probinsiyal sa ZaNorte ug ang mamahimo niining mahuwaman sa nagkadaiyang mga lending institution.

Matud pa ni Governor Yebes gipahibawo siya nga ang kagamhanang probinsiyal sa ZaNorte mamahimong nakapanghuwam ug hangtud sa P1.5 bilyones ka pesos.

Kini maoy nahisgutan sa gobernador agig tubag sa pangutana kon wala ba siyay laraw nga manghuwam ug pundo para gamiton sa pagkongkreto sa nagkadaiya niining mga kadalanan nga iyaha sa probinsiya sama sa gibuhat sa ubang lalawigan nga nanghuwam ug dagkung pundo alang sa susamang katuyuan.

Wala isalikway sa gobernador nga ang pagpangutang sa probinsiya usa sa mga kapilian nga mamahimo niyang sagupon alang na sa pagpatuman ug mga proyekto.

Niadtung Martes gihimo na ang ground breaking alang sa maong proyekto nga gitambongan mismo ni kanhi Congressman Romeo “Nonong” Jalosjos, Chief Executive sa Gloria de Dapitan, Vice Governor Francis Olvis, Dapitan City Mayor Dominador Jalosjos, Vice Mayor Patric “Jing” Chan, Board Member Alan Ranillo, City Councilor Atty. Cris Palpagan, Atty. Ivan Patrick Ang, Provincial Tourism Officer, Atty. Flint Concha, Provincial Chairman, Provincial Tourism Council, Biniray Barangay Kapitan Carmelito “Epok” Tunguia, uban sa archetic ug contractor, Chinese investors ug uban pa.

Sa press conference nga gipahigayon, malipayon nga gipahibawo ni kanhi Congressman Nonong Jalosjos nga ang iyang gidamgo kaniadto nga maghatag ug dugang kalingawan sa mga katawhan hayan matuman na tungod kay pagasugdan na ang construction sa senihan karong sunod bulan ug ang target nga kini matapos sigun sa gikontrata sa contraktor, usa ka tuig ug duha ka bulan diin gikatakda ang Grand opening pagahimoon sa Desyembre 20, 2011.

Matud ni Jalosjos, ang Teatro de Dapitan iyang gipahinungod, unang-una sa mga katawhan dinhi sa tibook probinsya sa Zamboanga del Norte ug sa duha ka mga dakbayan sa Dipolog ug Dapitan nga sa taudtaud nang panahon nawad-an ug kalingawan sama sa ilang natagamtaman kaniadto dinhi sa dakbayan sa Dipolog diin adunay lima ka senihan. Apan sukad nangaserado, wala nay mibanos sa maong matang sa patigayon hinungdan nga anaa nalang kini nagsalig sa salida sa television samtang ang uban mutoyo ug larga aron lang molantaw ug seni.

Tungod niini nga kahimtang, ang tagdumala sa Gloria de Dapitan Incorporated, nakadesider nga mobutang ug pasilidad sama sa senihan nga karon, wala dinhi sa dakbayan sa Dipolog.

Modernong pasilidad maoy ibutang, mo-hire ug international expert consultant aron maseguro nga world class ang kalidad para sa tibook construction sa maong proyekto.

Gilauman nga modugok ning maong senihan ang mga katawhan gikan sa mga kalungosran dinhi sa probinsya sa ZaNorte, Misamis Occidental, Zamboanga del Sur, Sibugay, Osamiz. Target usab nga kostumer ang nagagikan sa Iligan, Dumaguete, Zamboanga City bisan na sa Cagayan de Oro.

Ang Twin Theaters adunay 300 setting capacity nga gilangkoban sa duha ka managlahing lugar, usa niini ang moderno nga 3D movie ug ang usa, regular nga gidak-on sa screen sama sa senihan sa mga dagkung mall sa Manila.

Wala gililong ni Jalosjos nga ang iyang pagatukoron nga Twin Theaters, ang salapi iyang inutang sa bangko. Matud niya, dili niya ika-ulaw mosulte nga nag-loan siya sa Land Bank of the Philipines para sa maong proyekto.

Kini iyang gipaklaro kay basin makaingon ang mga katawhan ngano nga daghan siyang kuwarta. Wala usab niya gililong nga duna rapod siyay kuwarta, apan kini iyang hinulaman sa bangko tapos na niya mabayare ang iyang unang 300 million nga loan.

Kaniadto, si Jalosjos gibiay-biay sa iyang mga higala ngano nga nagbutang siya ug pohunan nga multi-million nga matang sa negosyo sa usa ka mamingaw nga lugar nga kagang ug bakbak lamang ang nagsuroy-suroy.

Apan alang kaniya, ang dakbayan sa Dapitan haum nga lugar nga kasuroyan sa mga local ug langyaw’ng turista tungod kay haw-ang pa kini nga dapit ug dili congested sa traffic, labaw sa tanan anaa sa maong siyudad ang tanang gipangita nga mga talan-awon nga mga tourist attraction ug ang pag-exile sa national hero nga si Dr. Jose P. Rizal.

Gawas sa Twin Theaters ug Hypermarket nga iyang pagatukoron, iya usab ipabarug ang pinakataas nga hotel dinhi sa Mindanao nga anaa pagatukoron sa may boulevard sikbit sa Gloria de Dapitan.

Matud niya, kini nga hotel kompleto sa pasilidad nga wala sa ubang dagkong siyudad sa Mindanao sama sa Davao, Cagayan ug Zamboanga. Kini adunay 3,000 setting capacity nga convention center.

Kining tanan niyang ginadamgo, maoy bonga sa iyang wild imagination sa dihang didto pa siya nabilanggo sa New Bilibid Prison. Mao nay iyang gidamgo nga anha sa dakbayan sa Dapitan ibuhos ang iyang pohunan aron molambo ang maong dakbayan, makamugna ug trabaho ug labaw sa tanan, mahatagan ug kalingawan ang mga katawhan.

Kini ang gipakita ni PDEA Agenty Jury Rocamora sa gipahigayong imbestigasyon sa duha ka komitiba sa Sangguniang Panlalawigan sa ZaNorte kabahin na sa nahitabong shooting incident sulod sa ZaNorte Medical Center sa nakalabay’ng Hulyo 21, 2010.

Unang gisaysay ni Ms. Rosevic Lacaya-Ocampo, ang administrator sa hospital ang nahitabong shooting incident sa 3rd floor sa hospital diin nahimutang ang mga private rooms.

Sumala pa hospital administrator ang nagpahibawo kaniya mao ang usa sa ilang driver sa ambulansiya nga si Lito Jamarolin pinaagi sa text message nga nadawat niya mga pasado na ala una ang takna sa kaadlawon sa Hulyo 22.

Diha-diha dayon gisubay niya ang insidente ug gika-istorya si Rocamora ngano nga walay silay hustong koordinasyon nga gibuhat nga naghatag ug hulga sa kinabuhi sa ubang mga pasiente ug personahe sa maong tambalanan.

Matud pa ni Ocampo samtang didto pa ang napusilan nga suspek sa Emergency Room namatikdan niya nga adunay daghang tawo nga nag-atong kang Gorres ug sa ahente sa PDEA nga napusilan.

Ang pahayag ni Rocamora nga kini mga meyembro sa Team DAVID nga maoy motabang kanila sa PDEA sa pagbantay sa napulisan nga suspek ug ilang ahente sulod sa ZaNorte Medical Center.

Sa gihimong pagsukit-sukit ni Board Member Cedric Adriatico ngadto sa PDEA ngano nga wala sila makigkoordinar sa mga tinugyanan sa hospital si PDEA Agent Rocamora mitubag nga sila wala pugsa sa balaod nga kinahanglang makigkoordinar gayud sa mga establishments sa ipahigayon nilang mga operasyon kay aron dili kini mabulabog.

Samtang sa gihimong pagsukit-sukit usab ni Board Member Edgar Baguio si Rocamora mikonpirmar nga wala gayud mahibawo ang mga tinugyanan sa hospital lakip na sa security personnel niini sa ilang gihimong operasyon sulod sa tambalanan.

Gibutyag usab ni Rocamora nga duha lamang ka PDEA agents ang diha sa sulod sa hospital.

Sa ubang mga pangutana nga gipasupot ni Baguio si Rocamora nagdumili na sa paghatag ug tubag kay kuno kini subjudicy sanglit aduna nay kaso nga gipasaka atubangan sa hukmanan kabahin sa maong insidente.

Hinoon gitataw ni Baguio nga ang ilang gihimong imbestigasyon walay kalambigitan sa kaso nga anaa karon sa korte kon dili ang ilang gusto nga masubay ang punto kabahin na sa kakuwang sa koordinasyon sa PDEA ngadto sa hospital management.

Apan giklaro usab ni Baguio dili siya makadawat sa pahayag nga ang mga personahe sa ZaNorte Medical Center nga mga doctor ug nurses dili mokooperar unsay operasyon batok sa illegal drugs kay silang mga opisyal sa probinsiya lakip na sa nagpakabana kabahin na niini nga problema nga gusto usab nilang mahatagan ug sulbad.

          Ang problema kabahin sa illegal drugs dili mamahimong masulbad pinaagi lamang sa PDEA, matud pa ni Baguio adunay dakung panginahanglan nga makigkoordinar sila a ubang mga opisyales ug ahensiya sa gobyerno para epektibong masumpo kini nga problema.

Samtang gideklarar usab ni Rocamora nga ang nasangpit nga operasyon adunay koordinasyon tali na sa Dipolog Police.

Apan sa affidavit nga giluwatan sa mga security personnel sa hospital gitataw niini nga walay nahitabong koordinasyon ug sa samang bahin ang ilang namatikdan ug nasaksihan mao ra ang mga ahente sa PDEA sa wala pa ang shooting incident ug walay pulis nga ilang namatikdan gikan sa Dipolog Police.

Matud pa ni Adriatico kini maoy migawas sa affidavit sa security personnel sa hospital nga wala silay nakitang meyembro sa Dipolog Police gawas lamang sa dihang natapos na ang shooting incident diin adunay mga meyembro sa Team DAVID ug hepe sa kapulisan nga si Maclang didto makit-i sa Emergency Room.

Sa dihang gipangayuan ni Adriatico ug report ang representante sa Dipolog Police nga si Police Senior Inspector Eric Bucar sa gibasa niini nga accomplishment report wala maghisgut nga ang nahisgutang operasyon adunay koordinasyon sa kapulisan sa dakbayan.

Apan sama kang Rocamora giinsistir sa Dipolog Police nga kini ilang hinugpong nga operasyon.

Samtang giklaro ni Provincial Attorney Sarmiento, ang ZaNorte Medical Center wala gastuhi ug minilyon ka pesos para lamang mamahimong lugar diin himoon ang pagpinusilay.

Matud pa sa provincial attorney kinahanglan nga matuhog ug masabtan kini sa taga PDEA ug ubang ahensiya sa gobyerno nga nagpatuman sa balaod nga dili kini maoy katuyuan sa pagpatindog sa maong hospital aron diha ipahigayon ang pagpinusilay.

Gitataw usab ni Sarmiento nga sa pagbukas sa hospital gipatigbabaw nila ang higpit nga siguridad apan kini nga sistima gisupakan sa atong mga katawhan nga dili sila gusto nga higpitan ug maayo ang pagpatigbabaw sa siguridad sa tambalanan ilabi na nga kini usa ka government hospital.

Kini maoy rason nga ang siguridad sa hospital nausab tungod kay mismo ang atong kaugalingong mga katawhan dili gusto niini nga matang sa siguridad nga sila moagi sa higpit nga proseso ayha makasulod.

Gipresentar usab sa provincial attorney sa ZaNorte ang suwat nga gipadangat ni Governor Rolando Yebes ngadto kang PDEA National Director Domingo Santiago apan duha na ka buwan ang nakalabay wala kini mohatag sa iyang tubag.

Gibasa usab ni Atty. Sarmiento ang unod sa suwat nga gipadangat ni Governor Yebes ngadto sa hepe sa PDEA diin gitataw niini nga wala gayud mahiuyon ang kagamhanang probinsiyal sa ZaNorte sa gibuhat nga operasyon sa ilang ahente nga naghatag ug kapiligro sa kinabuhi sa mga pasiente ug personahe sa hospital nga wala makigkoordinar.

Samtang giklaro sa administrator sa ZaNorte Medical Center nga wala gayud sila mahiuyon sa pahayag nga giluwatan sa ahente sa PDEA nga nagpasabot nga wala silay pagsalig sa ubang mga opisyales ug ahensiya sa gobyerno hinungdan nga wala sila makigkoordinar sa mga tinugyanan sa hospital.

Matud pa ni Ms. Ocampo mismo ang atong Local Government Code of 1991 nagmandu nga ang tanang mga nasudnong ahensiya sa kagamhanan nagmandu kanila sa pagpakigkoordinar ngadto sa mga kagamhanang local sa bisan unsa nila nga mga kalihukan nga pagahimoon.

Giklaro sa hospital administrator nga ang kakuwang sa pagsalig ni Rocamora sa ubang ahensiya ug opisyales sa gobyerno dili makatarunganong rason nga dili sila mosunod sa kasuguan diha sa balaod.

Sa maong imbestigasyon nagdumili usab ang PDEA sa pagtubag sa pipila ka mga pangutana sa mga board members kay kuno kini mahulog nga subjudicy.

Mismo si Board Member Fernando Cabigon, Jr. gisapat sa taga PDEA kay sa usa ka yanu niya nga pangutana kon pila ka pulis sa Dipolog ang nalambigit sa operasyon si Rocamora nagdumili sa pagtubag.

Samtang si Board Member Alan Ranillo mitataw nga ang mga pangutana nga gipasabot ni Cabigon layu ra sa tinood nga kini mahulog sa subjudicy.

Kini ang desisyon sa korte nga gipermahan ni Presiding Judge Gilbert P. Moises sa Regional Trial Court, Branch 18 sa Cebu City, pinitsahan ug Septembre 15, 2010 nga nagsalikway sa “Very Urgent Motion” para ipagawas ang Alias Warrant of Arrest.

Ang mosyon para ipagawas ang Alias Warrant of Arrest gipasaka sa piskaliya sa Cebu human si Cardino miduso ug reklamo batok kang Mayor Jun Jalosjos aron nga kini makaserbisyo sa iyang sentensiya tapos makonbikto sa kasong robbery niadtung Abril 30, 1970.

Ang piskaliya sa ilang mosyon miingon nga ang akusado nakakuha ug certification pinitsahan ug Desyembre 19, 2003 gikan kang kanhi Administrator of the Parole and Probation Administration Gregorio F. Bacolod nga si Mayor Dominador Jalosjos nakatuman sa terms and condition sa iyang probisyon ug ang kaso giserado na.

Ang maong sertipikasyon maoy gisuporta sa Urgent Motion for Reconsideration nga isalikway ang Warrant of Arrest nga gipasaka sa korte niadtung Enero 23, 2004 nga maoy nakapalinga sa hukmanan sa ilang nahaunang kamandoan pinitsahan ug Pebrero 5, 2004 nga isibog ang warrant of arrest.

Si Governor Rolando Yebes nga anaa sa iyang ikatulo ug katapusan nga termino sa pagka gobernador sa probinsya sa Zamboanga del Norte miingon nga human sa iyang pagserbisyo sa tibook probinsya kini magapadayon isip kongresista.

Kini maoy gipahibawo sa gobernador sa iyang gipabate nga mensahe atol sa pagsaulog sa iyang adlaw’ng natawhan didto Sitio Tapeza, Barangay Panampalay sakop sa lungsod sa Roxas.

Matud ni Governor Yebes, sanglit naghinapos na ang bahin sa iyang pagserbisyo isip gobernador sa probinsya sa Zamboanga del Norte, apan dili kini maoy kinutoban kay iya gihapon ipadayon ang pag-alagad sa mga katawhan sa mga lungsod nga nahisakop sa dihang distrito. Congressman ang target ni Governor Yebes sa umalabot nga eleksiyon sa tuig dos mil trese.

Giawhag sa gobernador ang tanang mga katawhan nga maghiusa kay maoy iyang hatagan ug dakong pagtagad karon ang pagbuslot ug mga dalan sa kabukiran dinhi sa Segundo distrito aron sayon na ang pagtumod sa produkto sa uma ngadto sa mga lungsod.

Gimandoan sa gobernador si OIC-Provincial Engineer John Lim nga himoon ang pagtrabaho sa mga kadalanan sa kabukiran aron maglahoslahos na kini sa lainlaing lungsod sa probinsya sa Zamboanga del Norte ug sa kasikbit nga lalawigan.

Gani karon gisugdan na ang pagtrabaho sa dalan gikan sa Barangay Femagas, ang kinabukirang bahin sakop sa lungsod sa Katipunan lahos na ngadto sa lungsod sa Dumingag, Zamboanga del Sur.

Mao usab ang gidamgo ni Governor Yebes nga ang mga dalan sa kabukiran nga nahisakop sa mga lungsod sa Roxas, Manukan, Jose Dalman, Sindangan ug Siayan ang maglahoslahos.

Kini usab ang gikalipay pag-ayo ni Mayor Eduardo “Ed” Yebes sa lungsod sa Roxas tungod kay dugay na kaayo nga panahon nga haskang gubaa ang mga dalan sa bukid nga nahisakop sa iyang lungsod. Maoy gusto ni Mayor Yebes nga magdugtong ang dalan sa Sitio Tapeza, sakop sa Barangay Panampalay ug Barangay Lipay sakop sa lungsod sa Jose Dalman ug Dalongdong sakop sa lungsod sa Sindangan.